កំពង់ឆ្នាំង ៖ សិក្ខាសាលាស្តីពីការផ្សព្វផ្សាយទិន្នន័យគ្រួសារក្រីក្រឆ្នាំ២០១៣ ថ្នាក់ខេត្តបានធ្វើឡើងនៅព្រឹកថៃ្ងទី០២ ខែកញ្ញា ឆ្នាំ២០១៤នៅសាលប្រជុំសាលាខេត្តកំពង់ឆ្នាំង ក្រោមអធិបតីភាពឯកឧត្តម តាន់ វេងធៀង អនុប្រធាននាយកកដ្ឋាននៃក្រសួងផែនការតំណាងដ៏ខ្ពង់ខ្ពស់
ឯកឧត្តម ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ ឯកឧត្តម ស៊ុន សុវណ្ណរិទ្ធ អភិបាលរងខេត្ត និងឯកឧត្តម ឡុង ឈុនឡៃសមាជិកក្រុមប្រឹក្សាខេត្តកំពង់ឆ្នាំង។ក្នុងពិធីនោះដែរមាន លោក ឌិម ឌន ប្រធានមន្ទីរផែនការខេត្ត លោកលោកស្រី ប្រធានមន្ទីរអង្គភាពជុំវិញខេត្ត លោកអភិបាលក្រុង.ស្រុក និងមន្ត្រីការិយាល័យចំណុះអោយមន្ទីរផែនការខេត្ត ជាច្រើនរូបទៀត ។
មានប្រសាសន៍ក្នុងឱកាសនោះ ឯកឧត្តម ស៊ុន សុវណ្ណរិទ្ធ បានលើកឡើងពីគោលបំណងនៃអង្គសិក្ខាសាលាថា៖គឺដើម្បីផ្តល់ឱកាសអោយអង្គការ/ស្ថាប័នអ្នកផ្តល់សេវានានា និងអ្នកពាក់ព័ន្ធទាំងអស់ទទួលព័ត៌មានស្តីពីប្រភពទិន្នន័យ និងការបែងចែកទិន្នន័យគ្រួសារក្រីក្រ ព្រមទាំងអត្រានៃភាពក្រីក្រតាមតំបន់។លើកទឹកចិត្តដល់អ្នកពាក់ព័ន្ធទាំងអស់ប្រើប្រាស់បញ្ជីរគ្រួសារ ដើម្បីផ្តល់សេវានិងអភិវឌ្ឍន៍សហគមន៍ក្រីក្រ និងគ្រួសារក្រីក្រអោយមានប្រសិទ្ធភាពខ្ពស់ហើយចំគោលដៅ។បំផុសអោយមានការផ្សព្វផ្សាយបន្តរាល់អ្នកពាក់ព័ន្ធទាំងអស់និងក្រុមប្រឹក្សាឃុំ ប្រើប្រាស់ទិន្នន័យក្រីក្រនិងតារាងប្រៀបធៀបអត្រាក្រីក្រដើម្បីរៀបចំផែនការនិងផ្តល់សេវាជូន។ពង្រឹងអោយមានការទទួលស្គាល់ទិន្នន័យគ្រួសារក្រីក្រសំរាប់កំណត់គោលដៅអាទិភាពផែនការអភិវឌ្ឍន៍ផ្តល់សេវាដល់សហគមន៍និងគ្រួសារក្រីក្រជាក់ស្តែង។
មានប្រសាសន៍បើកអង្គសិក្ខាសាលា ឯកឧត្តម តាន់ វេងធៀង បានថ្លែងថា៖រាជរដ្ឋាភិបាលបានដាក់ចេញនិងអនុវត្តនូវគោលនយោបាយកំណែទំរង់លើគ្រប់វិស័យក្នុងការអនុវត្តយុទ្ធសាស្ត្រចតុកោណដំណាក់កាលទី៣ ដើម្បីកំណើនការងារ សមធម៌ និង ប្រសិទ្ធភាពនៅកម្ពុជា ឈានទៅសម្រេចអោយបាននូវការអភិវឌ្ឍន៍ប្រកបដោយចីរភាព និងកាត់បន្ថយភាពក្រីក្ររបស់ប្រជាជនយើង។ឯកឧត្តមបានបន្តថា ក្រសួងផែនការជាសេនាធិការរៀបចំផែនការយុទ្ធសាស្ត្រអភិវឌ្ឍន៍ជាតិដែលជាផែនការសេដ្ឋកិច្ច រយៈពេលមធ្យមឆ្នាំ២០០៦.២០១០ផែនការយុទ្ធសាស្ត្រអភិវឌ្ឍន៍ជាតិបច្ចុប្បន្នកម្មឆ្នាំ២០០៩.២០១៣ហើយបច្ចុប្បន្នគឺផែនការយុទ្ធសាស្ត្រអភិវឌ្ឍន៍ជាតិឆ្នាំ២០១៤.២០១៨។
នៅចុងបញ្ចប់ឯកឧត្តមតាន់ វេងធៀងក៏បានផ្តាំផ្ញើ ដល់មន្ទីរអង្គភាពជុំវិញខេត្ត មន្ទីរពេទ្យបង្អែកស្រុកប្រតិបត្តិ បណ្តាអង្គការនិងអ្នកពាក់ព័ន្ធផ្សេងៗទៀតដែលជាប្រតិបត្តិករ ផ្តល់សេវាឬជំនួយដល់សេវាក្រីក្រផ្ទាល់ សូមប្រើទិន្នន័យគ្រួសារក្រីក្របញ្ជីរគ្រួសារក្រីក្រចុងក្រោយ សំរាប់ធ្វើជាមូលដ្ឋានក្នុងការជ្រើសរើសតំបន់និងគ្រួសារ គោលដៅសំខាន់ នៃអង្គសិក្ខាសាលាថ្ងៃនេះ គឺដើម្បីផ្តល់សេវានិងជំនួយជូនសហគមន៍ក្រីក្រ និងគ្រួសារក្រីក្រ ជាក់ស្តែងអោយចំគោលដៅនិងតម្រូវការរបស់ពួកគាត់៕