ភ្នំពេញ៖ បុរសម្នាក់ ត្រូវបាននគរបាលខណ្ឌសែនសុខឃាត់ខ្លួន ករណីបង្កហឹង្សា លុះពេលឆែកឆេរ ស្រាប់តែរកឃើញថ្នាំញៀនចំនួន ០២ នាក់នៅជាប់ខ្លួន។
ហេតុការណ៍កើតឡើង កាលពីវេលាម៉ោង ២២និង៤០នាទី យប់ថ្ងៃទី៤ ខែកុម្ភៈ ឆ្នាំ២០១៥ នៅចំណុចផ្លូវរថភ្លើង ភូមិដីថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
បុរសសង្ស័យមានឈ្មោះ យិន សំវិជ្ជា អាយុ២៩ឆ្នាំ មុខរបររត់ម៉ូតូឌុប ស្នាក់នៅផ្ទះលេខ ៣៦៨ ផ្លូវរថភ្លើង ភូមិដីថ្មី សង្កាត់ភ្នំពេញថ្មី ខណ្ឌសែនសុខ។
សមត្ថកិច្ចប្រាប់ឲ្យដឹងថា ជនសង្ស័យឈ្មោះ យិន សំវិជ្ជា ត្រូវបានឃាត់ខ្លួនដោយសារករណីបង្កហឹង្សាទៅលើជនរងគ្រោះឈ្មោះ ខៀវ ឃន ភេទប្រុស អាយុ៣២ឆ្នាំ មុខរបររត់ម៉ូតូឌុប បច្ចុប្បន្ន រស់នៅផ្ទះជួល ផ្លូវលំ ភូមិដំណាក់ សង្កាត់ភ្នំពេញថ្មី ខណ្ឌសែនសុខ បណ្តាលឲ្យរងរបួសដាច់ស្បែកត្រចៀកខាងឆ្វេង និងពកថ្ងាសខាងមុខ។
សមត្ថកិច្ចប្រាប់បន្តថា ខណៈពេលនោះកម្លាំងល្បាតរបស់ប៉ុស្តិ៍រដ្ឋបាលភ្នំពេញថ្មី ប្រទះឃើញ ក៏ឃាត់បានជនសង្ស័យឈ្មោះ យិន សំវិជ្ជា រួចធ្វើការឆែកឆេរ ស្រាប់តែរកឃើញក្រាម ពណ៍សថ្លា ចំនួន ០២កញ្ចប់ នៅជាប់ខ្លួន ទើបនាំមកកាន់ទីស្នាក់ការប៉ុស្តិ៍សាកសួរជំហ៊ានដំបូង និងបញ្ជូនបន្តទៅកាន់អធិការដ្ឋាននគរបាលខណ្ឌសែនសុខ។
បច្ចុប្បន្នជនសង្ស័យកំពុងឃាត់ខ្លួនបណ្តោះអាសន្ន នៅអធិការដ្ឋាននគរបាលខណ្ឌសែនសុខ ដើម្បីរង់ចាំកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការតាមផ្លូវច្បាប់៕ ដោយ តុង សីហា