គ្រូបង្វឹកក្លិបសេះបង្កង់ Juventus លោក Massimiliano Allegri (ម៉ាស៊ីមីលីយ៉ាណូ អាឡេគ្រី) បានបង្ហើបថា លោកនឹងមកដឹកនាំនៅក្នុងប្រទេសអង់គ្លេសនាពេលអនាគតព្រោះលោកជឿជាក់ថា បាល់ទាត់នៅអង់គ្លេសគឺមានការប្រកួតប្រជែងគ្នាខ្លាំងជាងនៅអ៊ីតាលី ។
បុរសវ័យ៤៧ឆ្នាំរូបនេះត្រូវបានក្លិប AC Milan បញ្ចប់ការងារកាលពីរដូវកាលមុនហើយលោកបានមកដឹកនាំ Juventus នៅរដូវក្តៅនេះក្រោយពេលលោក Antonio Conte (អាន់តូនីញ៉ូ កុងតេ) ផ្លាស់ទៅដឹកនាំ ក្រុមជម្រើសជាតិ អ៊ីតាលី ។
លោក អាឡេគ្រី (Allegri) ប្រាប់ BBC Sport ថា “ខ្ញុំរំពឹងថា ថ្ងៃណាមួយខ្ញុំនឹងមានឱកាសទៅដឹកនាំក្រុមបាល់ទាត់នៅក្នុងប្រទេសអង់គ្លេស ទីនោះមានការទាក់ទាញហើយខ្ញុំពេញចិត្តចំពោះគ្រប់យ៉ាងនៅទីនោះ” ។
គួរបញ្ជាក់ថា លោក Allegri បានដឹកនាំ AC Milan ឲ្យលើកពាន Serie A នៅក្នុងរដូវកាល 2010-2011 ក្រោយពេលលោកទទួលបានជោគជ័យជាមួយក្លិប Cagliari (កាលៀរី) ៕
