ភ្នំពេញ៖ រថយន្តកាមរីមួយគ្រឿងបើកបោះពួយជ្រុលទៅបុករថយន្តកូរ៉ូឡាមួយគ្រឿងឈប់ចតក្បែរចិញ្ចើមរង់ចាំមិត្តភ័ក្តិ ចំពីក្រោយរងការខូចខាត ហើយរថយន្តកាមរីព្យាយាមបើករត់ដល់មជ្ឈមណ្ឌលកោះពេជ្រក៏ត្រូវសមត្ថកិច្ចឃាត់ជាប់។ ហេតុការណ៍នេះបានកើតឡើងកាលពីវេលាម៉ោង១១យប់ថ្ងៃទី៣ខែមិនា ឆ្នាំ២០១៥ ត្រង់ចំណុចក្បែរស្ថានីយប្រេងឥន្ធនៈកាល់តិចស្ដុបបូកគោ តាមបណ្ដោយផ្លូវ ម៉ៅសេទុង កែងផ្លូវលេខ៧១ ស្ថិតក្នុងសង្កាត់ទន្លេបាសាក់ ខណ្ឌចំការមន។
ប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុមានរថយន្តកូរ៉ូឡាមួយគ្រឿង ពណ៌ក្រហម ពាក់ស្លាកលេខ ភ្នំពេញ 2J-8710 ជិះធ្វើដំណើរដោយបុរសនារី២នាក់តាមបណ្ដោយ ផ្លូវម៉ៅសេទុង ទិសដៅពីលិចទៅកើត មកដល់ចំណុចកើតហេតុរថយន្តក៏បានឈប់ចតក្បែរចិញ្ចើមផ្លូវ រង់ចាំមិត្តភ័ក្តិដោយបុរសជាអ្នកបើករថយន្តបានចេញមកឈរពីក្រោយរថយន្ត ស្រាប់តែមានរថយន្ត កាមរីគូទប៉ោងមួយគ្រឿង ពណ៌ស្លែ ពាក់ស្លាកលេខ
ភ្នំពេញ 2D-5094 បើកបរដោយបុរសម្នាក់២នាក់ ធ្វើដំណើរស្របទិសគ្នាមកពីក្រោយក៏បុកប៉ះរថយន្តកូរ៉ូឡាចំពីក្រោយជំហៀងខាងឆ្វេងខ្ទេចរងការ ខូចខាត ហើយរថយន្តកាមរីខូចខាតខាងមុខខ្ទេចជំហៀងខាងស្ដាំ សំណាងល្អបុរសម្ចាស់រថយន្តកូរ៉ូឡា មិនរងគ្រោះថ្នាក់ ហើយ
រថយន្តកាមរីមិនបានឈប់នៅទទួលខុសត្រូវនោះទេ គឺបានបន្ថែមល្បឿន ទៅមុខ ដើម្បីរត់គេច ក៏ត្រូវសមត្ថកិច្ចស្ទាក់ឃាត់បាននៅក្បែរមជ្ឈមណ្ឌលកោះពេជ្រ រួចនាំមក កន្លែងកើតហេតុដើម្បីអោយភាគីទាំង២ធ្វើការសម្របសម្រួលគ្នា ប៉ុន្តែមិនត្រូវរ៉ូវទើបសម្រេចអោយ សមត្ថកិច្ចជំនាញវាស់វែងយកទៅការិយាល័យចរាចរជើងគោកនៃស្នងការដ្ឋាននគរបាលរាជធានីភ្នំពេញ ធ្វើការដោះស្រាយតាមច្បាប់៕
