លោកស្រី ជីរ៉ាណាន់ វង្សមង្គល អគ្គទីប្រឹក្សាពាណិជ្ជកម្ម ប្រចាំស្ថានឯកអគ្គរាជទូតថៃ ប្រចាំកម្ពុជា បានលើក ឡើងនៅក្នុងសន្និសីទសារព័ត៌មាននាភោជនីយដ្ឋានទន្លេបាសាក់២ កាលព្រឹកថ្ងៃទី២៦ មករា ឆ្នាំ២០១៥ ស្តីពីពិព័រណ៍ពាណិជ្ជកម្មថៃ ដែលគ្រោងនឹងរៀបចំឡើងនៅថ្ងៃទី៥ ខែកុម្ភៈ រហូត ដល់ថ្ងៃទី៨ ខែកុម្ភៈ ឆ្នាំ២០១៥ នៅមជ្ឈមណ្ឌល កោះពេជ្រ ដោយមានការចូលរួម លោក សុរាផុន មៈនីផុង តំណែងភារៈធារីប្រចាំស្ថានឯកអគ្គរាជទូតថៃប្រចាំកម្ពុជា ផងដែរ ថា នៅក្នុងឆ្នាំ២០១៥នេះ ប្រទេសថៃ គ្រោងនឹងវិនិយោគជាមួយប្រទេសកម្ពុជា តាមរយៈការតាំងពិព័រណ៍ពាណិជ្ជកម្ម កម្ពុជា-ថៃ ឱ្យមានទឹក ប្រាក់ច្រើនជាង ៥ពាន់លានដុល្លារ ដែលនៅក្នុងឆ្នាំ២០១៤ ថៃបានវិនិយោគជាមួយកម្ពុជា តាមរយៈការតាំងពិព័រណ៍ពាណិជ្ជកម្ម មានទឹកប្រាក់សរុប ៥ពាន់លានដុល្លារ ។ ចំនួននេះ បានកើនឡើង ១២% បើធៀបជាមួយនឹងពាណិជ្ជកម្មកម្ពុជា-ថៃ នាឆ្នាំ២០១៣ មានទឹកប្រាក់ត្រឹមតែ ៤.៦០០លានដុល្លារ ។
លោកស្រី ជីរ៉ាណាន់ វង្សមង្គល បានបន្តថា តាមរយៈការដាក់តាំងបង្ហាញផលិតផលថៃ ក្នុងពិព័រណ៍ពាណិជ្ជកម្មថៃ នឹងមានការសហការល្អ អាចឲ្យអ្នកវិនិយោគកម្ពុជា ដែលមានបំណងចង់ចែកចាយបន្ត អាចមកទំនាក់ទំនងជាមួយម្ចាស់រោងចក្រផ្ទាល់ ។ នេះជាមូលហេតុធ្វើឲ្យពាណិជ្ជកម្មរវាង កម្ពុជា និងថៃ មានការកើនឡើង ហើយលោកស្រី ក៏សង្ឃឹមថា នៅក្នុងឆ្នាំ២០១៥នេះ ទំហំពាណិជ្ជកម្មថៃ-កម្ពុជា អាចកើនឡើងពី ១០ ទៅ ១៥% ហើយពិព័រពាណិជ្ជកម្ម នេះទៀតសោត ក៏ដើម្បីផ្សព្វផ្សាយផលិតផលរបស់ថៃ ដែលជាផលិតផលមានគុណភាពល្អ តម្លៃសមរម្យ និងអរគុណដល់អតិថិជន ដែលគាំទ្រផលិតផលរបស់ថៃ និងឲ្យអ្នកគាំទ្រទាំងអស់ មានឱកាសទិញទំនិញពីម្ចាស់រោងចក្រដោយ ផ្ទាល់ ក្នុងតំលៃថោកជាងនៅទីផ្សារ ។
លោកស្រី ជីរ៉ាណាន់ វង្សមង្គល បានបញ្ជាក់ថា ពិព័រណ៍ពាណិជ្ជកម្មថៃ នៅមជ្ឈមណ្ឌលសន្និបាតកោះពេជ្រ ចាប់ពីថ្ងៃទី៥ ខែកុម្ភៈ ដល់ថ្ងៃទី៨ ខែកុម្ភៈ នឹងមានក្រុមហ៊ុនចូលរួមទាំងអស់ ២៥០ក្រុមហ៊ុន មានស្តង់សរុប ២៥០ស្តង់ ក្នុងនោះមានគ្រប់មុខទំនិញដូចជា សំភារៈសំណង់ និងគ្រឿងបន្លាស់ម៉ាស៊ីន, អាហារ និងភេសជ្ជៈ, សំលៀកបំពាក់ និងវាយនភ័ណ្ឌ, សុខភាព និងសម្ភស្ស, សំភារៈប្រើប្រាស់ និងសំភារៈផ្ទះបាយ, វត្ថុអនុស្សាវរីយ៍ និងតុប តែងផ្ទះ, គ្រឿង បន្លាស់រថយន្ត និងឧបករណ៍, សំភារៈធ្វើពីស្បែក និងស្បែកជើង, សំភាៈអគ្គីសនី និងអេឡិចត្រូនិក ។
លោកស្រីបានបញ្ជាក់ទៀតថា ក្នុងឱកាសរៀបចំពិព័រណ៍ពាណិជ្ជកម្មនេះ ស្ថានពាណិជ្ជកម្មប្រចាំស្ថានទូតថៃ ក៏នឹងរៀបចំនូវសិក្ខាសាលាមួយជូនពាណិជ្ជករថៃ ដែលអញ្ជើញមកកម្ពុជា ដើម្បីអាចសិក្សា នូវបរិយាកាសវិនិយោគ របស់កម្ពុជា ដែលរៀបចំឡើងនៅថ្ងៃទី៤ ខែកុម្ភៈ ឆ្នាំ២០១៥ នៅសណ្ឋាគារសូហ្វីតែល ។ ហើយនៅរាត្រីថ្ងៃដដែលនោះ ស្ថានទូតថៃក៏នឹងរៀបចំរាត្រីស្រមោលសរថៃ «Thai Night» នៅស្ថានទូតផងដែរ ។
លោក សុរាផុន មៈនីផុង ភារៈធារីប្រចាំស្ថានទូតថៃនៅកម្ពុជា បានមានប្រសាសន៍ផងដែរថា ពិព័រណ៍ពាណិជ្ជ កម្ម ដែលនឹងត្រូវរៀបចំឡើងនេះ គឺរៀបចំឡើងស្របតាមការព្រមព្រៀងរបស់នាយករដ្ឋមន្ដ្រី នៃប្រទេសទាំង២ ដោយ ចង់បានទំហំពាណិជ្ជកម្មប្រទេសទាំង២ កើនឡើងក្នុងអត្រា ៣០%ក្នុងមួយឆ្នាំៗ ។ ពិព័រណ៍នេះ មិនត្រឹមតែជួយជំរុញ កំណើនពាណិជ្ជកម្មប៉ុណ្ណោះទេ វាថែមទាំងអាចជួយបង្កើនទំនាក់ទំនងល្អរវាងប្រទេសទាំង២ ថែមទៀតផង ៕