ខេត្តកណ្តាល៖ រណ្តៅបូមដីខ្សាច់ជ្រៅដល់ក្បាលប្រេតរបស់លោកអ៊ុក សំបុក ស្ថិតនៅភូមិថ្មី សង្កាត់ទាន ខណ្ឌដង្កោ រាជធានីភ្នំពេញ កំពុងបង្កផលប៉ះពាល់យ៉ាងធ្ងន់ធ្ងរ។ ប្រជាពលរដ្ឋបានឲ្យដឹងថា តាំងពីមានរណ្តៅបូមដីខ្សាច់មកបោះទីតាំងក្បែរលំនៅដ្ឋានរបស់ គាត់កាលណាមកតែងតែបង្កផលប៉ះពាល់ដល់ប្រជាពលរដ្ឋគ្រប់បែបយ៉ាង ធ្វើឲ្យកើតមានការព្រួយ បារម្ភជានិច្ច ពីព្រោះរណ្តៅមានជម្រៅ
រាប់សិបម៉ែត ទំហំធំល្វឹងល្វើយស្ទើរប៉ុនបឹងទន្លេ បណ្តាលឲ្យដី ស្រែនិងដីចំការក្បែរផ្ទះរបស់ប្រជាពលរដ្ឋមួយចំនួនបានបាក់ស្រុតជាបន្តបន្ទាប់ ហើយការបង្កបង្កើន ផលដាំដំណាំស្រូវលែងសូវបានផលដូចកាលពីមុនដោយទឹកហូរច្រោះចូលក្នុងរណ្តៅអស់បណ្តាលឲ្យ ដើមស្រូវស្កកស្វិតស្ទើរទាំងស្រុង ម្យ៉ាងទៀតទឹកអណ្តូងជាច្រើនកន្លែងបានរីងស្ទើរគ្មានទឹកប្រើប្រាស់ ដោយសារតែរណ្តៅបូមដីខ្សាច់មានជម្រៅជាងអណ្តូង។
ដោយឡែករថយន្តដឹកដីខ្សាច់រាប់សិបគ្រឿងរបស់លោកអ៊ុក សំបុក ផ្ទុកពោរពេញហូរ ហៀរធ្លាក់ជ្រុះពេញផ្លូវហូរទឹកកខ្វក់ ផ្ទុកលើសទម្ងន់ បង្កឲ្យផ្លូវ ជាច្រើនខ្សែខូចខាតជាបន្តបន្ទាប់ ហើយអ្នកបើកបររថយន្តសុទ្ធសឹងជាក្មេងៗ បើកមិនគោរពច្បាប់ ចរាចរជាន់លឿនដូចហោះវ៉ាគេឯង គ្មានសណ្តាប់ធ្នាប់តែងតែបង្កគ្រោះថ្នាក់ចរាចរបុកមនុស្សស្លាប់និង របួសជាញឹកញាប់ទៀតផង។
រាល់បញ្ហាខាងប្រជាពលរដ្ឋគាត់ធ្លាប់បានផ្តល់ដំណឹងទៅដល់ម្ចាស់អាជីវកម្ម និងអាជ្ញាធរមូល ដ្ឋាន ពិសេសអាជ្ញាធរខណ្ឌជាញឹកញាប់ផងដែរ ប៉ុន្តែគ្មានលទ្ធផលណាមួយឡើយ។ បើតាមការអះអាងរបស់មន្ត្រីតូចតាចបំរើការងារនៅសាលាខណ្ឌដង្កោគាត់សូមមិនឲ្យបញ្ចេញឈ្មោះបានឲ្យដឹងថារណ្តៅបូមខ្សាច់របស់លោកអ៊ុក សំបុក បានដំណើរការជាងមួយឆ្នាំមកហើយទើបតែមានច្បាប់ ថ្មីៗនេះ ទេតែងតែបង្កការរំខានប៉ះពាល់ការរស់នៅរបស់ពលរដ្ឋរហូត ធ្វើឲ្យមានការខឹងក្តៅក្រហាយពីសំណាក់ របស់ពលរដ្ឋពិតប្រាកដមែន ចំពោះអាជ្ញាធរមូលដ្ឋានវិញម្ចាស់អាជីវកម្មមិនរវល់អើពើនោះទេ ដោយ លោកអ៊ុក សំបុក រកស៊ីមានភាគហ៊ុនជាមួយអ្នកធំម្នាក់ដែលមិនសូវឮឈ្មោះនៅក្នុងកិច្ចការងារប្រទេស ជាតិនោះឡើយ។ 
មន្ត្រីខាងលើបន្តថា ការធ្វើអាជីវកម្មយ៉ាងគគ្រឹកគគ្រេងខាងលើកំពុងធ្វើឡើងផ្គើននិងបំរាម របស់សាលារាជធានីភ្នំពេញចេញលេខ១៦.ស.ជ.ណ.រ.ក ចុះថ្ងៃទី១៥ ខែកក្កដា ឆ្នាំ២០១៤ ស្តីពីការ បញ្ឈប់ការជីករណ្តៅដី រណ្តៅបូមខ្សាច់និងការចាក់ដីនៅក្នុងភូមិសាស្ត្ររាជធានីភ្នំពេញនេះ បន្ទាប់ពី មានឧប្បត្តិហេតុធ្លាក់ឧត្ថម្ភាគច្រក នៅក្នុងរណ្តៅដីដ៏ដែនជ្រៅមួយកន្លែងនៅសង្កាត់ព្រៃស ខណ្ឌដង្កោ បណ្តាលឲ្យមានមនុស្សស្លាប់និងរបួសកន្លងមកថ្មីៗនេះ។
ជុំវិញនិងបញ្ហាខាងលើកម្ពុជាថ្មីមិនអាចសុំការបំភ្លឺបន្ថែមអំពីលោកនុត ពុធដារា អភិបាលខណ្ឌ ដង្កោ បានឡើយកាលពីម្សិលមិញតាមរយៈទូរស័ព្ទដោយខលចូលហើយមិនទទួលឆ្លើយតប។ សូមបញ្ជាក់ថា នៅក្នុងទឹកដីរាជធានីភ្នំពេញតំបន់ជាយក្រុងខណ្ឌដង្កោកើតមានរណ្តៅដី រណ្តៅ បូមខ្សាច់ច្រើនជាងគេ សុទ្ធតែជីកកាយខុសបច្ចេកទេសទាំងអស់។ ប្រជាពលរដ្ឋរស់នៅសង្កាត់ទានស្នើសុំឲ្យអាជ្ញាធរពាក់ព័ន្ធថ្នាក់លើពិសេស អភិបាលរាជធានី ភ្នំពេញមេត្តាដាក់កម្លាំងចុះត្រួតពិនិត្យដើម្បីមានវិធានការបិទរណ្តៅខាងលើនេះតែម្តងទៅបើពុំដូច្នោះ ទេពលរដ្ឋប្រាកដជារងគ្រោះដោយសារការរកស៊ីរបស់ក្រុមឈ្មួញទាំងអស់នេះហើយ៕
