ខេត្តកំពង់ឆ្នាំង៖ ស្ត្រីៗញៀនល្បែងស៊ីសងចំនួន៣នាក់ត្រូវបានសមត្ថកិច្ចនគរបាល ក្រុង
កំពង់ឆ្នាំងសហការជាមួយនគរបាលខេត្តកំពង់ឆ្នាំងធ្វើការចាប់ខ្លួនបញ្ជូនមក ស្នងការដ្ឋាន នគរបាលខេត្ត នៅពេលពួកគេកំពុងលេងល្បែងស៊ីសង។ការបង្ក្រាបវង់ល្បែងខាងលើ នេះបានធ្វើឡើងនៅវេលាម៉ោង៤និង១០នាទីរសៀល ថ្ងៃទី០៩ ខែតុលា ឆ្នាំ២០១៤ នៅក្នុង ភូមិត្រពាំងចិក្សា សង្កាត់កំពង់ឆ្នាំង ក្រុងកំពង់ឆ្នាំង។
លោក ប៉ុល វុទ្ធី ស្នងការរងនគរបាលខេត្ត ទទួលបន្ទុកប្រធានការិយាល័យ កណ្តាលយុត្តិធម៌បានអោយដឹងថា៖ស្ត្រីទាំងបីនាក់ដែលើបានចាប់ខ្លួននោះមាន១.ឈ្មោះ នួន ប៊នអាយុ៤៧ឆ្នាំ ជាម្ចាស់ផ្ទះដែល ផ្តល់ទីតាំងខាងលើអោយ អ្នកលេងល្បែង ស៊ីសងជារៀងរាល់ថ្ងៃ ,ទី២ឈ្មោះ ញឹម អូន អាយុ៦០ឆ្នាំ ជាអ្នកលេងបៀ,និងទី៣ឈ្មោះ យឹម បុណ្យ អាយុ៤០ឆ្នាំ ជាអ្នកលេងបៀរ ចំណែកបក្សពួកលេងជាមួយគ្នាចំនួន២នាក់ ផ្សេងទៀតបានរត់គេចខ្លួនអស់នៅពេលសមត្ថកិច្ចនគរបាលចំរុះចុះទៅបង្ក្រាប។
ក្រោយពេលបង្ក្រាបសមត្ថកិច្ចដកហូតបានវត្ថុតាងរួមមាន៖បៀនីឡុងចំនួន៣ហ៊ូ,ទូរ ស័ព្ទដៃមួយគ្រឿង,កាបូបពណ៌មួយនិងប្រាក់ចំនួនសរុបចំនួន៤៩២០០រៀល។អ្នកប្រព្រឹត្តល្បែងស៊ីសងទាំង៣នាក់ខាងលើនេះ មិនទាន់ដឹងថា ត្រូវបានសមត្ថកិច្ចកសាងសំណុំ
រឿងបញ្ជូនទៅតុលាការខេត្ត ឬគ្រាន់តែអប់រំណែនាំនិងធ្វើកិច្ចសន្យាបែបណានោះទេ នៅព្រឹកថ្ងៃទី ១០ខែ តុលានេះ ព្រោះសមត្ថកិច្ចនិយាយថាចាំឆ្លងយោបល់លោកស្នងការ និងលោកព្រះរាជអាជ្ញាខេត្តសិន។
គួរបញ្ជាក់ថា៖ប៉ុន្មានថ្ងៃកន្លងទៅនេះគេឃើញសមត្ថកិច្ចបានប្រឹងប្រែងក្នុងការបង្ក្រាបល្បែងស៊ីសងជាច្រើនកន្លែងផងដែរ តែមានគេខ្សឹបថានៅមានកន្លែងលេងល្បែង ធំៗ ក្នុងក្រុងកំពង់ឆ្នាំង២ទៅ៣កន្លែងទៀតសមត្ថកិច្ចមិនទាន់ឃើញបង្ក្រាបនៅឡើយទេ៕
