បន្ទាយមានជ័យ៖ ស្ថានភាពរវាងព្រំដែនកម្ពុជាថៃនៅចំណុចបង្គោលខណ្ឌ័សីមាលេខ៤៣ស្ថិតក្នុងភូមិសាស្ត្រឃុំអូរបីជាន់ស្រុកអូរជ្រៅខេត្តបន្ទាយមានជ័យ បានកំពុងតែមានសភាពតានតឹងដោយភាគីថៃបានឈ្លានពានមកលើដែនអធិប្បតេយ្យរបស់កម្ពុជាកាលពីថ្ងៃទី២៨ខែកុម្ភឆ្នាំ២០១៤កន្លងទៅនេះ ។
លោក សូចាន់ណារី មេបញ្ជាការនគរបាលការពារព្រំដែនគោកវរសេនាតូចលេខ៩១១ បានឲ្យដឹងកាលពីថ្ងៃទី០២មិនាឆ្នាំ២០១៤នេះថា៖ ចំណុចព្រំដែនដែលរងការរំលោភពីភាគីថៃនោះគឺកន្លងមកយើងបានដោះស្រាយចប់ម្តងជាពីរដងរួចមកហើយលោកថាដីចំណុចត្រង់បង្គោលខណ្ឌ័សីមាលេខ៤៣នេះគឺជាដីដែលគ្រប់គ្រងដោយភាគីកម្ពុជា ព្រោះជាដីដែលនៅចម្ងាយពីបង្គោលខណ្ឌ័សីមាព្រំដែនរវាងប្រទេសទាំងពីរប្រមាណជា២០០ម៉ែត្រ ។
មន្ត្រីដដែលបានឲ្យដឹងទៀតថា៖មកទល់និងថ្ងៃទី០២ខែមិនាឆ្នាំ២០១៤នេះ ភាគីទាំងពីរបានឯកភាពគ្នាឲ្យក្រុម របស់លោក សំផាន់ណារិទ្ធ ផ្អាក់ការដំណើរការអភិវឌ្ឍន៏ចំណុចដីដែលមានទំនាស់វាងកម្ពុជានិងថៃមួយរយសិនដើម្បីឲ្យគណកម្មការព្រំដែនរវាងប្រទេសទាំងពីរចុះមកពិនិត្យនិងវាយតំលៃ។
ចំណែក លោក ខេង ស៊ុម ស្នងការនគរបាលខេត្តបន្ទាយមានជ័យបានឲ្យដឹងថា៖បញ្ហាគឺដោយសារតែភាគីខាងក្រុមហ៊ុនរបស់លោកសំផាន់ណារិទ្ធមិនបានសហការជាមួយមន្ត្រីជំនាញទើបជាកត្តាបង្កឲ្យមានទំនាស់នេះកើតឡើង ជាថ្មី ។ដោយឡែក លោក ឳម ចន្ថា នាយករដ្ឋបាលសាលាខេត្តបន្ទាយមានជ័យបានឲ្យដឹងថា៖ដីទំនាស់រវាងកម្ពុជានិងថៃត្រង់ចំណុចបង្គោលខណ្ឌ័សីមាលេខ៤៣នោះគឺមានប្រវត្តិដើម ជាដីដែលប្រជាកសិករខ្មែរនិងថៃបានធើ្វស្រែតមកទាហានកងពលតូចស្មើជើងលេខ៥១ខាងកម្ពុជាបានទាមទារមកគ្រប់គ្រងដោយយល់ឃើញថា៖ដីនោះជាដីដែលស្ថិតក្នុងអធិបតេយ្យភាពរបស់ភាគីកម្ពុជា។
ឳម ចន្ថា បានបន្តទៀតថា៖នៅឆ្នាំ២០១៣កន្លងទៅនេះក្រុមហ៊ុន លោក សំផាន់ណារិទ្ធបានស្នើសុំរាជរដ្ឋាភិបាលបើកច្រកតំបន់សេដ្ឋកិច្ចមានឈ្មោះថា៖ច្រក៤៣ លោកថាកន្លងមកមិនមានបញ្ហាអី្វកើតឡើងទេ ។ បើទោះជាមិនមានការអះអាងពីមន្ត្រីសាលាខេត្តបន្ទាយមានជ័យឮពាក់ពន្ធ័និងបញ្ហាទំនាស់ព្រំដែនរវាងប្រទេសកម្ពុជានិងថៃក៏ដោយក៏មជ្ឈដ្ឋានប្រជាពលរដ្ឋបានឲ្យដឹងថា៖ច្រក៤៣ដែលបើកដោយលោក សំផាន់ណារិទ្ធនោះ បានបិទមិនដំណើរការប្រមាណជា៣ថ្ងៃមកហើយ ពួកគេថាទំនងជាមានទំនាស់ពាក់ពន្ធ័និងបញ្ហាព្រំដែនរវាងប្រទេសទាំងពីរទើបបានជាមានការបិទច្រក ។ចំណែក លោក សំផាន់ណារិទ្ធ មិនអាចសុំការបំភ្លឺបានទេនៅថ្ងៃទី០២មិនាឆ្នាំ២០១៤នេះ ។
