ខេត្តកែបៈថ្មីៗនេះ នៅសាលាខេត្តកែប មានបើកកិច្ចប្រជុំបូកសរុបលទ្ធផល ការអនុវត្ត កិច្ចព្រមព្រៀង នៃកិច្ចសហប្រតិបត្តិការក្នុងរយះពេល ០៣ ឆ្នាំ រវាងសហព័ន្ធសមាគមនារី ខេត្តគៀងយ៉ាងនៃសាធារណរដ្ឋសង្គមនិយមវៀតណាមជាមួយនឹងសមាគមនារីកម្ពុជាដើម្បីសន្តិភាព និង អភិវឌ្ឍន៍ខេត្តកែប ខេត្តកំពត នៃព្រះរាជាណាចក្រកម្ពុជា ក្នុងដំណាក់កាល ឆ្នាំ ២០១០.២០១៥ ។
កិច្ចប្រជុំនេះមានការចូលរួមពីគណៈប្រតិភូខេត្តគៀងយ៉ាង ដែលដឹកនាំដោយលោកស្រីឡឹម ឡេហា ប្រធានសហព័ន្ធសមាគមនារីខេត្ត គណៈប្រតិភូខេត្តកំពត ដឹកនាំដោយលោកស្រី យូ សុគន្ធ អភិបាលរងខេត្ត និង ជាសមាជិកសមាគមនារីកម្ពុជាដើម្បីសន្តិភាព និង អភិវឌ្ឍន៍ខេត្ត និង គណៈប្រតិភូខេត្តកែប ដឹកនាំដោយ លោកជំទាវ ជិន សុងីម សមាជិកាក្រុមប្រឹក្សាខេត្ត ជាប្រធានកិត្តិយសសមាគមនារីកម្ពុជាដើម្បីសន្តិភាព និង អភិវឌ្ឍន៍ខេត្ត និង លោកស្រី អ៊ុល ភិរុណ ប្រធាន មន្ទីរកិច្ចការនារី និង ជាប្រធានសមាគមនារីកម្ពុជាដើម្បីសន្តិភាព និង អភិវឌ្ឍន៍ខេត្ត ។
កិច្ចប្រជុំបានដំណើរការអស់រយះពេលពេញមួយព្រឹក ដោយបានតាមដានស្តាប់នូវសេចក្តី ព្រាងរបាយការណ៍បូកសរុបលទ្ធផលការអនុវត្តកិច្ចព្រមព្រៀងសហប្រតិបត្តិការ រយះពេល ០៣ឆ្នាំ រវាងសហព័ន្ធសមាគមនារីខេត្តគៀងយ៉ាង និង សមាគមនារីកម្ពុជាដើម្បីសន្តិភាព និង អភិវឌ្ឍន៍ខេត្តកែប ខេត្តកំពត អានដោយ លោកស្រី ឡេ ឡឹមហា និង សេចក្តីព្រាងទិសដៅ សកម្មភាព ពីនេះដល់ឆ្នាំ២០១៥ អានដោយ លោកស្រី អ៊ុល ភិរុណ ដែលបានឆ្លុះបញ្ចាំងពីការរីកចម្រើននៃទំនាក់ ទំនង ការទូត រវាងសមាគមនារីខេត្តទាំងបី ជាពិសេស តាមរយះការសួរសុខទុក្ខ និង ជំនួបពិភាក្សា ផ្លាស់ប្តូរបទពិសោធន៍ពីគ្នាទៅវិញទៅមក លើវិស័យសេដ្ឋកិច្ច សង្គមកិច្ច ទេសចរណ៍ វប្បធម៌ បានរួមចំណែកដ៏សំខាន់ក្នុងការពង្រឹង ពង្រីកចំណងសាមគ្គីភាព មិត្តភាព និង សហប្រតិបត្តិការ រវាងអាជ្ញាធរ ទាំងសងខាង ដើម្បីធានាបាននូវផលប្រយោជន៍រួមរបស់បណ្តាខេត្តស្រុកជាប់ព្រំដែនក្នុងការកសាងព្រំដែនសន្តិភាព ស្ថិរភាព សន្តិសុខ និង អភិវឌ្ឍន៍ ។
បន្ទាប់ពី មតិបំពេញបន្លែមលើពង្រាងរបាយការណ៍ និង ទិសដៅ ព្រមទាំង បទអន្តរាគមន៍ របស់សមាជិកា សមាគមនារីនៃខេត្តទាំងបីរួចមក អង្គប្រជុំក៏បានឯកភាព និង ធ្វើពិធីចុះហត្ថលេខា លើរបាយការណ៍ និង ទិសដៅសកម្មភាព ពីនេះដល់ឆ្នាំ២០១៥ ។ មានប្រសាសន៍សំណេះសំណាលបិទកិច្ចប្រជុំ ឯកឧត្តម កែន សត្ថា អភិបាលខេត្តកែប បានកោតសរសើរនិងវាយតម្លៃខ្ពស់ចំពោះកិច្ចសហការដឹកនាំកិច្ចប្រជុំនេះដែលបានបង្ហាញពីការខិតខំប្រឹងប្រែងអនុវត្តន៍តួនាទី ភារកិច្ច និង លក្ខន្តិកៈរបស់សមាគមនារីនៃខេត្តទាំងបី សំដៅការពារ សិទ្ធិ និង ផលប្រយោជន៍ស្របច្បាប់របស់នារី និង កុមារ និង ការលើកកំពស់តម្លៃស្ត្រីក្នុងសង្គម ។
ជាមួយនេះក៏បានបញ្ជាក់អំពីទំនាក់ទំនង កិច្ចសហប្រតិបត្តិការយ៉ាងជិតស្និទ្ធ និង ទូលំទូលាយ រវាង សមាគមនារីកម្ពុជាដើម្បីសន្តិភាពនិងអភិវឌ្ឍន៍ខេត្តកែបខេត្តកំពតនិងសហព័ន្ធសមាគមនារីខេត្តគៀងយ៉ាង ផងដែរ ។ ហើយឆ្លងតាមលទ្ធផលនៃកិច្ចប្រជុំ ជាពិសេសផ្អែកលើទិសដៅ សកម្មភាព សម្រាប់ពីនេះដល់ឆ្នាំ២០១៥ ដែលអង្គប្រជុំបានឯកភាពគ្នា ឯកឧត្តម សង្ឃឹមថា សមាគមនារីខេត្ត ទាំងបី នឹងកាន់តែបង្កើនកិច្ចសហការកាន់តែជិតស្និទ្ធ រឹងមាំ ទទួលបាននូវបទពិសោធន៍ថ្មីៗ និង លទ្ធផលកាន់តែល្អប្រសើរ ធំធេងថែមទៀត ។
ក្នុងឱកាសនោះ ឯកឧត្តម កែន សត្ថា ក៏បានជូនវត្ថុអនុស្សាវរីយ៍ដល់ថ្នាក់ដឹកនាំសហព័ន្ធ សមាគមនារីខេត្តគៀងយ៉ាង ហើយថ្នាក់ដឹកនាំសមាគមនារីខេត្តទាំងបីក៏បានជូនវត្ថុអនុស្សាវរីយ៍គ្នា ទៅវិញទៅមក ជានិមិត្តរូបនៃចំណងសាមគ្គីភាព មិត្តភាព និង កិច្ចសហប្រតិបត្តិការយូរអង្វែង ៕