បន្ទាយមានជ័យៈ ពីមួយថ្ងៃទៅមួយថ្ងៃភាពអាណាធិបតេយ្យនៃការដឹកសំពីងសំពង ខុសបច្ចេកទេស កាន់តែច្រើនទៅពីសំណាក់រថយន្តតាក់ស៊ី និងរថយន្តតូចធំយ៉ាងណាក៏ដោយ ក៏បញ្ហាទាំងនេះសមត្ថកិច្ចអាជ្ញាធរ ហាក់ដូចជាមិនខ្វល់គ្មានចំណាត់ការណាក្នុងការទប់ស្កាត់ឡើយ ។
ជារៀងរាល់ថ្ងៃគេសង្គេតឃើញការរីករាលដាលនៃរថយន្តតាក់ស៊ីប្រភេទកាំម៉ារីកាន់តែច្រើនទៅក្នុងការ ផ្ទុកទំនិញលើដំបូលរថយន្តយ៉ាងសំពីងសំពង ដោយគ្មានសមត្ថកិច្ចណាខ្វាយខ្វល់ ឬចាត់វិធានការក្នុងការផាកពិន័យ ឬទប់ស្កាត់ឡើយ ។ សកម្មភាពដឹករបៀបនេះកើតឡើងមិន
ថា យប់ ឬថ្ងៃឡើយ តាមផ្លូវជាតិលេខ៥ និងលេខ៦ ពីប៉ោយប៉ែតទៅសៀមរាប ឬពីសៀមរាបទៅបាត់ដំបង ។ ភាគច្រើននៃរថយន្តដឹករបៀបនេះជារថយន្តដឹកផ្លែឈើ ដឹកទំនិញចាភួយ និងរថយន្តតាក់ស៊ី ។ រថយន្តប្រភេទកាំម៉ារី ដែលលើកឡើងខាងលើនេះអាចដឹកដល់ទៅគ្រែ ទូរទឹកកក ដឹកប៊ូដុង និងទំនិញប្រភេទជាកេសដល់ទៅរាប់សិបកេស ។
ទាក់ទងនិងការដឹកអាណាធិបតេយ្យសំពីងសំពងបែបនេះ ស្នងការនគរបាលខេត្តបន្ទាយមានជ័យ ក៏ដូជាអាជ្ញាធរខេត្តតែងលើកឡើងជាញឹកញាប់ រហូតដល់សមត្ថកិច្ចចរាចរជើងគោកក៏បានចុះធ្វើការអប់រំ និងធ្វើកិច្ចសន្យា ដល់ម្ចាស់យានយន្តទាំងនោះជាញឹកញាប់ផងដែរ តែការធ្វើបែបនេះហាក់ដូចជាគ្មានប្រយោជនអ្វីសោះ ។
ប្រជាពលរដ្ឋបានលើកឡើងថា បើគ្រាន់តែធ្វើការអប់រំមិនមានចំណាត់ការធ្ងន់ធ្ងរទៅលើតៃកុងរថយន្តទាំងនោះទេ វាមិនអាចលុបបំបាត់ភាពអាណាធិបតេយ្យទាំងនោះឡើយ ។
លោក សន គឹមសូគ៌ នាយការរិយាល័យនគរបាលចរាចរជើងគោកនៃស្នងការនគរបាលខេត្តបន្ទាយមានជ័យ បានអោយដឹងថា បច្ចុប្បន្នសមត្ថកិច្ចកំពុងមានវិធានការលើបញ្ហារថយន្ត
ដឹកសំពីងសំពងនេះ ហើយកន្លងមកដោយសាតែសមត្ថកិច្ចជួបនូវបញ្ហាលំបាកមួយចំនួនទើបបានត្រឹមតែអប់រំណែនាំ និងធ្វើកិច្ចសន្យា ៕