កំពង់ចាម: ឯកឧត្តម អ៊ុន ចាន់ដា អភិបាលខេត្តកំពង់ចាម បានអំពាវនាវដល់បងប្អូនប្រជាពលរដ្ឋឲ្យរួមគ្នាថែរក្សាសុខសន្តិភាពទាំងអស់គ្នា ដើម្បីបន្តធ្វើ
ការអភិវឌ្ឍន៍ប្រទេសជាតិយើង ឲ្យកាន់តែមានការរីកចម្រើនលើគ្រប់វិស័យ សម្បូរ សប្បាយរុងរឿងបន្តទៅទៀត ការថ្លែងបែបនេះក្នុងពិធីសម្ភោធដាក់ឲ្យប្រើប្រាស់សមិទ្ធផលនានា ក្នុងវត្តឥន្ទកោសី ហៅវត្តកោះជ្រូក ស្ថិតក្នុងភូមិទី១៣ ឃុំកោះសំរោង ស្រុកកំពង់សៀម នាព្រឹកថ្ងៃទី២៣ ខែមេសា ឆ្នាំ២០២២ ។
ក្នុងឱកាសនោះដែរ ឯកឧត្តម អ៊ុន ចាន់ដា អភិបាលខេត្តកំពង់ចាម បានថ្លែងថា ក្រោមការដឹកនាំដ៏ត្រឹមត្រូវរបស់សម្ដេចអគ្គមហាសេនាបតី តេជោ ហ៊ុន សែន ជានាយករដ្ឋមន្ត្រី បាននាំមកនូវសុខសន្តិភាពជូនប្រទេសជាតិ នឹងធ្វើឲ្យមានការអភិវឌ្ឍលើគ្រប់វិស័យ ទាំងវិស័យអាណាចក្រ និងវិស័យពុទ្ធចក្រ ។ ជាក់ស្ដែងនៅក្នុងថ្ងៃនេះ សមិទ្ធផលដែលសាងសង់រួច ក្នុងទីអារាមឥន្ទកោសី ហៅវត្តកោះជ្រូក ដែលមានតម្លៃប្រមាណជា ៥៣ ម៉ឺនដុល្លារអាមេរិច ត្រូវបានសម្ពោធដាក់ឲ្យប្រើប្រាស់ជាផ្លូវការ ។
ឯកឧត្តម អភិបាលខេត្ត បានបញ្ជាក់ថា សមិទ្ធផលខាងលើនោះ គឺផ្ដើមចេញដោយកត្តាប្រទេសជាតិមានសុខសន្តិភាព ធ្វើឱ្យប្រជាពលរដ្ឋយើងមានឱកាសគ្រប់គ្រាន់ ក្នុងការរកទទួលទានមានបាន មានជីវភាពធូរធារ ទើបធ្វើឱ្យមានថវិកាដើម្បីចូលរួមជាបច្ច័យ ដោយសទ្ធាជ្រះថ្លា យកមកកសាងសមិទ្ធផលទាំងឡាយដូចជាការចាក់ដីក្នុងទីធ្លាវត្ត , ជួសជុលព្រះវិហារ, កសាងឈាបនដ្ឋាន , កសាងដងទង់ និងឧប្បដ្ឋានសាលា ។ល។ដែលមានតម្លៃរហូតដល់ទៅជាង ៥០ម៉ឺនដុល្លារអាមេរិកដូចពេលនេះ ។
ជាមួយគ្នានោះ ឯកឧត្តម អ៊ុន ចាន់ដា អភិបាលខេត្តកំពង់ចាម បានសង្កត់ធ្ងន់ថា ដោយសារកត្តាសុខសន្តិភាព ទើបធ្វើឲ្យប្រទេសជាតិយើងមានការរីកចម្រើនទន្ទឹមគ្នា ទាំងវិស័យពុទ្ធចក្រ និងវិស័យអាណាចក្រ ៕
