ព្រះវិហារ៖ សិក្ខាសិលាបណ្តុះបណ្តាលស្តីពីការរៀបចំបង្កើតគំរូទិន្នន័យតាមប្រព័ន្ធពត័មានភូមិសាស្ត្រសំរាប់ការព្យាករណ៍នឹងវាយតម្លៃការប្រើប្រាស់ដីព្រៃឈើ គំរោងគ្រប់គ្រងតំបន់ការពារត្រីកោណមរកត ដើម្បីជម្រុញកិច្ចសហប្រតិបត្តិការតាមបណ្តោយព្រំដែនកម្ពុជា ថៃ និងឡាវ ដំណាក់កាលទី០៣ ដោយមានសិក្ខាកាមចូលរួមចំនួន ០៣ប្រទេស ។
កម្មវិធីនេះបានប្រព្រឹត្តទៅកាលពីថ្ងៃទី១១ ខែមិនា ឆ្នាំ២០១៤ អញ្ជើញជាគណៈអធិបតីមានឯកឧត្តម អ៊ុំ ម៉ារ៉ា អភិបាលខេត្តព្រះវិហារ ឯកឧត្តម អ៊ុង សំអាត អនុប្រធានរដ្ឋបាលព្រៃឈើនៃព្រះរាជាណាចក្រកម្ពុជា លោក សុឆាត កល្យាវង្សា តំណាងនាយកដ្ឋានភូមិន្ទព្រៃឈើនៃព្រះរាជាណាចក្រថៃ លោក វីឡាវ៉ាន់ សាផានថង ជាអនុប្រធានមហាវិទ្យាល័យចម្ប៉ាសាក់ ប្រទេសឡាវ ។
លោក អ៊ិត ភូម្រា នាយខ័ណ្ឌរដ្ឋបាលព្រៃឈើខេត្តព្រះវិហារមានប្រសាសន៍ថាៈ ខេត្តព្រះវិហារមានផ្ទៃក្រឡា ១.៤០៣.០៨៧ ហិចតា ដែលក្នុងនោះមានផ្ទៃដីព្រៃឈើចំនួន ១.២៨០.០៨២ ហិចតា (ឆ្នាំ២០១០) មានព្រំប្រទល់ជាប់ជាមួយប្រទេសចំនួន ១២៩ គ.ម និងប្រទេសឡាវចំនួន ១៤៩ គ.ម ។ តំបន់ដែលជាប់ព្រំដែនកម្ពុជា.ឡាវ.ថៃ ជាតំបន់ដែលគ្របដណ្តប់ដោយព្រៃឈើ សំបូរដោយជួរភ្នំ និងដងអូរ ។
ដូច្នេះហើយបានជាមានការឆ្លៀតឱកាសរបស់ក្រុមជនខិលខូចក្នុងការលបលួចកាប់ឈើ បរបាញ់ ទាក់ចាប់សត្វព្រៃ និងដឹកជញ្ជូនខុសច្បាប់ឆ្លងកាត់ព្រំដែនប្រទេសទាំងបី ។ នេះជាហេតុផលដែលយើងធ្វើការសម្របសម្រួលសហការគ្នាដើម្បីដោះស្រាយ និងទប់ស្កាត់បទល្មើសព្រៃឈើ និងសត្វព្រៃឆ្លងដែលឲ្យមានប្រសិទ្ធិភាព ។
វគ្គបណ្តុះបណ្តាលនេះជាសញ្ញាណដ៍ល្អមួយនៃការពង្រឹងកិច្ចសហប្រតិបត្តិការក្នុងការគ្រប់គ្រងធនធានធម្មជាតិព្រៃឈើ សត្វព្រៃនៅតាមបណ្តោយព្រំដែនអន្តរជាតិរវាងប្រទេសទាំងបីកម្ពុជា ឡាវ និងថៃ ។ ដើម្បីសំដែងនូវការដឹងគុណប្រជាជននឹងរដ្ឋាភិបាលជប៉ុនក្នុងការចូលរួមគាំទ្រជាបន្តបន្ទាប់សំរាប់គំរោងអភិរក្សជីវៈចំរុះនៅតាមតំបន់ព្រំដែនជាប់ជាមួយប្រទេសថៃ និងប្រទេសឡាវ និងការទទួលស្គាល់នូវការចូលរួមចំនែករបស់អង្គការអន្តរជាតិព្រៃឈើតំបន់ត្រូពិចអន្តរជាតិ (ITTO) ទាំងបីដំណាក់កាលរបស់គំរោង ។
ឯកឧត្តម អ៊ុំ ម៉ារ៉ា អភិបាលខេត្តព្រះវិហារមានប្រសាសន៍ថាៈ គោលបំណងនៃការអភិវឌ្ឍន៍សំរាប់ដំណាក់កាលទី៣របស់គំរោងស្តីពីការគ្រប់គ្រងតំបន់ព្រៃការពារត្រីកោណមរកត ដើម្បីជំរុញកិច្ចសហប្រតិបត្តិការតាមបណ្តោយព្រំដែនកម្ពុជា ថៃ និងឡាវ គឺដើម្បីចូលរួមចំណែកក្នុងការអភិរក្សជីវៈចម្រុះតាមបណ្តោយព្រំដែននៃតំបន់ព្រៃការពារត្រីកោណមរកត រវាងកម្ពុជា ថៃ ឡាវ ។
គោលបំណងជាក់លាក់របស់គំរោង គឺដើម្បីពង្រឹងការការពារតាមបណ្តោយព្រំដែនរួម នូវទីជំរកនៃប្រភេទសត្វព្រៃដ៍ច្រើនចំរុះនៅក្នុងតំបន់ត្រីកោណមរកត ជាការពិតទាំងនេះជាគោលបំណងដ៍មានបហិច្ចតា ហើយគំរោងនឹងសំរេចឲ្យបាននូវគោលបំណងនេះ តាមរយៈការបង្កើតនឹងអនុវត្តរាល់ផែនការគ្រប់គ្រងដែលរួមបញ្ជូលនូវលទ្ធផលនែការសិក្សាស្រាវជ្រាវស្តីពីប្រភេទជីវៈចម្រុះដ៍សំបូរបែប និងដំនើរការអេកូឡូស៊ី ដែលមានការពាក់ព័ន្ធគ្នារវាងបណ្តាប្រទេសទាំងបីដែលចូលរួមនៅក្នុងគំរោងនេះ ។
ឯកឧត្តម អ៊ុំ ម៉ារ៉ា បានសំណូមពរទៅភាគ្គីថៃ សូមកុំឲ្យមានការបាញ់សំលាប់ប្រជាពលរដ្ឋខ្មែរដែលបានឆ្លងដែនខុសច្បាប់ចូលទៅលួចកាប់ឈើក្រញូងក្នុងទឹកដីថៃ សូមឲ្យដាក់ទោសទៅតាមច្បាប់ ៕ដោយ លោក ឈឿង ចាន់ 
