ខេត្តប៉ៃលិន ៖ កម្លាំងសមត្ថកិច្ចនគរបាល ស្រុកសាលាក្រៅ បានស្ទាក់ចាប់ឃាត់ខ្លួនបុរសជាជនសង្ស័យ២នាក់ ខណៈបើកបររថយន្ត ដើររកទិញម៉ូតូមួយគ្រឿងនៅស្រុករៀង ដោយប្រើក្រដាសប្រាក់ដុល្លារក្លែងក្លាយ តែដោយគេស្គាល់ថា មិនមែនជាក្រដាសប្រាក់ដុល្លារពិតប្រាកដ ទើបម្ចាស់ម៉ូតូ មិនលក់ឱ្យពួកគេទាំងពីរនាក់ លុះបែកការពួកគេបើករថយន្តត្រឡប់មកខេត្តប៉ៃលិនវិញ តែបានពាក់កណ្តាលផ្លូវត្រូវសមត្ថកិច្ចធ្វើការស្ទាក់ចាប់ឃាត់ខ្លួនតែម្តង ។
ហេតុការណ៍ចាប់ឃាត់ខ្លួននេះ បានកើតឡើងកាលពីវេលាម៉ោង១០យប់ ថ្ងៃទី១១ វិច្ឆិកា ១០១៤ នៅលើបណ្តោយផ្លូវជាតិលេខ៥៩ ត្រង់ចំណុចមុខអធិការស្រុកសាលាក្រៅ ក្នុងភូមិទួលខ្ពស់ ឃុំស្ទឹងត្រង់ ស្រុកសាលាក្រៅ ។
ជនសង្ស័យទី១. ឈ្មោះ សុវណ្ណ ឧត្តម ភេទប្រុស អាយុ៣៥ឆ្នាំ មានស្រុកកំណើតរស់នៅភូមិក្រពើហា ឃុំតាខ្មៅ ស្រុកតាខ្មៅ ខេត្តកណ្តាល បច្ចុប្បន្នរស់នៅភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ទី២. ឈ្មោះ តែ សំបូរ ភេទប្រុស អាយុ២៩ឆ្នាំ ជាអ្នកបើកបររថយន្តម៉ាកកាមរីពណ៌ទឹកប្រាក់ ស៊េរីឆ្នាំ៩១ អត់ស្លាកលេខ មានស្រុកកំណើត រស់នៅភូមិ\ស ង្កាត់ផ្សារកណ្តាល២ ខណ្ឌដូនពេញ រាជធានីភ្នំពេញ បច្ចុប្បន្នរស់នៅ ភូមិបឹងព្រលឹត ឃុំស្ទឹ ងកាច់ ស្រុកសាលាក្រៅ ។
ប្រភពព័ត៌មានពីសមត្ថកិច្ចនៃអធិការស្រុកសាលាក្រៅ បានរៀបរាប់ឱ្យដឹងថា មុនពេលកើតហេតុ មានសេចក្តីរាយការណ៍តាមទូរស័ព្ទមកពីស្រុកកំរៀង ខេត្តបាត់ដំបងថា មានបុរសមិនស្គាល់អត្តសញ្ញាណចំនួនពីរនាក់ បានបើកបររថយន្តមួយគ្រឿងម៉ាកកាមរីពណ៌ទឹកប្រាក់ ស៊េរីឆ្នាំ៩១ អត់ស្លាកលេខ បើកបរក្នុងទិសដៅពីលិចទៅកើត តាមបណ្តាយផ្លូវជាតិលេខ៥៩ ដោយពួកគេទាំងនោះបានយកក្រដាសប្រាក់ដុល្លារក្លែងក្លាយចំនួន១៨សន្លឹក ស្មើនឹង១៨០០ដុល្លារ ទៅរកទិញម៉ូតូពីបុរសម្នាក់ ។ តែដោយម្ចាស់ម៉ូតូគេ ស្គាល់ក្រ ដាសប្រាក់ដុល្លារក្លែងក្លាយ ក៏អត់ព្រមលក់ឱ្យជនសង្ស័យទាំងពីរនាក់នោះ ដោយក្រោយមកពួកគេ ប្រហែលជាដឹងខ្លួន ក៏បើករថយន្តចេញពីស្រុកកំរៀងឆ្ពោះមកខេត្តប៉ៃលិនយ៉ាងប្រញាប់ប្រញាល់ ។
ប្រភពបន្តទៀតថា បន្ទាប់ពីទទួលព័ត៌មានភ្លាម កម្លាំងនគរបាលនៃអធិការស្រុកសាលាក្រៅ ក៏បានចុះប្រតិបត្តិការដាក់ពង្រាយកងកម្លាំងជាច្រើននាក់ ដើម្បី រង់ចាំស្ទាក់ចាប់ឃាត់ខ្លួនពួកគេទាំងនោះ ។ ក្រោយមកក៏ឃើញរថយន្តដូចបានរាយការណ៍ ខាងលើ ហើយក៏ស្ទាក់ឃាត់ខ្លួន រួចឆែកឆេរឃើញក្រដាសប្រាក់ដុល្លារក្លែងក្លាយនៅក្រោម កំរាលជាន់តែម្តង ។
សមត្ថកិច្ចបញ្ជាក់ថា ទាក់ទិនទៅនឹងបញ្ហានេះ ក្រោយពេលធ្វើការឃាត់ខ្លួន ពួកគេទាំងពីរនាក់ បានសារភាពថា គឺពិតជាបានប្រើប្រាស់ក្រដាសប្រាក់ដុល្លារក្លែងក្លាយយកទៅដើររកទិញម៉ូតូប្រាកដមែន ហើយសមត្ថកិច្ចបានរៀបចំសំនុំរឿងបញ្ជូនជនសង្ស័យទាំងពីរនាក់នេះ ទៅស្នងការនគរបាលខេត្តប៉ៃលិន ដើម្បីចាត់ការតាមផ្លូវច្បាប់ ៕
