ខេត្តសៀមរាបដឹកនាំដោយលោកប៊ុន ថារិទ្ធ អភិបាលរងខេត្ត បានជួបសំណេះសំណាលជាមួយប្រជាពលរដ្ឋដែលជាអាជីវកលក់ដូរនៅផ្សាររាត្រីតំបន់អង្គរឃ្យូងយូ ដើម្បីណែនាំអំពីគោលការណ៍របស់សាលាខេត្ត ក្នុងការរៀបចំសណ្តាប់ធ្នាប់ទីនោះអោយមានសោ ភ័ណ្ឌភាព និង
អនាម័យ ដើម្បីទាក់ទាញអារម្មណ៍ភ្ញៀវទេសចរជាតិនិងអន្តរជាតិ អោយមកកំសាន្តទីនោះបន្ថែមទៀត។
ផ្សាររាត្រីអង្គរឃ្យូងយូដែលមានទីតាំងនៅលើតំបន់ផ្ឡូវ៦០ម៉ែត្រ បានកកើតឡើងជាច្រើនឆ្នាំមកហើយ ផ្តើមចេញពីការលក់កំប៉ិកកំប៉ុកដូចជាសាច់អាំងជាប្រភេទគ្រឿងក្លែម រហូតដល់ចំណីអាហារសព្វមុខនិងសំលៀកបំពាក់ព្រមជាមួយនឹងកន្លែងកំសាន្តសំរាប់កុមារនិងយុវវ័យផងដែរ។ ផ្សាររាត្រីអង្គរឃ្យុងយូក្នុងរយៈពេលចុងក្រោយនេះបានក្លាយទៅជាកន្លែងកំសាន្តដ៏ពេញនិយមមួយ ក្នុងចំណោមកន្លែងកំសាន្តជាច្រើនទៀត សំរាប់មនុស្សទូទៅនៅក្នុងខេត្តសៀមរាបពិសេសគឺនៅរាល់ពេលរដូវបុណ្យទានដូចជាភ្ជុំបិណ្ឌនិងចូលឆ្នាំជាដើមគឺកកកុញទៅដោយមនុស្ស។
ក្នុងគោលបំណងរៀបចំសណ្តាប់ធ្នាប់សន្តិសុខរបៀបរៀបរយសោភ័ណភាពអនាម័យ និងដើម្បីសម្រួលដល់ការធ្វើចរាចរទូទៅនៅចំណុចផ្សាររាត្រីអង្គរឃ្យុងយូពិសេសការអនុវត្តអោយបានសមស្របនូវគោលការណ៍ផ្សាររាត្រី ដែលមានប្រជាប្រិយភាពនិងមានស្តង់ដាដើម្បីជាការទាក់ទាញនិងបម្រើសេវាជូនដល់ភ្ញៀវទេសចរជាតិនិងអន្តរជាតិអោយមកកំសាន្តសប្បាយកាន់តែច្រើនឡើងថែមទៀតសាលាក្រុងសៀមរាបកាលពីថ្ងៃទី៩ ខែធ្នូ ឆ្នាំ២០១៤ នេះបានចេញនូវសេចក្តីជូនដំណឹងមួយដល់អាជីវកលក់ដូរនៅផ្សាររាត្រីឃ្យុងយូនេះ គឺការលក់ដូរតែពេលយប់ចំណែកពេលថ្ងៃរក្សាស្ថានភាពដដែល (ពោលគឺអនុញ្ញាតិអោយមានការតម្លើងរោងសំរាប់លក់ដូរនៅពេលយប់តែពេលថ្ងៃត្រូវរើចេញអោយអស់)។
នៅក្នុងសេចក្តីជូនដំណឹងដែលបានចុះហត្ថលេខាដោយអភិបាលក្រុងទើបចូលកាន់ដំណែងលោកស៊ូ ប្លាតុង ដែលមានបួនចំណុចនោះបានតំរូវអោយអាជីវកទាំងអស់រហូតដល់ថ្ងៃទី១៧ខែធ្នូ ត្រូវរុះរើចេញអោយអស់ពីទីតាំងនេះនូវសំណង់នានាដូចជាតូបរោងគ្រែតុកៅអីរនាបបង្គោល។ល។ រួមទាំងឧបករណ៍ល្បែងក្មេងលេងគ្រប់ប្រភេទ។ ត្រូវបានអនុញ្ញាតិអោយដាក់លក់ដូរចាប់ពីម៉ោង៤ល្ងាចរហូតដល់ម៉ោង១២យប់។ នៅពេលបញ្ចប់ការលក់ដូរអាជីវកទាំងអស់ត្រូវរុះរើទីតាំងនិងសម្ភារៈឧបករណ៍លក់ដូរចេញអោយអស់ពីចំណុចផ្សាររាត្រី។ ត្រូវបានរក្សាទុកផ្លូវធំកណ្តាលសំរាប់សំរួលការធ្វើដល់ចរាចរជាទូទៅ និងរៀបចំចំណែកសំរាប់ជាចំណត។ រាល់ការលក់ដូទាំងអស់ត្រូវទៅតាំងលក់នៅតាមបណ្តោយផ្លូវអមសងខាងប្រឡាយវិញតាមផលរបរនិងទីតាំងដែលក្រុមការងារកំណត់អោយដោយផ្អែកតាមស្តិតិដែលបានស្រង់កាលពីខែឧសភាឆ្នាំ២០១៤។
តំបន់ផ្សាររាត្រីអង្គរឃ្យុងយូ ដែលឥឡូវតាមការអោយដឹងមានតូបលក់ដូររហូតជាង៥០០រយតូបនោះ កាលពីពេលកន្លងមកក៏ធ្លាប់បែកធ្លាយនូវព័ត៌មានមិនល្អមួយចំនួនពាក់ព័ន្ធទៅនឹងការយកលុយកាក់ច្រើនពីអាជីវក ដើម្បីបែងចែកទៅដល់ថ្នាក់ខេត្តជាថ្នូរនឹងទីតាំងសំរាប់ការលក់ដូររបស់ពួកគេ។
នៅក្នុងជំនួបកាលពីព្រឹកថ្ងៃទី១៣ ខែធ្នូនេះលោកប៊ុន ថារិទ្ធ អភិបាលខេត្តរងបានច្រានចោលការចោទប្រកាន់នោះ។ លោកបានមានប្រសាសន៍ប្រាប់អ្នកព័ត៌មានថាមិនមានការយកលុយទេចំពោះការលក់ដូរនៅទីតាំងផ្សាររាត្រីនេះ ប៉ុន្តែលុយសំរាប់ការធ្វើអនាម័យគឺចៀសមិនផុតទេ តែធ្វើទៅតាមគោលការណ៍ស្ម័គ្រចិត្តប៉ុណ្ណោះ៕ដោយ ខេង ឧត្តម