កំពង់ឆ្នាំង៖ បន្ទាប់ពីលោកអភិបាលខេត្តកំពង់ឆ្នាំងបានប្រជុំដាក់ចេញនូវវិធានការក្តៅអោយ លោកអភិបាលក្រុង ក៍ដូចជាមន្ទីរពាក់ព័ន្ធទាំងអស់ត្រូវយកចិត្តទុកដាក់ដល់អនាម័យសោភ័ណភាព បរិស្ថាន និងសណ្តាប់ធ្នាប់ក្នុងក្រុងកំពង់ឆ្នាំង និងនៅតាមបណ្តា ស្រុកទាំង៧ក្នុងខេត្ត ផង ដែរ ដើម្បីធ្វើអោយអ្នកទេសចរណ៍មកកំសាន្តច្រើនក្នុងខែនេះ ទើប អនាម័យ បរិស្ថាន សណ្តាប់ ធ្នាប់ និងសោភ័ណភាព ក្នុងក្រុងកំពង់ឆ្នាំង បានអភិវឌ្ឍន៍ និងកែលំអរយ៉ាងល្អប្រសើរ ។
នៅក្នុងកិច្ចប្រជុំគណៈបញ្ជាការឯកភាពខេត្តកំពង់ឆ្នាំងកាលពីថ្ងៃទី១២ ខែមករា ឆ្នាំ២០១៥កន្លងមកនេះ លោក ឈួរ ច័ន្ទឌឿន អភិបាលខេត្ត និងជាគណៈបញ្ជាការឯកភាពខេត្ត បានដាក់ចេញនូវវិធានការណ៍និងផែនការថ្មីៗ ដោយលោកបានមានប្រសាសន៍ថា៖ គ្រប់មន្ទីរដែលពាក់ព័ន្ធ ការិយាល័យនគរបាលសណ្តាប់ធ្នាប់ អាជ្ញាធរក្រុងកំពង់ឆ្នាំង និងអាជ្ញាធរស្រុកទាំងអស់ត្រូវយកចិត្តទុកដាក់ចំពោះ អនាម័យ បរិស្ថាន សណ្តាប់ធ្នាប់ និងសោភ័ណភាព នៅក្នុងក្រុងកំពង់ឆ្នាំង តាមទីផ្សារ និងតាមបណ្តាទីប្រជុំជននានា។
ដោយឡែកនៅតាមសួនច្បារនៅក្នុងក្រុងកំពង់ឆ្នាំងមានដូចជា៖ សួននាងកណ្តៀតក្អម សួនត្រីគល់រាំង និងនៅតាមច្រាំង ទន្លេផ្សារក្រោមត្រូវតែយកចិត្តទុកដាក់ត្រួតពិនិត្យជាប្រចាំ នូវការធ្វើអនាម័យ និងសណ្តាប់ធ្នាប់ ព្រោះកន្លែងទាំងនោះគឺជាកន្លែងដែលភ្ញៀវជាតិ អន្តរជាតិ ចេញចូលទស្សនាច្រើនជាងគេ។ ចំណែកនៅផ្សារឆ្នាំង និងផ្សារលើក៍ត្រូវរៀបចំសណ្តាប់ធ្នាប់ និងអនាម័យកុំអោយមានការលក់ ដូរលៀនលយមកលើចិញ្ចើមផ្លូវ ដែលអាចបង្កអោយមានគ្រោះថ្នាក់ចរាចរណ៍ និងប៉ះពាល់ដល់សណ្តាប់ធ្នាប់ អនាម័យ និងសោភ័ណភាពក្នុងទីក្រុង អ្នករឹងរុសត្រូវធ្វើការផាកពិន័យ។
ក្រោយពី ការចាត់វិធានការណ៍ក្តៅរបស់គណៈបញ្ជាការឯកភាពខេត្តរួចមកគេបានឃើញ នៅសួននាងកណ្តៀតក្អម ត្រូវបានអាជ្ញាធរក្រុងកំពង់ឆ្នាំងរៀបចំសណ្តាប់ធ្នាប់ អនាម័យបានល្អ ជាបន្តបន្ទាប់ ហើយចំពោះរូបសំណាកនាងកណ្តៀតក្អម រូបសំណាកគ្រុឌទ្រឆ្នាំង រូបសំណាក នាងគង្ហីង និងរូបត្រីគល់រាំងវិញគេក៏បានឃើញមានការលាបពណ៌ថ្មីយ៉ាងស្រស់ស្អាតគួរអោយ គយគន់ សំរាប់ ភ្ញៀវទេសចរណ៍ជាតិ និងអន្តជាតិដែលមកលេងកំសាន្តច្រើនផងដែរ។
លោក នូ ផល្គុណ អនុប្រធានមន្ទីរទេសចរណ៍ខេត្តបានអោយដឹងនៅក្នុងថ្ងៃឬី២៧ ខែមក រានេះថា៖នៅដើមខែមករាឆ្នាំនេះភ្ញៀវទេសចរណ៍ជាតិនិងអន្តជាតិមកកំសាន្តមានការកើនឡើងគួរអោយកត់សម្គាល់ ភ្ញៀវទាំងអស់នោះភាគច្រើនបានមកដើរទស្សនាលេងនៅតាមសួនផ្សារក្រោមនិងជិះកាណូតទស្សនាតាមដងទន្លេផ្សារក្រោមក្រុងកំពង់ឆ្នាំង។ ដោយឡែកនៅតាមរម ណីយដ្ឋាន នានាតាមស្រុកមួយចំនួនទៀត ក៏មានភ្ញៀវទេសចរណ៍កើនឡើងផងដែរ ការ កើនឡើងនៃភ្ញៀវទេសចរណ៍ទាំងនេះ គឺជាគោលដៅយុទ្ធសាស្ត្ររបស់រាជរដ្ឋាភិបាល ក្នុងកាត់ បន្ថយភាពក្រីក្រជូនប្រជាពលរដ្ឋយើង៕ 
