កំពង់ឆ្នាំង៖ព្រឹកថ្ងៃទី០៦ ខែមិនា ក្រុមប្រឹក្សាឃុំ អភិបាលស្រុករលារប្អៀរ និង លោកអនុប្រធានមន្ទីរអភិវឌ្ឍន៏ជនបទខេត្ត ជាម្ចាស់គំរោងបានប្រជុំជាមួយប្រជាពលរដ្ឋចំនួន១២០គ្រួសារជាអ្នកតវ៉ា នៅក្នុងវត្តត្រពាំងស្នោរដោះស្រាយបញ្ហា ដែលប្រជាពលរដ្ឋភូមិព្រៃខ្មែរជាង៥០០គ្រួសារបានផ្តិតមេដៃជំទាស់និងគំរោងទឹកស្អាតរបស់អង្គការលោកខាងលិចនិងលោកខាងកើត ដែលបានសាងសង់ស្ថានីយ៍ទឹកស្អាតនៅទំនប់ឈ្វាំងក្នុងភូមិព្រៃខ្មែរ ឃុំរលាប្អៀរ ស្រុករលាប្អៀរ ប៉ុន្តែមិនទទួលបានជោគជ័យ។
លោក ឈឹម វុទ្ធា អភិបាលស្រុករលារប្អៀរបានថ្លែងក្នុងកិច្ចប្រជុំជាមួយប្រជាពលរដ្ឋថា៖គំរោងអភិ វឌ្ឍន៏ទឹកស្អាតរបស់អង្គការខាងលើនេះបានផ្តល់ជូនប្រជាពលរដ្ឋក្នុងសហគមន៏ភូមិព្រៃខ្មែរជាអ្នកប្រើប្រាស់ តាមសំណើរបស់មន្ទីរអភិវឌ្ឍន៏ជនបទខេត្ត។ចំណែកតម្លៃទឹកគឺសហគមជាអ្នកកំណត់ថ្លៃ រីឯចំណូ លបានមកពីការលក់ទឹកក៏សហគមជាអ្នកគ្រប់គ្រងដែរ ដើម្បីទូរទាត់ថ្លៃប្រេងបូមទឹកយកមកចំរោះ និងចំណាយផ្សេងៗក្នុងការបំរើសេវាកម្មទឹកស្អាតអោយមានស្ថេរភាព។ដោយឡែកទឹកក្នុងទំនប់ឈ្វាំងប្រជាពលរដ្ឋក្នុងសហគមមានសិទ្ធប្រើប្រាស់ស្រោចស្រពដីស្រែ និងប្រើប្រាស់សម្រាប់មនុស្សសត្វជាធម្មតា។
លោក អ៊ំ ចំរើន អនុប្រធានមន្ទីរអភិវឌ្ឍន៏ជនបទខេត្តបាននិយាយក្នុងកិច្ចប្រជុំថា៖គំរោងទឹកស្អាតនេះមន្ទីរអភិវឌ្ឍន៏ជនបទខេត្តបានព្យាយាមស្នើសុំគំរោងនេះដែលមានទឹកប្រាក់៥២០០០ដុល្លា ពីអង្គការដៃគូរតាំងពីឆ្នាំ២០១០ និងត្រូវបានសម្រេចនិងកំពុងធ្វើធ្វើស្ថានីទឹកស្អាតនៅទំនប់ឈ្វាំងក្នុងឆ្នាំ២០១៣ មកដល់បច្ចុប្បន្ននេះ។នៅក្នុងគំរោងទឹកស្អាតរបស់អង្គការអាចផ្គត់ផ្គង់ប្រជាពលរដ្ឋបាន២៥០ខ្នងផ្ទះ និងតបណ្តាញទុយយោមេចូលផ្ទះបានចំនួន២៥០កន្លែង ហើយស្ថានីទឹកស្អាតនេះគឺជាទ្រព្យសម្បត្តិរួមដែលប្រជាពលរដ្ឋក្នុងសហគមទំនប់ឈ្វាំងភូមិព្រៃខ្មែរជាម្ចាស់និងជាអ្នកប្រើប្រាស់និងថែរក្សា។
