ស្វាយរៀង៖ គ្រោះធម្មជាតិរាំងស្ងួតបាននិងកំពុងគំរាមកំហែងស្រូវរដូវវស្សានៅក្រុងស្រុកមួយចំនួនធ្វើឲ្យផ្ទៃដីកសិករជួបញ្ហាប្រឈមខ្វះទឹកស្រោចស្រប់។បើតាមការបញ្ជាក់ពីមន្ទីរកសិកម្មខេត្តបានឲ្យដឹងថា រដូវវស្សាឆ្នាំនេះខេត្តស្វាយរៀងបានជួបនូវបញ្ហាប្រឈមគ្រោះរាំងស្ងួតធ្វើឲ្យ
ប៉ះពាល់ផ្ទៃដីស្រូវរដូវវស្សាជាច្រើនពាន់ហិកតា ហើយស្រុកដែលរងផលប៉ះពាល់រាំងស្ងួតធ្ងន់ធ្ងរជាងគេគឺស្រុកស្វាយទាបតាមរបាយការណ៍ពីអាជ្ញាធរស្រុកស្វាយទាបបានបញ្ជាក់ពីទូរលេខនៃផលប៉ះពាល់គិតត្រឹមថ្ងៃទី១៨ខែសីហាឆ្នាំ២០១៤នេះគឺផ្ទៃដីស្រូវចំនួន៩៥៥៥ហិកតាទើបតែមានទឹកសើមៗនិង៤៩៥៣ហិកតាទៀតមានផលប៉ះពាល់យ៉ាងធ្ងន់ធ្ងរ ប៉ុន្តែមិនទាន់ខូចខាតទាំងស្រុងនោះទេ។ដោយជួបនូវបញ្ហាប្រឈមបែបនេះនៅព្រឹកថ្ងៃទី២០ខែសីហាឆ្នាំ២០១៤ថ្នាក់ដឹកនាំខេត្តនិងថ្មាក់ដឹកនាំមន្ទីរនានាជុំវិញខេត្តដែលពាក់ពន្ធ័បានចុះពិនិត្យនិងអន្តរាគមន៍ជាបន្ទាន់បូមទឹកដើម្បីជួយសង្គ្រោញស្រូវជូនប្រជាពលរដ្ឋភ្លាមៗនៅឃុំសម្បួស្រុកស្វាយទាបខេត្តស្វាយរៀងបានទាន់ពេលវេលាផងដែរ។លោក គឹម សាវុធ ប្រធានមន្ទីរធនធានទឹកនិងឧតុនិយមមានប្រសាសន៍ឲ្យដឹងថា នៅថ្ងៃ១៨សីហាឆ្នាំ២០១៤បានដាក់គ្រឿងចក្រធ្វើការកាយប្រឡាយមេចំនួន៣គ្រឿងនិងម៉ាសុីនបូមទឹកធន់ធំចំនួន៧គ្រឿងចុះជួយធ្វើអន្តរាគមន៍ភ្លាមៗដែរ។លោកប្រធានបានបន្តថា នៅឃុំសំបួរស្រុកស្វាយទាបនេះយើងអាចដាក់ម៉ាសុីនជួយអន្តរាគមន៍បានដោយសាមានប្រភពទឹកពីព្រែកតាដែតស្ថិតក្នុងឃុំប្រសូត្រនិងអាចដាក់ម៉ាសុីនបូមទឹកធំៗបានចំនួន២កន្លែងគឺទី១នៅភូមិទួលអង្គប់ខាងជើងគឺដាក់ម៉ាសុីនបូមទឹកធំចំនួន៣គ្រឿងអាចស្រោចស្រប់បានផ្ទៃដី៧០០ហិកតាភូមិទួលអង្គប់ខាងត្បូងម៉ាសុីនបាន២គ្រឿងអាចស្រោចស្រប់បានផ្ទៃដីចំនួន៣០០ហិកតាក្រៅពីនេះនៅសង្កាត់សង្ឃរ៍ក្រុងស្វាយរៀងដាក់ម៉ាសុីនបូមទឹក២គ្រឿងយកទឹកពីទន្លេវៃគោអាចស្រោចស្រប់ផ្ទៃដីបានចំនួន៣៥០ហិកតាទៀត។លោកអភិបាលខេត្តមានប្រសាសន៍ឲ្យមន្ទីរធនធានទឹកនិងឧតុនិយមនៅតែបន្តបូមទឹកជាប្រចាំរហូតដល់ភ្លៀងធ្លាក់ដើម្បីសង្គ្រោះស្រូវជូនប្រជាពលរដ្ឋកុំឲ្យខូចខាត៕