ខេត្តកំពង់ឆ្នាំង ដើម្បីការពារ និង ទប់ស្កាត់បទល្មើសនេសាទ ខេត្តកំពង់ឆ្នាំង បានបង្កើតឆ្មាំការពារ ដែនអភិរក្ស៨ក្រុម សម្រាប់អតីតឡូត៍នេសាទចំនួន៧ ។សមាសភាពអ្នកការពារទាំងនោះ រួមមាន មកពីមន្ត្រីជំនាញ នគរបាល យោធា មន្ត្រីកងរាជអាវុធហត្ថ ជាកម្លាំងស្នូល ចំណែកអាជ្ញាធរមូលដ្ឋាន និង សហគមន៍ គឺជាកម្លាំងគាំទ្រ ក្នុងសកម្មភាពនេះ ។
នាយខណ្ឌជលផលកំពង់ឆ្នាំង លោក សោម ភិរុណ បានថ្លែងថា ដោយសារតែឡូត៍នីមួយៗ មានវិសាលភាពធំធេង ដូច្នេះត្រូវតែបែងចែកកម្លាំងការពារ៨ក្រុម ហើយក្រុមនីមួយ នឹង ទទួលបានរបបឧបត្ថម្ភក្នុង១ខែ ប្រាក់ចំនួន៦០ម៉ឺនរៀល ។
ជាមួយគ្នានេះដែរ ស្នងការរងនគរបាលខេត្ត លោក ជុន ថារិទ្ឋ ក៍បានឲ្យដឹងដែរថា ក្រុមអ្នកការពារទាំងអស់ ត្រូវបានអនុញ្ញាតឲ្យប្រើប្រាស់អាវុធ(កាំភ្លើង) ។ តែលោកបានដាក់វិធានការតឹងរឹង មិនឲ្យមានការបាញ់បោះសេរីទេ ព្រោះអាវុធសុទ្ធតែមានចុះលេខ ហើយគ្រាប់ក៍មានកំណត់ និង ត្រូវត្រួតពិនិត្យក្នុងរយៈពេល១ខែម្ដង ។ ក្នុងនោះ លោកស្នងការរង បានធ្វើការផ្ដាំផ្ញើ ឲ្យអ្នកការពារគ្រប់ក្រុមសាមគ្គីគ្នា និង ជៀសវាង ឲ្យឆ្ងាយពីការឃុបឃិត ជាមួយជនល្មើស ដើម្បីទប់ស្កាត់បទល្មើសនេសាទ ឲ្យមានប្រសិទ្ធភាព ៕
