ខេត្តប៉ៃលិន ៖ ប្រជាពលរដ្ឋ និងអាជីវករដែលលក់ដូរ នៅផ្សារព្រំលើ បានធ្វើការរិះគន់ ដោយមិនសំចៃមាត់ ទៅលើប្រធានផ្សារ ថា ទុកសម្រាមចោលរយៈពេលយូររហូតដល់ក្លាយទៅជារលួយជះក្លិនស្អុយអាសោចន៍ និងបង្កទៅជាដង្កូវរវើកពាសពេញក្នុងគំនរ ដោយមិនរវីរវល់ និងអើពើ
សោះឡើយ ។ ផ្សារដែលខ្វះអនាម័យមួយនេះ ស្ថិតនៅខាងជើងជាប់នឹងផ្លូវជាតិលេខ៥៧ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ជាក់ស្តែងនៅព្រឹកថ្ងៃទី៩ ខែវិច្ឆិកា នេះ អ្នកឆ្លើយឆ្លងព័ត៌មានកម្ពុជាថ្មី បានចុះផ្តិតយករូបភាព ព្រមទាំងសាកសួរក្រុមអាជីវករ និងប្រជាពលរដ្ឋ ដែលមកទិញអ៊ីវ៉ាន់ ពួកគាត់បានឲ្យដឹងថា៖ សំរាមជាច្រើនកន្លែងនៅជុំវិញផ្សារនេះ ត្រូវក្រុមអាជីវករយកទៅដាក់ចោល ដើម្បីរង់ចាំឱ្យរថយន្តចូលមកដឹក យកទៅចាក់ចោល តែជាច្រើនថ្ងៃមកហើយ មិនឃើញមានរថយន្តមកដឹកចេញនោះទេ គឺទុករហូតដល់ធ្វើឱ្យអ្នកដើរទៅទិញម្ហូបអាហារ និងអ្នកចូលទៅហូបកាហ្វេ បាយ គុយទាវនៅក្នុងផ្សារលេបស្ទើរមិនចូល ។
ប្រភពបន្តថា៖គំនរសំរាមទុកចោលនេះ បង្កឱ្យមានក្លិនស្អុយ ប៉ះពាល់ដល់បរិស្ថាន ធ្វើឱ្យប៉ះពាល់ដល់សុខភាព ប្រជា ពលរដ្ឋយ៉ាងខ្លាំង ពិសេសគឺភ្ញៀវទេសចរណ៏ ដែលមកលែងខេត្តប៉ៃលិន ព្រោះផ្សារមួយនេះវានៅជាប់តំបន់ច្រកទ្វារអន្តរជាតិ ,មានភ្ញៀវទេសចរណ៏ចេញចូលច្រើន ។តាមប្រភព ព័ត៌មាន ពីក្រុមអាជីវករដែលលក់ដូរ នៅក្នុងផ្សារព្រំលើ បានឱ្យដឹងទៀតថា៖ ជារៀងរាល់ឆ្នាំ ក្នុងរដូវ បុណ្យផ្សេងៗ ពួកគាត់លក់ដូរតែងកាក់កប ប៉ុន្តែក្នុងឆ្នាំ២០១៤ នេះ លក់ពុំដាច់ដោយសារមានសំរាម ជៈក្លិនស្អុយឆ្អេះឆ្អាប ធ្វើឱ្យភ្ញៀវទ្រាំលែងបាន មិនមានទឹកចិត្តចង់ទិញឥវ៉ាន់ នៅក្នុងផ្សារព្រំនោះទេ។ប្រជាពលរដ្ឋអ្នកផ្សារព្រំលើនិយាយថា៖ រឿងសំរាមគឺជារឿងដដែលៗដែលអាជ្ញាធរស្រុកដោះស្រាយមិនបាន ។
ចំណែកប្រធានផ្សារហាក់បីដូចជាមិនរវីរវល់ ចំពោះបញ្ហាសម្រាបនេះទេ , សំរាមត្រូវគេចាក់គរយ៉ាងអាណាធិបតេយ្យ ហើយអាជ្ញាធរភូមិ/ឃុំ/ស្រុក ក៏មិនចុះមកណែនាំឲ្យប្រធានផ្សារ ចេះធ្វើការសំអាតនោះដែរ ។ ប្រភពបន្តថា៖ ទីផ្សារទាំងមូលនិងត្រួវបាត់រូបរាង ដោយសារសំរាមជាមិនខាន ។
ប្រភពពីភ្ញៀវទេសចរមកពីខេត្តផ្សេងម្នាក់បានរិះគន់ឱ្យដឹងថា ខណៈក្រឡេកមើលពីខាងក្រៅទៅឃើញផ្សារ ហាក់ដូចជាស្រស់ស្អាត តែដល់ពេលដើរចូលទៅខាងក្នុងរកទិញរបស់របរ និងម្ហូបអាហារ គ្រាន់តែដើរទៅជិតដល់ភ្លាមមានជះក្លិនស្អុយស្ទើរសន្លប់បាត់ស្មារតី ។ 
ប្រជាពលរដ្ឋ បានសំណូមពរឱ្យលោក អភិបាល នៃគណៈអភិបាលខេត្តមេត្តា ចាត់វិធានការទៅលើ ប្រធានផ្សារ និងអ្នកម៉ៅការអនាម័យផង ព្រោះ តំបន់នេះ ជាតំបន់ច្រកទា្វរអន្តរជាតិ មានអ្នកទេសចរណ៍ គ្រប់ជាតិសាសន៍ ចេញចូលច្រើន ធ្វើយ៉ាងណាមេត្តាកុំឱ្យតំបន់នេះ ក្លាយទៅជាគំនរសំរាម បាត់បង់ចំណូលវិស័យទេសចរណ៍ និងអាប់ឱនដល់ថ្នាក់ដឹកនាំ ៕
