បន្ទាយមានជ័យៈ អាចរយៈពេល១ខែទៀតបើនៅតែមានជនខិលខូចបំផុសញួសញុង និងគេចវេសមិនបង់ពន្ធគយ ទៅលើការនាំចូលទំនិញពីប្រទេសថៃតាមច្រកទ្វារអន្តរជាតិប៉ោយប៉ែត គយនឹងយកច្បាប់ព្រហ្មទណ្ឌអនុវត្តទៅលើអ្នកទាំងនោះ ។លោក ឈួន ហៃ នាយការិយាល័យគយច្រ
ទ្វាអន្តរជាតិប៉ោយប៉ែត បានអោយដឹងកាលពីថ្ងៃទី១៦ ធ្នូ ២០១៤ នេះថា បន្ទាប់ពីមានបាតុភាពផ្ទុះបាតុកម្មនាថ្ងៃទី២៧ តុលា ២០១៤ កន្លងមកពីសំណាក់រថយន្តធុនតូចដឹកទំនិញ ដោយទាមទាបន្ធូបន្ថយការបង់ពន្ធ និងបន្ថយកុងត្រូលគយដែលមានច្រើនកន្លែង នៅលើផ្លូវជាតិ
លេខ៥ ចម្ងាយ៤០ គីឡូម៉ែត្រមាន៤កន្លែងនោះ នាយកដ្ឋានគយនិងរដ្ឋករបានពិនិត្យនិងចុះជួបជាមួយអភិបាលខេត្ត សម្រេចអោយមានទីលានត្រួតពិនិត្យលើរទេសអូសដឹកទំនិញពីប្រទេសថៃចូលកម្ពុជាតាមច្រកទ្វាអន្តរជាតិប៉ោយប៉ែតតែមួយកន្លែង នៅនិងទីតាំងមុខផ្សារ៉ាថ្មី ដោយមិនអោយមានការត្រួតពិនិត្យនៅនិងមាត់ច្រក ដែលអាចនាំអោយកកស្ទះប៉ះពាល់ដល់ភ្ញៀវទេសចរណ៍ និងទំនិញតាមរថយន្ត ។
ការបង្កើតទីលានត្រួតពិនិត្យលើទំនិញតាមរទេសនេះបានចាប់ផ្តើមដំណើរការតាំងពីថ្ងៃទី១២ កន្លងទៅ ហើយការត្រួតពិនិត្យនេះពុំទាន់មានបាតុភាពតវ៉ាពីសំណាក់កម្មករអូសរទេស ឬឈ្មួញឡើយ ។ តាមរយៈការត្រួតពិនិត្យប៉ុន្មានថ្ងៃមកនេះឃើញថាអ្នកបង់ពន្ធនៅតែបន្តបង់ពន្ធ ចំណែកអ្នកគេចវេសពីការបង់ពន្ធតាមការបំបែករូបភាពទំនិញនៅតែបន្តមាន និងតែងតែបំផុសបំផុលដល់អ្នកដទៃមិនអោយបង់ពន្ធ ។ តែទោះជាយ៉ាងណាក៏ដោយ លោកតែងតែណែនាំទាំងផ្លូវច្បាប់ដល់អាជីវករ និងអ្នកអូសរទេសអោយពួកគាត់បានយល់ពីច្បាប់ និងកាតព្វកិច្ចនៃពន្ធគយ ។ បច្ចុប្បន្នលោក កំពុងតែសិក្សាបើនៅតែមានជនខិលខូចគេចវេសមិនចូលទីលានត្រតពិនិត្យ ឬមិនបង់ពន្ធទេ នឹងធ្វើការបង្ក្រាបតាមច្បាប់ព្រហ្មទណ្ឌព្រោះគិតថា ជាបទល្មើសខុសច្បាប់ ។
ការបង្កើតអោយមានទីលានត្រួតពិនិត្យតែមួយលើ ទំនិញអូសតាមរទេសវាបានបញ្ចៀស ការកកស្ទះលើផ្លូវសាធារណៈ ការកកស្ទះរថយន្តដឹកទំនិញធុនធំ មិនរំខានដល់ភ្ញៀវទេសចរណ៍ មិនថែមតែប៉ុណ្ណោះកាត់បន្ថយ ភាពឥតសណ្តាប់ធ្នាប់នៅតាមផ្លូវចំនុចម្តុំរង្វង់មូលនៃច្រកចូល ហើយធ្វើអោយងាយស្រួលក្នុងការត្រួតពិនិត្យលើទំនិញ ។
សូមបញ្ចាក់ថា ច្រកទ្វាអន្តរជាតិប៉ោយប៉ែតការប្រមូលពន្ធគយ គិតជាប្រាក់ដុល្លាក្នុង១ឆ្នាំរកបានជាង១០០លានដុល្លា ។ ហើយជាមួយនិងការអនុវត្តន៍គោលនយោបាយបង់ពន្ធ១០០% តាមកំណែទំរង់ថ្មីរបស់រដ្ឋាភិបាល លោក ឈួន ហៃ មានជំនឿថាចំណូលពន្ធនឹងកើនឡើង ព្រោះថាបច្ចុប្បន្នពីមួយខែទៅមួយខែការិយាល័យ តែងប្រមូលគ្រប់ទៅតាមផែនការកំណត់ ៕