ខេត្តកំពង់ធំ : កម្លាំងសមត្ថកិច្ចស្រុកប្រាសាទសំបូរ ខេត្តកំពង់ធំ ប្រដេញស្ទាក់ចាប់បានរថយន្តកាមរីបាឡែន ១គ្រឿង ដែលគេដឹងថា រថយន្តនេះបានដឹកឈើចេញពីខេត្តព្រះវិហារ ចូលមកក្នុងខេត្តកំពង់ធំ ហើយបានព្យាយាមបើកគេចចេញពីសមត្ថកិច្ច ប៉ុន្តែ រថយន្តដឹកឈើ ១គ្រឿងនេះត្រូវបានបង្ក្រាបចាប់បាននៅក្នុងប្រឡាយទឹក។
ហេតុការណ៍នេះ បានកើតឡើង នៅវេលាម៉ោង ៩ យប់ ថ្ងៃទី៣០ ខែមិថុនា ឆ្នាំ២០២២ ត្រង់ចំណុចផ្លូវបំបែកជាបី ស្ថិតនៅក្នុងភូមិប្រាសាទសំបូរ ឃុំប្រាសាទសំបូរ ស្រុកប្រាសាទសំបូរ ខេត្តកំពង់ធំ។
មន្ត្រីនៅក្នុងការបង្ក្រាប បានឲ្យដឹងថា ប្រតិបត្តិការបង្ក្រាបរថយន្តដឹកឈើ ១គ្រឿងនេះ បានដឹកនាំបញ្ជាដោយ លោក ឃុន ប៊ុនហូ មេបញ្ជាការរង កងរាជអាវុធហត្ថខេត្តកំពង់ធំ ដោយមានការសម្របសម្រួល ពីព្រះរាជអាជ្ញា អមសាលាដំបូង ខេត្តកំពង់ធំ រហូតឈានដល់ការស្ទូចរថយន្ត យកមករក្សាទុក នៅបញ្ជាការដ្ឋានកងរាជអាវុធហត្ថខេត្តកំពង់ធំ។
មន្ត្រីដដែលបានឲ្យដឹងទៀតថា ការបង្ក្រាបរថយន្តដឹក១គ្រឿងនេះ បានធ្វើឡើងក្រោមកិច្ចសហការ រវាងកម្លាំងអាវុធហត្ថស្រុកប្រាសាទសំបូរ និងកងរាជអាវុធហត្ថស្រុកប្រាសាទបល្ល័ង្ក ដែលដឹកឈើប្រណិត ចេញពីខេត្តព្រះវិហារ ចូលមកខេត្តកំពង់ធំ ហើយរថយន្តនោះ បានបើកគេចចេញពីសមត្ថកិច្ច តតែរថយន្តនេះបានធ្លាក់ចូលក្នុងប្រឡាយទឹក ចំណែក តៃកុងរថយន្ត បានរត់គេចបាត់ស្រមោល ។
មន្ត្រីដដែលបានបញ្ជាក់ថា រថយន្តដែលរងការបង្ក្រាបនោះ ប្រភេទតូយ៉ូតា កាមរីបាឡែនន ពណ៌ខ្មៅ ពាកស្លាកលេខ ភ្នំពេញ 2H-3749។
ក្រោយការបង្ក្រាប រថយន្តនេះត្រូវបានបញ្ជូនមកកាន់ បញ្ជាការកងរាជអាវុធហត្ថខេត្តកំពង់ធំ ដើម្បីធ្វើការស្រាវជ្រាវរកម្ចាស់ដែលឈើនោះ មកចាត់ការតាតតាតាច្បាប់៕
