ខេត្តព្រះវិហារ យុវជនស៊ីវិលម្នាក់អាងខ្លួនជាកូនទាហានពាក់សក្ដិ៥ក្នុងអង្គភាពកងពលតូចលេខ៧ប្រចាំតំបន់ព្រំដែនប្រាសាទព្រះវិហារបានយកកាំភ្លើងអាការ៤៧ទៅបាញ់ផ្ទុចដីចំនួន២៧គ្រាប់ជាការគំរាមសំលាប់ឪពុកម្តាយខាងកូនក្រមុំជាថៅកែហាងលក់គ្រឿងក្លែមយីហោជំនោរដងស្ទឹងស្ថិតនៅភូមិកំពង់ចម្លងសង្កាត់កំពង់ប្រណាកក្រុងព្រះវិហារ។ហេតុការណ៍បាញ់បោះតាមសំលាប់ក្រុមគ្រួសារថៅកែហាងនេះកើតទ្បើងនៅវេលាម៉ោង១១និង៤៥នាទីយប់ថ្ងៃទី០៩សីហា២០១៤រីឯជនដៃដល់បានរត់គេចខ្លួនដោយសុវត្ថិភាព។
សមត្ថកិច្ចនគរបាលមូលដ្ឋានបានអោយដឹងថាជនដៃដល់បាញ់បោះសេរីឈ្មោះលីនលីដាអាយុ២១ឆ្នាំធ្លាប់ជាប់គុកចំនួន៦ខែថ្មីៗនេះម្ដងរួចមកហើយករណីជំរត់កូនក្រមុំកូនថៅកែហាងខាងលើដោយខុសច្បាប់ទៅរស់នៅលាក់ខ្លួននៅស្រុកស្វាយលើខេត្តសៀមរាប។ជនដៃដល់ឈ្មោះលីនលីដាទើបតែចេញពីគុកនៅខេត្តព្រះវិហារបានប្រមាណជា២០ថ្ងៃប៉ុណ្ណោះ។ សមត្ថកិច្ចបន្តថាករណីបាញ់បោះយ៉ាងសាហាវដូចក្នុងរឿងហុងកុងនេះអាចជារឿងគំនុំចាស់ផ្ទាល់ខ្លួនដោយសារជនដៃដល់គំកួនចំពោះឪពុកម្ដាយបង្កើតរបស់កូនក្រមុំដែលហ៊ានប្ដឹងសមត្ថកិច្ចអោយតាមចាប់ខ្នួនយកទៅដាក់គុគ។
កូនក្រមុំរបស់ថៅកែហាងជំនោរដងស្ទឹងនេះឈ្មោះរ៉ានីអាយុ១៩ឆ្នាំ។ ហាងមានរៀបធ្វើជាខ្ចូសនេះស្ថិតនៅជាយក្រុងព្រះវិហារស្ថិតនៅខាងជើងដងស្តឹងសែនចំងាយប្រមាណ២០០ម៉ែត្រប៉ុណ្ណោះទើបតែបើកសេវាបំរើភ្ញៀវបានប្រមាណ២ខែក៍កើតរឿងអាក្រក់យ៉ាងដូច្នេះតែម្ដង។ សមត្ថកិច្ចនគរបាលបាននិយាយថាហេតុការណ៍បាញ់បោះកក្រើមេឃនេះមានចំនួន២៧គ្រាប់បណ្តាលអោយបុរសចុងភៅម្នាក់ឈ្មោះដួងចិត្តភេទប្រុសអាយុ២១ឆ្នាំរងរបួសធ្ងន់ធ្ងរត្រូវគ្រាប់កាំភ្លើងអាការចំនួន៣គ្រាប់គឺត្រូវចំឆ្អឹងជំនីឆ្វេងធ្លាយទៅក្រោយ១គ្រាប់និងចំដៃឆ្វេង២គ្រាប់ត្រូវបានបញ្ចូនទៅព្យាបាលនៅមន្ទីរពេទ្យភ្នំពេញទាំងយប់។
នៅកន្លែងកើតសមត្ថកិច្ចនគរបាលក្រុងព្រះវិហាររើសប្រមូលបានវត្ថុតាងសំបកកាទូស្សថ្មីៗចំនួន២៧គ្រាប់។ សមត្ថកិច្ចបានបញ្ជាក់ថាសមត្ថកិច្ចជំនាញកំពុងធ្វើការកសាងសំណុំរឿងដើម្បីតាមស្រាវជ្រាវចាប់ខ្លួនជនល្មើសមកផ្ដន្ទាទោសតាមផ្លូវច្បាប់។គួរបញ្ចាក់ថាអសន្ដិសុខកំពុងតែតាមគំរាមកំហែងសុវត្ថិភាពនិងការរស់នៅរបស់ប្រជាពលរដ្ឋជាជនស្លូតត្រង់នៅទូទាំងខេត្តព្រះវិហារគួរដល់ពេលវេលាអាជ្ញាធរខេត្តត្រូវចាត់វិធានការណ៍ដាក់គោលដៅត្រួតពិនិត្យជនប្រើប្រាស់កាំភ្លើងខុសច្បាប់ហើយ៕
