ខេត្តប៉ៃលិន ៖ បុរសម្នាក់ដែលគេស្គាល់ថា ជាអ្នកបកប្រែឱ្យក្រុមហ៊ុនវៀតណាម បានស្រវឹងស្រាជោកជាំជិះម៉ូតូឌុបគ្នាក្នុងល្បឿនលឿន លុះដល់ចំណុចផ្លូវកោងកាច់ចង្កូតមិនទាន់ បណ្តាលឱ្យដួលបោកក្បាលទៅនឹងថ្នល់ ស្លាប់អ្នកបើកបរម្នាក់ ពេលបញ្ជូនមកសង្គ្រោះនៅមន្ទីរពេទ្យបង្អែកខេត្ត ដោយសារបួសធ្ងន់ ,ចំណែកឯបុរសម្នាក់ទៀតដែលជិះពីក្រោយរងរបួសស្រាល ។ហេតុការណ៍គ្រោះថ្នាក់នេះ បានកើតឡើងកាលពីវេលាម៉ោង៤និង៣៥នាទីរសៀល ថ្ងៃទី១១ ខែកុម្ភៈ ឆ្នាំ២០១៥ នៅចំណុចផ្លួវលំមួយខ្សែ ក្នុងភូមិចំការកាហ្វេ សង្កាត់ទូលល្វា ក្រុងប៉ៃលិន ខេត្តប៉ៃលិន ។
តាមប្រភពពីសាច់ញាតិ បានឲ្យអ្នកយកពត៌មានដឹងថា៖ បុរសរងគ្រោះដែលបាត់បង់ជីវិតមានឈ្មោះ សាផន ចិត្រា ហៅបារាំង ភេទប្រុស អាយុ៣៥ឆ្នាំ ជាអ្នកបកប្រែភាសាឲ្យក្រុមហ៊ុនវៀតណាម មានស្រុកកំណើតភូមិកំប៉ោ ឃុំពងរ ស្រុកពងរ ខេត្តស្វាយរៀង ,បច្ចុប្បន្នរស់នៅជាមួយក្រុមហ៊ុនវៀតណាម ក្នុងភូមិបរតាំងស៊ូ សង្កាត់បរយ៉ាខា ក្រុងប៉ៃលិន ខេត្តប៉ៃលិន ជិះម៉ូតូម៉ាកសង់កូរ៉េពណ៌ខៀវ អត់ស្លាកលេខ រងការខូចខាតយ៉ាងដំណំ ។ ចំណែកម្នាក់ទៀតរងរបួសស្រាលឈ្មោះ ឯក សាត ភេទប្រុស អាយុ៣០ឆ្នាំ ជាកម្មករ (អ្នកជិៈពីក្រោយ) រស់នៅភូមិសួនអំពៅលិច សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
ប្រភពពីកន្លែងកើតហេតុ បានឲ្យដឹងថា៖គេឃើញបុរសពីរនាក់ជិៈម៉ូតូមួយគ្រឿងចេញពីហាងផឹកស៊ី ក្នុស្ថានភាពស្រវឹងជោកជាំ រេចង្កូតពេញផ្លួវ លុះដល់ចំណុចផ្លួវកោង ទប់ចង្កូតមិនជាប់ក៏ដួលតែម្តង ។ ប្រភពបន្តថា ជនរងគ្រោះទាំង២នាកជិះម៉ូតូក្នុងល្បឿនលឿន ហើយអត់ពាក់មួកសុវត្ថិភាពទៀត ទើបបណ្តាលឱ្យដួលបោកក្បាលស្លាប់បាត់បង់ជីវិត ៕