ភ្នំពេញ ក្រុមកម្មករការិនីនៃរោងចក្រកាត់ដេរសម្លៀកបំពាក់យីហោខេបបូខូថបដែលបាននាំគ្នាធ្វើកូដកម្មអស់រយៈពេលជាងមួយសប្ដាហ៍មកហើយនោះបន្ទាប់ពីនាំគ្នាទៅឈរបិទផ្លូវជាតិលេខ៤កាលពីថ្ងៃទី២២ ខែធ្នូមកដល់ព្រឹកថ្ងៃទី២៣ ខែធ្នូ ឆ្នាំ២០១៤នេះបាននាំគ្នាដុតសំបកកង់ឡានថែមទៀតដើម្បីទាមទារឲ្យតំណាងរបស់ពួកគេចំនួន៥នាក់ដែលថៅកែព្យួរពីការងារឲ្យបានចូលធ្វើការវិញប៉ុន្តែនៅតែមិនទាន់ទទួលបានលទ្ធផលនៅឡើយទេ។
រោងចក្រខេបបូខូថបនេះមានទីតាំងនៅតាមបណ្ដោយផ្លូវជាតិលេខ៤ស្ថិតក្នុងភូមិកន្ទោកខាងជើង សង្កាត់កន្ទោក ខណ្ឌពោធិ៍សែនជ័យដែលរោងចក្រនេះបានផ្ទុះកូដកម្មអស់រយៈពេលមួយសប្ដាហ៍មកហើយនៅមិនទាន់មានដំណោះស្រាយសមរម្យណាមួយជូនកម្មករនោះទេ ។
តាមនគរបាលមូលដ្ឋានបានឲ្យដឹងថារោងចក្រនេះមានកម្មករសរុបប្រហែល២.០០០ពាន់នាក់ហើយក្នុងនោះមានកម្មករចំនួនជិត១.០០០ពាន់នាក់បាននាំគ្នាធ្វើកូដកម្មចំណែកកម្មករមួយចំនួនទៀតបាននាំគ្នាចូលធ្វើការធម្មតាតែក្នុងរោងចក្រនេះក៏មានសហជីពពីរគឺសហជីពមួយគាំទ្រខាងថៅកែនិងសហជីពមួយទៀត គាំទ្រខាងកម្មករដោយសារតែបែបនេះហើយទើបមានការខ្វែងគំនិតគ្នា។ 
ប្រភពបន្តថាការផ្ទុះកូដកម្មនេះធ្វើឡើងអស់រយៈពេលប្រហែលមួយសប្ដាហ៍មកហើយបន្ទាប់ពីថៅកែបានសម្រេចព្យួរការងារដល់តំណាងសហជីពចំនួន៥នាក់ពីការងារមកនោះ។ក្រោយមកក៏ផ្ទុះកូដកម្មតែម្ដងគឺខាងកម្មករបានទាមទារឲ្យថៅកែទទួលយកតំណាងរបស់ពួកគេចំនួន៥នាក់នោះឲ្យចូលធ្វើការវិញ។ការធ្វើកូដកម្មនេះអាជ្ញាធរមូលដ្ឋានក៏ដូចជាអាជ្ញាក្រុងក៏ធ្លាប់ចុះទៅធ្វើការពន្យល់ណែនាំ និងសម្របសម្រួលដល់កម្មករដែរតែនៅតែមិនអាចត្រូវរ៉ូវគ្នាឡើយពោលគឺកម្មករនៅតែនាំគ្នាធ្វើកូដកម្មដដែល ហើយខាងថៅកែក៏មិនទាន់បន្ទន់ឥរិយាបថជាមួយកម្មករដែរ។នៅព្រឹកកើតហេតុនេះកម្មករបានដុតសំបកកង់ឡាននៅមុខរោងចក្រឆាបឆេះយ៉ាងសន្ធោសន្ធៅតែមិនមានការប៉ះទង្គិចគ្នាឬមានគ្រោះថ្នាក់អ្វីឡើយ៕
