សមត្ថកិច្ចប្រឆាំងបទល្មើសសេដ្ឋកិច្ច នឹងសមត្ថកិច្ចការិយាល័យព្រហ្មទ័ណ្ឌ នៃស្នងការេដ្ឋាននគរបាលខេត្តកំពង់ឆ្នាំង ស្ទាក់ចាប់បានឡានដឹកឈើម្រះព្រៅ ជ្រកក្រោមគ្រឿងសង្ហារឹម ។ ម្ចាស់រថយន្តបានចុះរត់ទាំងប្តីនឹងប្រពន្ធ ក្រោយពីបានដឹងថា សមត្ថកិច្ចស្ទាក់ដេញចាប់រថយន្ត ដឹកឈើម្រះព្រៅរបស់គេ ដោយបានបន្សល់ទុករថយន្តសាំយ៉ុង ពណ៏ទឹកប្រាក់ ពាក់ស្លាក់លេខ ភ្នំពេញ ២D-២៨២០ នៅចំណុចស្ពានលោកតាជួន ស័ក្ត៥ ស្ថិតនៅក្នុងភូមិជ្រៃបាក់ ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ។
សមត្ថកិច្ចបានបង្ហើបឲ្យដឹងថា រថយន្តសាំយ៉ុងដែលបានដឹកគ្រឿងសង្ហារឹម ដោយមានបង្កប់ឈើម្រះព្រៅ បានធ្វើដំណើតាំងពីតំបន់វាលវែង ដោយបានឆ្លងកាត់ ខេត្តកំពង់ឆ្នាំង ។ ក្នុងរថយន្តនោះ មានគ្រឿងសង្ហារឹម ប្រភេទគ្រែ១កំប្ល៉េរ តុបាយធ្វើពីឈើគុលធ្នុង ចំនួន២ ប្រភេទតុបាយ ឈើគល់ម្រះព្រៅ ចំនួន១សន្លឹក នឹងប្រភេទឈើម្រះព្រៅ ចំនួន២សន្លឹក ដែលមានបណ្តោយ១ម៦តឹក ទទឹង១មកំរាស់១តឹក២ហ៊ុន ត្រួវបានសមត្ថកិច្ច ប្រគល់ជូនមន្ត្រីជំនាញរដ្ឋបាលព្រៃឈើខេត្ត ។
សូមបញ្ជាក់ថា ក្នុងការបង្ក្រាបរថយន្តដឹកឈើម្រះព្រៅនោះ ជនសង្ស័យបានបន្សល់នូវបញ្ជីឈ្មោះ លេខទូរស័ព្ទ តួនាទីរបស់មន្ត្រីជំនាញ រដ្ឋបាលព្រៃឈើ នឹងសមត្ថកិច្ចមួយចំនួន ដែលឈរជើងអមតាមដងផ្លូវជាតិលេខ៥ ចាប់តាំងពីតំបន់វាលវែង រហូតដល់ខេត្តកណ្តាល ដែលមានចំនួនជិត៥០នាក់ ដើម្បីងាយស្រួលទាក់ទងភ្លាមៗ នៅពេលដែលបានដឹកបទល្មើសឆ្លងកាត់ ដែលគេបានធ្វើសកម្មភាព ដឹកជញ្ជូនព្រៃឈើខុសច្បាប់ ។
មហាជនបានលើកឡើងថា បើគ្មានការបើដៃពីមន្ត្រីទាំងអស់នោះទេ បទល្មើសព្រៃឈើ ក៏មិនអាចធ្វើសកម្មភាពបានដែរ លុះត្រាតែមានការសូកប៉ាន់ជាប្រព័ន្ធ ទើបបទល្មើសព្រៃឈើ ត្រូវបានក្រុមឈ្មួញ ធ្វើសកម្មភាពអត់មានញញើតអ្វីឡើយ ។
សូមរម្លឹកថា ឯកឧត្តម ឱម យិនទៀង ប្រធានអង្គភាព ប្រឆាំងអំពើពុករលួយ ធ្លាប់បានប្រកាសជាសាធារណៈ នៅថ្ងៃទី២៦ ខែមករា ឆ្នាំ២០១៥ថា អង្គភាពនឹងបំបែកករណីអំពើពុករលួយជាប្រព័ន្ធ អំពើពុករលួយមួយនេះ ត្រូវបានឯកឧត្តមចាត់ទុកថា វាបានបំផ្លាញដល់វិស័យជាតិ ។ ឯកឧត្តមបានពោលថា ៤ឆ្នាំកន្លងមក គឺក្រោយការបង្កើតអង្គភាពប្រឆាំងអំពើពុករលួយ អង្គភាពនេះ បានបង្ក្រាបនិងចាប់ខ្លួន តែបុគ្គលដែលជំរិតទារប្រាក់គេ ។ តែការបំបែកករណី នៅឆ្នាំ២០១៥នេះ គឺជាការបំបែករណី ក្រុមពុករលួយជាបណ្តាញ ដែលបង្កអន្តរាយដល់ជាតិ ៕