បាត់ដំបង: យុវជនពីរនាក់ដែលត្រូវជាបងប្អូនថ្លៃនឹងគ្នាបានរងរបួសយ៉ាងធ្ងន់ធ្ងរខណ:ដែលចេញពីកន្លែងផឹកសុីកាលពីវេលាម៉ោង 9-20 នាទីយប់ថ្ងៃទី15-10-14 ហើយបានបោះពួយម៉ូតូយ៉ាងលឿនទៅព្រលះនឹងរង្វង់មូលនាងគង្ហីង ត្រង់ចំនុចភូមិបាល្ល័ង្គ សង្កាត់វត្តគរ ក្រុងបាត់ដំបង
ខេត្តបាត់ដំបង បណ្តាលអោយម្នាក់បាក់ជើងម្ខាង និងម្នាក់ទៀតបែកក្បាលជង្គង់ម្ខាងដូចគ្នា. ។
បើតាមសំដីរបស់អ្នករត់ម៉ូតូឌុបដែលបានឃើញហេតុការនេះបាននិយាយថា ដំបូង
ពួកគេបានឃើញមានម៉ូតូមួយគ្រឿងម៉ាក Dream ស៊ែរី013 ព៌ណខ្មៅពាក់ស្លាកលេខ បាត់ដំបង1M 8374 ជិះគ្នាពីរនាក់បានបើកបរយ៉ាងលឿនតាមបណ្តោយផ្លូវជាតិលេខ57 ក្នុងទិសដៅពីកើតទៅលិច. ។
លុះទៅដល់ចំនុចកើតហេតុដែលមានរង្វង់មូលយ៉ាងធំនៅពីមុខនោះ ស្រាប់តែអ្នកទាំងពីរខំប្រឹងបួងចង្កូតឆ្វែលបានតែបន្តិចប៉ុណ្ណោះហើយក៏បានបុកទៅនឹងខឿនរង្វង់មូលនោះយ៉ាងពេញទំហុឹងបណ្តាលអោយអ្នកទាំងពីរហោះផ្លោងទៅបោកនឹងខឿនដួលដេកស្រែកថ្ងូរពេញផ្លូវ. ។
នៅក្នុងខណ:នោះក៏មានប្រជាពលរដ្ឋបាននាំគ្នាចេញមកជួយគ្រាហ៍ជនរងគ្រោះទាំងពីរទៅដាក់អោយអង្គុយផ្អែកនឹងរង្វង់មូលដើម្បីហៅសមត្ថកិច្ចអោយមកជួយសង្គ្រោះ ដោយនៅពេលនោះដែរក៏មានអ្នកស្គាល់មួយចំនួនបាននិយាយថា អ្នកបើកបរម៉ូតូនោះមានឈ្មោះ ឡាំ អាយុប្រហែលជាង 30 ឆ្នាំរស់នៅភូមិបាល្ល័ង្គ សង្កាត់វត្តគរ និងត្រូវជាកូនប្រសាររបស់លោកមេភូមិបាល្ល័ង្គតែម្តងដោយម្នាក់នេះបានបាក់ជើងឆ្វេងម្ខាង ចំណែកអ្នកដែលជិះខាងក្រោយមានឈ្មោះ ខ្លី អាយុប្រហែលជាង 20 ឆ្នាំរងរបួសបែកក្បាលជង្គង់ខាងឆ្វេង នឹងត្រូវជាកូនបង្កើតរបស់លោកមេភូមិបាល្ល័ង្គដែរ. ។
បើតាមប្រភពមួយផ្សេងទៀតបានអោយដឹងថា អ្នកទាំងពីរមានការងារជាជាងសំណង់ប៉ុន្តែពេលដែលគេចេញពីធ្វើការក៏ឆ្លៀតចូលទៅផឹកសុីនៅក្នុងអាហារដ្ឋានទីក្រុងអាន់ឆ័រ1 សិនលុះនៅពេលគ្រប់គ្រាន់ហើយពួកគេក៏បានចេញដំណើរប្រញ៉ាប់ប្រញ៉ាល់ដើម្បីត្រឡប់ទៅផ្ទះទីបំផុតក៏បានទៅបុកនឹងរង្វង់មូលនាងគង្ហីងតែម្តង. ។ក្រោយពេលកើតហេតុភ្លាមៗកំលាំងនគរបាលចរាចរបានមកដឹកជនរងគ្រោះទាំងពីរបញ្ជូនយ៉ាងបន្ទាន់ទៅមន្ទីរពេទ្យដើម្បីសង្គ្រោះព្រោះជនរងគ្រោះមានឈាមហូរច្រើនពេកចំណែកមធ្យោបាយធ្វើដំណើរសមត្ថកិច្ចបានយកទៅរក្សាទុកជាបណ្តោះអាសន្ននៅការិយាល័ចរាចរផ្លូវគោក៕