តំណាងប្រជាពលរដ្ឋចំនួន៥រូបបានឡើងបញ្ចេញមតិដូចៗគ្នាថា៖ពួកគាត់ប្រឆាំងដាច់ខាតនិងមិនឯកភាពអោយធ្វើស្ថានីយ៍ទឹកស្អាតនៅទំនប់ឈ្វាំងទេ។ ព្រោះថាមុនពេលធ្វើស្ថានីទឹកស្អាតគ្មានអ្នកណាកោះប្រជុំប្រាប់ប្រជាពលរដ្ឋឡើយ សូម្បីតែលោកមេឃុំរលារប្អៀរក៏អត់បានដឹងដែរ។ ពេលប្រជាពលរដ្ឋជាង៥០០នាក់នាំគ្នាផ្តិតមេដៃតវ៉ាទើបមានការកោះប្រជុំប្រាប់ប្រជាពលរដ្ឋនៅពេលនេះ។កន្លងមកលោកមេភូមិចាស់ធ្លាប់ធ្វើអោយប្រជាពលរដ្ឋខកចិត្តជាច្រើនលើករួចមកហើយ ដូចជាការបិទទ្វារទំនប់ទឹកឈ្វាំងដោយឯកចិត្ត បានធ្វើអោយស្រែប្រជាពលរដ្ឋលង់លិចងាប់អស់មួយចំនួន និងមិនបានដោះស្រាយអោយប្រជាពលរដ្ឋស្ងប់ចិត្តឡើយ។
ករណីអោយគេធ្វើស្ថានីយ៍ទឹកស្អាតនៅទំនប់ឈ្វាំងនេះក៏ដូចគ្នា ខ្លាចពេលធ្វើស្ថានីយ៍ទឹកស្អាតរួចក្លាយជាកម្មសិទ្ធឯកជន។ដូចច្នេះពួកគាត់សូមបដិសេធន៏មិនអោយគេធ្វើស្ថានីទឹកស្អាតជាដាច់ខាត ខ្លាចចាញ់បោកគេទៀត។ លោក ឈឹម វុទ្ធា បាននិយាយបញ្ចប់ក្នុងពេលបិតកម្មវិធីថា៖ ការតវ៉ារបស់ប្រជាពលរដ្ឋគឺមានការរៀបចំជាប្រព័ន្ធជាស្រេច ដើម្បីញុះញង់ប្រជាពលរដ្ឋអោយប្រឆាំង និងគំរោងអភិវឌ្ឍន៏ខាងលើនេះដែលបញ្ហានេះអ្នកញុះញង់ត្រូវតែទទួលខុសត្រួវ ចំពោះប្រជាពលរដ្ឋក្នុងភូមិជាង៦០០គ្រួសារទៀតដែលគេមិនធ្វើការតវ៉ា ព្រោះពួកគាត់ពិតចង់បានទឹកស្អាតមកប្រើប្រាស់ដើម្បីសុខមាលភាពពួកគាត់ផងដែរ។
ការប្រជុំដោះស្រាយក្តីកង្វល់របស់ប្រជាពលរដ្ឋក្នុងរឿងខាងលើនេះត្រូវបានគេយល់ថា៖ប្រជាពល រដ្ឋមិនបានយល់ច្បាស់លាស់អំពីគំរោងនៃការអភិវឌ្ឍន៏ទឹកស្អាតសម្រាប់ពូកគាត់ ព្រោះតែមានការញុះញ ង់ពីខាងក្រៅ។ចំណែកម្ចាស់គំរោងនិងអាជ្ញាធរមិនបានពន្យល់ផ្សព្វផ្សាយជូនប្រជាពលរដ្ឋអោយបានស៊ីជំរៅនិងយល់ច្បាស់ មុននិងអនុវត្តគំរោងខាងលើនេះ។
ប្រសិនបើម្ចាស់គំរោងនិងអ្នកជំនាញធ្វើការពន្យល់បកស្រាយអោយប្រជាពលរដ្ឋយល់ច្បាស់ និងមានលក្ខ័ណន្តិកៈរបស់សហគមប្រើប្រាស់ទឹកស្អាតត្រឹមត្រួវនោះ ប្រជាពលរដ្ឋអ្នកតវ៉ា ប្រហែលជាអាចយល់ព្រមគាំទ្រការអភិវឌ្ឍន៏គំរោងទឹកស្អាតខាងលើនេះ៕