រតនគិរីៈ អង្គការសម្ព័ន្ធមិត្តសត្វព្រៃសហការជាមួយកងរាជអាវុធហត្ថលើផ្ទៃប្រទេស និងក្រុមអន្តរាគមន៍បង្ក្រាបបទល្មើសសត្វព្រៃចល័តនៃរដ្ឋបាលព្រៃឈើនៅព្រឹកថ្ងៃទី១១ ខែកុម្ភៈ ឆ្នាំ២០១៥ នេះបានចុះត្រួតពិនិត្យឆែកឆេរបទល្មើសសត្វព្រៃក្នុងផ្សារបានលុង។ ប្រតិបត្តិការខាងលើនេះដោយមានការឯកភាពនិងដឹកនាំបញ្ជាតាមទូរស័ព្ទពីលោកលាវ ស្រេង ព្រះរាជ្ញអាជ្ញាអមសាលាដំបូងខេត្តរតនគិរី។
ក្រុមប្រតិបត្តិការដែលចុះត្រួតពិនិត្យឆែកឆេរបទល្មើសសត្វព្រៃប្រាប់ឲ្យដឹងថា ដោយមានការចូលរួមពីលោកជាម សុផាត អ្នកគ្រប់គ្រងផ្សារបានប្រទះឃើញនិងដកហូតវត្ថុតាងបទល្មើសសត្វព្រៃរួមមានសាច់ឈ្លូសស្រស់ចំនួន១៤.៥០គីឡូក្រាម, សាច់ជ្រូកព្រៃ១០.៣០គីឡូក្រាម និងអាញីក្រៀម៥ក្បាលនិងឃាត់អាជីករចំនួន៣នាក់រួមមាន ទី១.ឈ្មោះ សេង សុភ័ក្ត្រ ភេទស្រី អាយុ៣០ឆ្នាំ ទី២.ឈ្មោះ វី រ៉ែនភេទស្រី អាយុ៤៣ឆ្នាំ ទី៣.ឈ្មោះយួន ម៉េងលី ភេទស្រី អាយុ៤៩ឆ្នាំ។ ក្រុមការងារចម្រុះបានធ្វើការដកហូតជាបណ្តោះអាសន្ននូវវត្ថុតាងខាងលើដើម្បីរៀបចំចងក្រងសំណុំរឿងនិងបំពេញនីតិវិធីទៅតាមផ្លូវច្បាប់ព្រៃឈើ។
ដោយឡែកក្រុមអាជីវករខាងលើត្រូវបានសមត្ថកិច្ចចម្រុះធ្វើការណែនាំឲ្យបញ្ឈប់ការលក់ដូរសត្វព្រៃទៀត បើសិនថ្ងៃក្រោយនៅតែប្រកបរបរនេះទៀតនោះត្រូវប្រឈរមុខផ្លូវច្បាប់ រួចក៏បានអនុញ្ញាតិឲ្យវិលត្រលប់ទៅលំនៅដ្ឋានវិញពោលគឺពុំមានទោសទណ្ឌអ្វីនោះទេ។
គួរបញ្ជាក់ផងដែរថាភោជនីយដ្ឋានធំៗនៅក្នុងក្រុងបានលុងកំពុងតែយកសត្វព្រៃគ្រប់ប្រភេទធ្វើម្ហូបអាហារតាមតែភ្ញៀវកំម៉ង់ បើទោះបីហាងខាងលើនេះកន្លងមកត្រូវបានអង្គការសម្ព័ន្ធមិត្តសត្វព្រៃ(WILD LIFE ALLIANCE)ហៅមកធ្វើកិច្ចសន្យានិងផាកពិន័យក៏ដោយ៕
