ខេត្តបាត់ដំបង៖ហាងលក់ការហ្វេមួយកន្លែងដែលគេស្គាល់ថា ជារបស់មន្ត្រីកងរាជអាវុធហត្ថម្នាក់ត្រូវបានអគ្គីភ័យឆាបឆេះចេញពីខាងក្នុងចង្ក្រានដោយសារផ្ទុះកំប៉ុងហ្គាស់ តែបានប្រជាពលរដ្ឋនៅជិតខាងនាំគ្នាជួយពន្លត់ទានពេល គ្រាន់តែឆេះសម្ភារៈនៅខាងក្នុងផ្ទះអស់រលីង តែមិនរាលដាល
ដល់ផ្ទះទាំងមូលទេ ហើយក៍គ្មាននណាម្នាក់ស្លាប់និងរងរបួសផងដែរ គ្រាន់តែផ្អើលភ្ញៀវមកផេកការហ្វេ រត់ប្រសេកប្រសាចប៉ុណ្ណុះ។
ហេតុការនេះកើតឡើងនៅវេលាម៉ោង៨និង៥០នាទីព្រឹកថ្ងៃទី២៨ធ្នូឆ្នាំ២០១៤នេះនៅចំណុចក្បែរផ្សារវត្តលៀប ស្ថិតក្នុងភូមិវត្តលៀប សង្កាត់ចំការសំរោង ក្រុងបាត់ដំបងខេត្តបាត់ដំបង។
ប្រភពពីសមត្ថកិច្ចបានឱ្យដឹងថា ម្ចាស់ផ្ទះខាងលើមានឈ្មោះងី វណ្ណៈភេទប្រុស អាយុ៣៦ឆ្នាំ ជាមន្ត្រីកងរាអាវុធហត្ថ មានប្រពន្ធឈ្មោះ ហាស់មាស អាយុ៣១ឆ្នាំ ជាអ្នកលក់គុយទាវនិងការហ្វេនៅកន្លែងកើតហេតុខាងលើ។
ប្រភពបានដដែលបានបន្តឱ្យដឹងទៀតថា អគ្គីភ័យនេះបណ្តាលមកពីការផ្ទុះកំប៉ុងហ្គាស់ដែលម្ចាស់ផ្ទះទុកគរក្នុងកញ្ច្រែងនៅជិតចង្ក្រានបាយទុកសំរាប់លក់ ដល់ពេលវាក្តៅក៍ផ្ទុះឡើងមួយហើយមួយទៀតមិនឈប់ក៍បង្កជាអណ្តាតភ្លើងសណ្ធោសន្ធៅ ផ្អើលដល់អ្នកភូមិនាំគ្នាយកប៉ពង់ពន្លត់អគ្គីភ័យមកជួយពន្លត់ ទើបរលត់តែពេលនោះក៍មានរថយន្តពន្លត់អគ្គីភ័យមកជួយបាញ់ពន្លត់អស់ទឹក១រថយន្តផងដែរ ទើបមិនបណ្តាលឱ្យរាលដាលដល់កន្លែងផ្សេងនិងផ្ទះទាំងមូល។
សមត្ថកិច្ចបានបញ្ជាក់ទៀតថា នេះជាការឈ្វេសប្រហេស របស់ម្ចាស់ផ្ទះនេះសំណាងល្អ បំពងហ្គាស់ដបធំដែលទុកនៅជិតនោះវាមិនផ្ទុះ បើផ្ទុះវិញប្រហែលជាផ្ទះនៅជុំវិញនេះត្រូវឆេះជួយពន្លត់មិនទាន់ទេ ព្រោះបំពងហ្គាស់ធំនេះវាមានចំហេះខ្លាំងណាស់ ។ចំណែកការខូចខាតវិញនៅមិនទាន់ដឹងអស់ប៉ុន្មាននៅឡើយទេ តែគ្រាន់តែដឹងថាសម្ភារៈនៅក្នុងផ្ទះឆេះខ្ទេចទាំងអស់៕