ភ្នំពេញ ៖ រថយន្តមួយគ្រឿងម៉ាកតូយ៉ូតា ព្រូសដែលបើកដោយនារីរូបស្រស់ម្នាក់បានបើកទៅបុករះរនាំងដែកចែកទ្រូងផ្លូវបណ្តាលឲ្យទ្រេត៤ផ្ទាំងហើយ រថយន្តបង្កដាច់កាឡេកង់មុខទៅមុខលែងរួច កាលពីវេលាម៉ោង៨និង៥០នាទី យប់ ថ្ងៃទី ១៦ ខែកញ្ញា ឆ្នាំ២០១៤ នៅតាមបណ្តោយមហាវិថី
សហព័ន្ធរុស្ស៊ីស្ថិតក្នុងសង្កាត់ដេប៉ូ៣ ខណ្ឌទួលគោក។
ប្រភពព័ត៌មានពីកន្លែងកើតហេតុបានឱ្យដឹងថានៅមុនពេលកើតហេតុគេឃើញរថយន្ត តូយ៉ូតា ព្រូស មួយគ្រឿងពណ៌សគ្មានស្លាកលេខដែលបើកបរដោយនារីរូបស្រស់ម្នាក់និងរួមដំណើរ ជាមួយនារីម្នាក់ទៀតបានធ្វើដំណើរតាមបណ្តោយតាមមហាវិថីសហព័ន្ធរុស្ស៊ីក្នុងទិសដៅពីកើតទៅលិច មកដល់ចំណុចកើតហេតុក៏បានរេចង្កូតទៅបុករះរនាំងដែកពុះចែកទ្រូងផ្លូវយ៉ាងពេញទំហឹង បណ្តាលឲ្យបាក់អស់ចំនួន៤ផ្ទាំងរួចរថយន្ត បង្កដាច់កាឡេកង់មុខគាប់ជាប់ទៅមុខលែងរួច។បន្ទាប់ពីកើតហេតុម្ចាស់ រថយន្តដែលជានារីស្រស់ពីរខាងលើនេះត្រូវរថយន្តកាមរីពណ៌ខ្មៅ មួយមករំដោះយកចេញពីកន្លែងហេតុទៅបាត់តែម្តង។
ក្រោយពេលកើតសមត្ថកិច្ចបានចុះវាស់វែង រថយន្តបង្កហេតុនេះ ទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីដោះស្រាយទៅតាមផ្លូវច្បាប់ ៕
