ខេត្តរតនគិរីស្ត្រីឈ្មួញរកស៊ីដឹកឈើប្រណីត នៅក្នុងខេត្តរតនគិរីម្នាក់ បានចោទប្រកាន់នាយការិយាល័យ នគរបាលប្រឆាំងបទល្មើសសេដ្ឋកិច្ចខេត្តនេះថា ការចាប់រថយន្តដឹកឈើរបស់គាត់ ព្រោះតែគាត់ខកខាន ក្នុងការបង់លុយប្រចាំខែក្នុងរយៈពេលតែ៥ថ្ងៃ ហើយគេក៏ទម្លាយរឿង
ពុករលួយឃុបឃិតគ្នា នាពេលកន្លងមកតែម្ដង ។អ្នកស្រី រ៉ា ហៅ ចែ រ៉ា ឈ្មួញរកស៊ីឈើ និងជាប្រពន្ធមេបញ្ជាការរង កងរាជអាវុធហត្ថខេត្តរតនគិរី បានឲ្យដឹងនៅរសៀលថ្ងៃទិ១៥ ខែធ្នូថា សមត្ថកិច្ចនគរបាលសេដ្ឋកិច្ចខេត្ត ដែលបានចាប់រថយន្តដឹកឈើរបស់អ្នកស្រី កាលពីថ្ងៃទី១០ ខែធ្នូ ឆ្នាំ២០១៤នោះ គឺដោយសារតែនគរបាលសេដ្ឋកិច្ចទាំងនោះខឹងអ្នកស្រី ដែលមិនបានបង់លុយមុនរយៈពេល៥ថ្ងៃ ព្រោះអ្នកស្រីជាប់រវល់ធ្វើបុណ្យនៅភ្នំពេញ ។
អ្នកស្រីបន្តថា ជារៀងរាល់ខែ អ្នកស្រីត្រូវបង់លុយមុនក្នុង១ខែ ចំនួន១៥០០ដុល្លារ ទៅឲ្យលោក នូវ ដារ៉ា ហៅ ឈុន នាយការិយាល័យ នគរបាលប្រឆាំងបទល្មើសសេដ្ឋកិច្ច តាមរយៈកូនចៅឈ្មោះ ឈាន សុភក្តិ ជាកូនចៅម្នាក់ ជាថ្នូរនឹងការដឹកឈើពីស្រុកមកដល់ខេត្ត។
ស្ត្រីឈ្មួញរកស៊ីឈើរូបនោះ បន្តទៀតថា លុះនៅវេលាម៉ោង៩យប់ ថ្ងៃទី៩ ខែធ្នូ ឆ្នាំ២០១៤ គឺជាពេលចរចារវាងអ្នកស្រី និងនគរបាលសេដ្ឋកិច្ចខេត្ត ដោយចរចាអស់ពេញមួយយប់ មិនត្រូវរូវគ្នា ទើបព្រឹកថ្ងៃទី១០ ខែធ្នូដដែល វេលាម៉ោង៥:៣០នាទី សមត្ថកិច្ចធ្វើសកម្មភាពចាប់រថយន្តរបស់គាត់តែម្ដង។ អ្នកស្រីថា «ដឹកឈើមិនដល់១ម៉ែត្រគូបផង គេទារច្រើនពេក មិនអាចបង់កើតទេ ព្រោះឈើតិចណាស់»។
បំភ្លឺចំពោះការចោទប្រកាន់ខាងលើនេះ លោក នូវ ដារ៉ា នាយនគរបាលប្រឆាំងបទល្មើសខេត្តរតនគិរី បានប្រាប់ថា ការចោទប្រកាន់ របស់ស្ត្រីរូបនោះគឺគ្មានភស្តុតាង មិនមែនជាការពិត ។ លោកបន្តថា ការចោទប្រកាន់នេះ គឺគេធ្វើឡើងក្នុងគោលបំណង ចង់បង្ខូចកេរ្តិ៍ឈ្មោះរបស់គាត់តែប៉ុណ្ណោះ។
គួរបញ្ជាក់ថា កម្លាំងនគរបាលប្រឆាំងបទល្មើស សេដ្ឋកិច្ចខេត្តរតនគិរី ស្ទាក់ចាប់រថយន្តរបស់អ្នកស្រី រ៉ា ហៅចែរ៉ា កាលពីថ្ងៃទី១០ ខែធ្នូ ឆ្នាំ២០១៤ ខណៈរថយន្តនោះ ដឹកឈើប្រណីតចូលក្នុងទីរួមខេត្ត នៅចំណុចក្បែរគល់ស្ពានឈើ ស្ថិតនៅភូមិថារ៉ងស្វាយ ឃុំអូរជុំ ស្រុកអូរជុំ។
តាមលោក នូវ ដារ៉ា បានឲ្យដឹងថា រថយន្តដឹកឈើប្រណីតនោះ ម៉ាកឡិចស៊ីស៤៥០ ពណ៌ខ្មៅ ពាក់ស្លាកលេខ ភ្នំពេញ 2G-9654 ហើយចែរ៉ាបានចុះពីលើរថយន្ត ទាញប៊ីដុងសាំងបម្រុងដុតវត្ថុតាងចោល រួចបានស្រែកខ្លាំងៗ ចោទសមត្ថកិច្ចថា បានទទួលសំណូករាប់ពាន់ដុល្លារក្នុង១ខែៗពីគាត់(ចែរ៉ា) ។ លោកថាម្ចាស់បទល្មើស ជាភរិយាលោកវរសេនីយ៍ឯក នាង ក្វាយ មេបញ្ជាការរងកងរាជអាវុធហត្ថ ខេត្តរតនគិរី ៕
