កំពង់ចាម: ឯកឧត្តមឧត្តមសេនីយ៍ឯក ហ៊ុន ម៉ានិត មេបញ្ជាការរង នៃបញ្ជាការដ្ឋានកងទ័ពជើងគោក និងជាអគ្គនាយក នៃអគ្គនាយកដ្ឋានស្រាវជ្រាវចារកិច្ច នៃក្រសួងការពារជាតិ បានអំពាវនាវទៅដល់ លោកអភិបាលស្រុក មេឃុំ មេប៉ុស្តិ៍ អនុភូមិ និងបងប្អូនប្រជាពលរដ្ឋនៅទូទាំងស្រុកចំការលើ ឱ្យ រួមគ្នាលុបបំបាត់ល្បែងស៊ីសង
ខុសច្បាប់ និង បទល្មើស គ្រឿងញៀន ដើម្បីកសាងសង្គម ឱ្យ មានសណ្នាប់ធ្នាប់ និងមាន សុភមង្គលក្នុងគ្រួសារ។ ឯកឧត្តម ថ្លែងបែបនេះនាឱកាស សម្ភោធឆ្លងសមិទ្ធផលនានា ក្នុងវត្តវង្សគត់បូរីសេរីភ្នំពេញ (ហៅវត្តសេរីភ្នំពេញថ្មី) ស្ថិតនៅភូមិដូនបុស ឃុំចំការអណ្តូង ស្រុកចំការលើ ខេត្តកំពង់ចាម នាព្រឹកថ្ងៃទី ១១ ខែមិនា ឆ្នាំ ២០២៤ ។
ថ្លែង ក្នុង ឱកាស នោះ ឯកឧត្តមឧត្តមសេនីយ៍ឯក ហ៊ុន ម៉ានិត បានលើកឡើងថា ដើម្បីឆ្លើយតបទៅនិងវិធានការប្រយុទ្ធប្រឆាំងល្បែងស៊ីសងខុសច្បាប់ និងគ្រឿងញៀន ដែលស្ថិតក្នុងយុទ្ធសាស្ត្របញ្ចកោណ ជាកម្មវិធីនយោបាយរបស់ប្រមុខរាជរដ្ឋាភិបាលដែលដឹកនាំដោយ សម្តេចបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជណាចក្រកម្ពុជា គឺគ្នានការលេងល្បែងស៊ីសងខុសច្បាប់ក្នុងមូលដ្ឋាន និងគ្នានការប្រើប្រាស់គ្រឿងញៀនក្នុងសហគមន៍ជាដាច់ខាត់។
ឯកឧត្តមឧត្តមសេនីយ៍ឯក បានបន្តថា អាជ្ញាធរក្នុងមូលដ្ឋានដែលមានលោកមេឃុំ មេប៉ុស្តិ៍ ត្រូវសហការគ្នា ចុះទៅបង្រ្កាបរាល់ការបើកលួចលាក់លេងល្បែងស៊ីសង ដូចជា ជល់មាន់ ឡូតូ និងចាក់ឆ្នោតវៀតណាម ត្រូវធ្វើការជាប្រចាំថ្ងៃ ប្រចាំខែ កុំ ឱ្យ កើតមានល្បែងស៊ីសងបន្តមានទៅទៀត។
ជាមួយគ្នានោះ ឯកឧត្តម ក៏បានអំពាវនាវ ទៅដល់បងប្អូនប្រជាពលរដ្ឋ សូមចូលរួមធ្វើជាភ្ងាក់ងារសម្ងាត់ ចាំរាយការណ៍មកកាន់ លោកមេភូមិ មេឃុំ និងប៉ូលីសប៉ុស្តិ៍ ដើម្បីចុះទៅបង្រ្កាប ឱ្យ បានទាន់ពេលវេលាផង ។
ឯកឧត្តម ហ៊ុន ម៉ានិត បានលើកឡើង ទៀត ថា ចំពោះបងប្អូនប្រជាពលរដ្ឋដែលដឹងខ្លួនឯងលេងល្បែង សុំ ឱ្យ បញ្ឃប់លេងបន្តទៅទៀត ព្រោះថា ការលេងល្បែងស៊ីសងគ្នានផលចំណេញសម្រាប់គ្រួសារនោះទេ ផ្ទុយទៅវិញ វាបានបំផ្លាញសុភមង្គលក្នុងគ្រួសារដោយសារ តែញៀន នឹង ល្បែង និងអាចបង្កទៅជាជម្លោះ បែកបាក់ គ្រួសារ ព្រោះតែល្បែងស៊ីសងនេះ ។
គួរបញ្ជាក់ថា ពិធីសម្ភោធនេះ ក៏មានការអញ្ជើញចូលរួមដោយ លោក ខ្លូត ចិន្តា អភិបាលរងខេត្តកំពង់ចាម លោកជំទាវ កុល ធារិន អ្នកតំណាងរាស្រ្តមណ្ឌលកំពង់ចាម លោកជំទាវ ខុន ស៊ុនអេង ទីប្រឹក្សាសម្តេចប្រធានរដ្ឋសភាជាតិ លោកជំទាវ ស្រី គឹមឆយ ទីប្រឹក្សាសម្តេចប្រធានរដ្ឋសភាជាតិ និងឯកឧត្តម លោកជំទាវ គណៈប្រតិភូ អមដំណើរ អភិបាលស្រុក អាជ្ញាធរមូលដ្ឋាន លោកតា លោកយាយ បងប្អូនប្រជាពលរដ្ឋ និង សិស្សានុសិស្សជាច្រើន ផងដែរ ៕
