ព្រះវិហារ៖ នៅព្រឹកថ្ងៃទី០៧ ខែមីនា ឆ្នាំ២០១៤ ឯកឧត្តម សាយ សំ អាល់ រដ្ឋមន្ត្រីក្រសួងបរិស្ថាន បានអញ្ជើញជាអធឹបតី នៅក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគារទីចាត់ការដែនជម្រកសត្វព្រៃបឹងពែរ ដែលមានទីតាំងស្ថិតនៅក្នុងឃុំរមណី ស្រុករវៀង ខេត្តព្រះវិហារ ដោយមានការចូលរួមពីសំណាក់ឯកឧត្តម អ៊ុំ ម៉ារ៉ា អភិបាលនៃគណៈអភិបាលខេត្តព្រះវិហារ ឯកឧត្តម សួស យ៉ារ៉ា តំណាងរាស្ត្រមណ្ឌល
ព្រះវិហារ អាជ្ញាធរដែនដី មន្ត្រីបរិស្ថានខេត្ត ឧទ្យានុរក្ស កងកម្លាំងប្រដាប់អាវុធ លោឧកញ៉ា អ៊ុក គឹម សាន នាយកក្រុមហ៊ុនក្រុហ៊ុនចំការកៅស៊ូបឹងទន្លេម្រេច តំណាង វិនិយោគដំណាំកសិឧស្សាហកម្ម កម្មករ កម្មការីនីរបស់ក្រុមហ៊ុន និងបងប្អូនប្រជាសហគមន៍ក្នុងមូលដ្ឋានចំនួន១០០០នាក់។ ឯកឧត្តម អភិបាលខេត្តបានសម្តែងការស្វាគមន៍យ៉ាងកក់ក្តៅចំពោះវត្តមានរបស់ឯកឧត្តមរដ្ឋមន្ត្រី និងគណៈប្រតិភូអមដំណើរនៅក្នុង
ទឹកដីខេត្តព្រះវិហារ ដែលបានជួយលើកទឹកចិត្តដល់អ្នកពាក់ព័ន្ធទាំងអស់ឱ្យចូលរួមក្នុងកិច្ចខិតខំប្រឹងប្រែង ដើម្បីបុព្វហេតុបរិស្ថាន។ អញ្ជើញមានប្រសាសន៍សំណេះសំណាលក្នុងឱកាសនោះ ឯកឧត្តមរដ្ឋមន្ត្រីបានពាំនាំការផ្តាំផ្ញើសួរសុខទុក្ខពីសំណាក់សម្តេចតេជោនាយករដ្ឋមន្ត្រីជូនចំពោះមន្ត្រីរាជការ និងបងប្អូនប្រជាសហគមន៍ទាំងអស់ ដែលបំពេញការងារ និងរស់នៅក្នុងមូលដ្ឋាននេះ។
ឯកឧត្តមបានសម្តែងនូវការកោតសរសើរនិងវាយតម្លៃខ្ពស់ចំពោះកិច្ចខិតខំប្រឹងប្រែងរបស់មន្ត្រីបរិស្ថាននិងឧទ្យានុរក្ស ដែលបានបំពេញភារកិច្ចយ៉ាងសកម្ម ដើម្បីរួមចំណែកដល់កិច្ចគាំពារបរិស្ថាន ការអភិរក្សជីវៈចម្រុះ និងការគ្រងគ្រងប្រើប្រាស់ធនធានធម្មជាតិឱ្យបានសមស្រប ជាមួយគ្នានោះដែរ ឯកឧត្តមរដ្ឋមន្ត្រីក៏បានជំរុញនិងលើកទឹកចិត្តឱ្យក្រុមហ៊ុនវិនិយោគដំណាំកសិឧស្សាហកម្ម អាជ្ញាធរមូលដ្ឋានគ្រប់លំដាប់ថ្នាក់ និងបងប្អូនប្រជាសហគមន៍ក្នុងមូលដ្ឋាន បន្តសហការគ្នាឱ្យបានល្អ ដើម្បីជំរុញដំណើរការអនុវត្តគម្រោងឱ្យបានសម្រេចជោគជ័យ សំដៅរួមចំណែកដល់ការអភិវឌ្ឍសេដ្ឋកិច្ចសង្គម ជាពិសេស ការលើកកម្ពស់ជីវភាពរស់នៅរបស់បងប្អូនប្រជាសហគមន៍ តាមរយៈការប្រែក្លាយពីមុខរបរអាស្រ័យលើអនុផលព្រៃឈើឱ្យទៅជាការប្រកបរបរកសិកម្ម និងការទទួលបានការងារធ្វើវិញ។
ឯកឧត្តមក៏បានថ្លែងបញ្ជាក់ផងដែរថា ការអភិវឌ្ឍដំណាំកសិឧស្សាហកម្មនេះនឹងជួយលើកស្ទួយដល់កិច្ចការពារប្រពៃណីវប្បធម៌ទាំងបងប្អូនប្រជាពលរដ្ឋខ្មែរនិងជនជាតិដើមភាគតិច ជាពិសេសជនជាតិគួយ។នៅក្នុងឱកាសនោះឯកឧត្តមរដ្ធមន្ត្រីក៍បានចែកអំណោយម៉ូតូចំនូ១០គ្រឿងដែលជាអំណោយរបស់ក្រុមហ៊ុនចំការកៅស៊ូទ្រីភាព បឹងទន្លេម្រេច បន្ទាប់មក ឯកឧត្តមរដ្ឋមន្ត្រី និងគណៈប្រតិភូក៏បានអញ្ជើញទៅទស្សនាចំការម្រេច ចំការកៅស៊ូ ថ្នាលបណ្តុះកូនកៅស៊ូ និងការដ្ឋានសំណង់លំនៅដ្ឋានកម្មកររបស់ក្រុមហ៊ុនទ្រីភាពគ្រុប៕ លោក ឈឿង ចាន់ 
