ខេត្តក្រចេះ៖ មេព្រៃសង្កាត់រដ្ឋបាលព្រៃឈើថ្មរគ្រែ កាលពីរសៀលថ្ងៃទី១៤ ខែតុលា ឆ្នាំ២០១៤ បានធ្វើការចាប់រឹបអូសឈើប្រណីតប្រវែង២ម៉ែត្រជិត៣០កំណាត់ ស្មើនិងជិត៣ម៉ែត្រគូប នៅស្ថិតនៅចំណុចភូមិក្បាលជួរ ឃុំសំបុក ស្រុកចិត្របុរី ខេត្តក្រចេះ យកទៅរក្សាទុកនៅថ្នាលបណ្តុះកូនឈើ
ខ្សា ដើម្បីបន្តរចាត់ការតាមនិតិវិធីច្បាប់ ។
គួរបញ្ជាក់ថា ឈើប្រណិតនៅសល់ប្រមាណជិត៣០កំណាត់នោះ ត្រូវបានសមត្ថកិច្ចបង្ក្រាប បាន ខណៈដែលក្រុមឈ្មួញ បានទម្លាក់ចេញទូក ត្រៀមដឹកបន្ត តាមរថយន្ត ឆ្ពោះទៅលក់នៅ ស្រុកដំបែរ ក្នុងទឹកដីខេត្តត្បូងឃ្មុំ យកទៅលក់ឲ្យមេឈ្មួញ ឈ្មោះ ឆាយ ជ្រាយ ដែលកំពុងតែបើកទ្វារ ឃ្លាំងចាំប្រមូលទិញឈើប្រណីតខុសច្បាប់យ៉ាង អនាធិបតេយ្យ នេះក៏ដោយសារតែមន្ត្រីជំនាញរដ្ឋបាលព្រៃឈើ បើកភ្លើងខៀវ ជាមួយគ្នានេះក្រុមឈ្មួញដទៃទៀតក៏កំពុងសម្រុកដឹកឈើចេញពីខេត្តក្រចេះសំដៅទៅទីនោះដូចគេហែកឋិនភាគ ទាំងយប់ទាំងថ្ងៃ ។
សកម្មភាពនៃការដឹកជញ្ចូន ឈើប្រណីតចេញពីខេត្តក្រចេះទៅកាន់ស្រុកដំបែរ គេសង្កេត ឃើញក្រុមឈ្មួញក្នុងខេត្តក្រចេះ បាននិងកំពុងធ្វើសម្មភាពដឹកជញ្ជូន តាមរថយន្តសេរីទំនើបៗ ទាំងថ្ងៃទាំងយប់ ដោយពុំមានការទប់ស្កាត់ពីសំណាក់ មន្ត្រីជំនាញ ឬសមត្ថកិច្ចពាក់ព័ន្ធនោះឡើយ។
ហើយការចរាចរដឹកជញ្ជូនឈើត្រូវបានគេដឹងថា លោក ឆាយ ជ្រាយ ជាអ្នកបានចេញមុខ មកចរចារត់ការជាមួយសមត្ថកិច្ចតាមផ្លូវ ដោយប្រើប្រាស់ទឹកប្រាក់ដាក់មន្ត្រីមួយចំនួនឲ្យជួយបិទភ្នែក និងបើកផ្លូវឲ្យក្រុមឈ្មួញ បន្តរធ្វើដឹកឈើជញ្ជូនចេញពីខេត្តក្រចេះទៅ កាន់ស្រុកដំបែរដើម្បីពួកគេបានទទួលទិញឲ្យរលូន។
ការប្រមូលទិញឈើរបស់ឈ្មួញឈ្មោះ ឆាយ ជ្រាយ និងឈ្មោះប៉េង គី បានធ្វើឲ្យឈ្មួញរកស៊ីដឹកជញ្ជូនឈើប្រណីត ចេញពីទឹកដីស្រុកសំបូរ ខេត្តក្រចេះ ឆ្ពោះទៅស្រុកដំបែរបច្ចុប្បន្ននេះបានកំពុង ដំណើរការទៅដោយរលូន ហើយសព្វប៉ុន្មានថ្ងៃនេះ ការដឹកជញ្ជូនឈើរបស់ក្រុមឈ្មួញ គឺបានប្រើប្រាស់គ្រប់មធ្យោបាយ និងគ្រប់រូបភាពដែលបានកំរើកឡើងវិញខុសប្រក្រតីទៅកាន់ឃ្លាំងមេឈ្មួញ ឈ្មោះ ឆាយ ជ្រាយ ប្រការនេះបានធ្វើឲ្យគេមើលឃើញថាសមត្ថកិច្ចជំនាញកំពុងតែអនុវត្តផ្ទុយពីច្បាប់ ៕
