ភ្នំពេញ៖កម្មករសំណង់ម្នាក់បានស្លាប់នៅកន្លែងកើតហេតុ និង២នាក់ផ្សេងទៀតរងរបួសធ្ងន់ ក្នុងករណីឆក់ចរន្តអគ្គិសនី នៅក្នុងការដ្ឋានសំណង់មួយកន្លែងផ្លូវ២០០៤ បង្កការភ្ញាក់ផ្អើល ដល់សមត្ថកិច្ច កាលពីវេលាម៉ោង ១៣ និង៤០នាទី រសៀលថ្ងៃទី៩ ខែកុម្ភៈ ឆ្នាំ២០១៥ ស្ថិតក្នុងភូមិត្រពាំងល្វា សង្កាត់កាកាប ខណ្ឌពោធិសែនជ័យ រាជធានីភ្នំពេញ។
សមត្ថកិច្ចប្រាប់ជំហ៊ានដំបូងឲ្យដឹងថា ជនរងគ្រោះទាំង ៣នាក់ ទី១ឈ្មោះ ណែត ភេទប្រុស អាយុប្រហែលជាង៣០ឆ្នាំ មុខរបរជាងសំណង់ (ស្លាប់) ទី២ឈ្មោះ ហ៊ូប ភេទ ប្រុស អាយុប្រហែលជាង៦០ឆ្នាំ មុខរបរជាងសំណង់ (របួសធ្ងន់) និងទី៣ឈ្មោះ ណាង ភេទប្រុស អាយុប្រហែល២០ឆ្នាំ មុខរបរជាងសំណង់ (របួសធ្ងន់) ទាំង៣នាក់ មានស្រុកកំណើតនៅភូមិពាំងត្រគៀត ឃុំឧត្តមសុរិយ៉ា ស្រុកត្រាំកក់ ខេត្តតាកែវ។
សមត្ថកិច្ចប្រាប់បន្តថា មុនពេលកើតហេតុជនរងគ្រោះទាំង៣នាក់ បានជញ្ជូនដែកសរសៃ ឡើងទៅជាន់ទី៤ ដើម្បីសាងសង់បន្ត ដោយ២នាក់ នៅខាងក្រោម និងម្នាក់ទៅខាងលើ ខណៈពេលនោះស្រាប់តែសរសៃដែក បានទៅប៉ះនឹងខ្សែភ្លើងស្រាត នៅក្បែរការដ្ឋានសំណង់នោះ បណ្តាលឲ្យឆ្លងចរន្តឆក់ជនរងគ្រោះទាំង៣នាក់ ដោយម្នាក់ឈ្មោះ ណែត បានដាច់ខ្យល់ស្លាប់ភ្លាមៗនៅកន្លែងកើតហេតុ។ ចំណែកឈ្មោះ ហ៊ូប និង ឈ្មោះ ណាង រងរបួសធ្ងន់ ត្រូវបានដឹកបញ្ជូនទៅកាន់មន្ទីរពេទ្យកាល់ម៉ែត ដើម្បីជួយសង្គ្រោះអាយុជីវិត។
សមត្ថកិច្ចបន្តទៀតថា ករណីនេះធ្វើឲ្យការភ្ញាក់ផ្អើលដល់នគរបាលមូលដ្ឋាន ក៏ដូចជា អាជ្ញាធរខណ្ឌពោធិសែនជ័យ ចុះពិនិត្យដល់កន្លែងកើតហេតុ ប៉ុន្តែរហូតមកដល់ពេលនេះ មិនទាន់ទទួលបានលទ្ធផលនៅឡើយទេ ៕