បន្ទាយមានជ័យះ ខេត្តបន្ទាយមានជ័យគឺជាខេត្តមួយដែលមានព្រំដែនជាប់និងប្រទេសថៃមានបទល្មើសច្រើនដែលឆ្លងកាត់ខេត្តមួយនេះក្នុងនោះបទល្មើសសេដ្ឋកិច្ច បទល្មើសគ្រឿងញៀន និងបទល្មើសឧក្រិដ្ឋតែងកើតមានជាហូរហែហើយសមត្ថកិច្ចក៏បានបង្ក្រាបបានជាបន្តបន្ទាប់នោះ លោកឧត្តមសេនីយ៍ អាត់ ខែម ស្នងការខេត្តបន្ទាយមានជ័យ បានព្រមានដល់មន្ត្រីនគរបាលគ្រប់មូលដ្ឋានស្រុក-ក្រុងទាំងអស់ត្រូវអនុវត្តអោយបាននូវការលុបបំបាត់ល្បែងសុីសងគ្រប់ប្រភេទ និងជៀសវាងការលាក់បាំងជនចែកចាយគ្រឿងញៀនពិសេសជៀសអោយឆ្ងាយពីការពាក់ពន្ធ័រឿងយកលុយ។
លោកថ្លែងបែបនេះនៅក្នុងពិធីប្រកាសប្តូរមុខតំណែងអធិការនៃអធិការដ្ឋានស្រុកព្រះនេត្រព្រះកាលពីរសៀលថ្ងៃទី៣១ខែកក្កដាឆ្នាំ២០១៤។ លោក លី ប៊ុនរឹទ្ធិ អភិបាលស្រុកព្រះនេត្រព្រះបានស្នើរដល់លោក មាស រឹទ្ធី ដែលបានទទួលភារកិច្ចជាអធិការថ្មីជំនួសលោក កែវ ប៊ុនយឿត ដែលត្រូវចូលនិវត្តន៍ នោះត្រូវពិនិត្យឡើងវិញនូវរាល់ភាពអសកម្មដែលនៅសេសសល់ជាពិសេសគឺការបំរើសេវាជូនប្រជាពលរដ្ឋដែលគិតតែពីផលប្រយោជន៍ ។ 
លោកអាត់ ខែម បានដាក់នូវវិធានការចំនួន៧ចំនុចដល់មន្ត្រីនគរបាលក្រោមឱវាទអោយបន្តអនុវត្តដើម្បីរក្សាអោយបានសន្តិសុខសណ្តាប់ធ្នាប់និងសុវត្ថិភាពជូនជាតិនិប្រជាពលរដ្ឋ។ក្នុងវិធានការទាំង៧ចំនុចរបស់លោកឃើញថាមានសំខាន់ច្រើនគឺការងារសន្តិសុខ ព្រហ្មទណ្ឌ សណ្តាប់ធ្នាប់ តាមដានជាប្រចាំនូវមុខសញ្ញាចាស់-ថ្មី បងធំបងតូចដែលមាននៅក្នុងមូលដ្ឋានរបស់ខ្លួន។ហើយចំពោះល្បែងសីុសងគ្រប់ប្រភេទក៏មិនអោយកើតមានជាដាច់ខាត ពិសេសអនុវត្តគោលនយោបាយភូមិ-ឃុំមានសុវត្ថិភាពអោយទទួលបានប្រសិទ្ធិភាពខ្ពស់៕ ដោយ:ឃិន គន្ធា
