ភ្នំពេញ បុរសម្នាក់ស្រវឹងស្រាជោគជាំ បានបើករថយន្តសេរីទំនើបមួយគ្រឿង ក្នុងល្បឿនយ៉ាងលឿន ជ្រុលទៅបុករ៉ឺម៉កម៉ូតូកង់បី និងម៉ូតូមួយគ្រឿងទៀត ប៉ើងឡើងលើឃឿន បណ្តាលរងការខូចខាត ថែមទាំងបុកបារ៉ាសឃាំងផ្លូវ ជាប់របងព្រះបរមរាជវាំង ចំនួន២ផ្ទាំង តែសំណាងល្អ មិនបង្កឱ្យអ្នកណាម្នាក់ រងរបួសនោះទេ ។ ហេតុការណ៍គ្រោះថ្នាក់ចរាចរណ៍ខាងលើនេះ កើតឡើងកាលពីវេលាម៉ោង១២នឹង៤៥នាទីរំលងអាធ្រាត ឈានចូលថ្ងៃទី៩ ខែមិនា ឆ្នាំ២០១៥ ខាងជើងនឹងព្រះបរមរាជវាំង តាមបណ្តោយផ្លូវព្រះសុធារស កែងផ្លូវលេខ១៨៤ ស្ថិតក្នុងសង្កាត់ជ័យ ជំនះ ខណ្ឌដូនពេញ ។
សាក្សីនៅកន្លែងកើតហេតុ បានឱ្យដឹងថា មុនពេលកើតហេតុ គេបានឃើញរថយន្តសេរីទំនើបមួយគ្រឿង ពណ៍ប្រផេះ ពាក់់ស្លាកលេខ ភ្នំពេញ 2N-5716 ដោយមានបុរស២នាក់ក្នុងរថយន្ត ទំនងជាស្រវឹងស្រាជោគជាំ បើកក្នុងល្បឿនយ៉ាងលឿន តាមបណ្តោយផ្លូវសុធារស ទិសដៅពីជើងទៅត្បូង ខណះមកដល់ចំណុចកើតហេតុ បានបត់ឆ្វេងបំរុងឡើងទៅផ្លូវលេខ១៨៤ តែបួសចង្កូតមិនទាន់ ក៏ជ្រុលទៅបុករះរ៉ឺម៉កម៉ូតូកង់បី និងម៉ូតូមួយគ្រឿង ដែលឈប់ចតស្ងៀម បណ្តាលឱ្យប៉ើងឡើងលើឃឿន រងការខូចខាត ថែមទាំងបុកបារ៉ាសឃាំងផ្លូវ ជាប់របងព្រះបរមរាជវាំង ចំនួន២ផ្ទាំងទៀត តែសំណាងល្អ មិនបង្កឱ្យអ្នកណាម្នាក់រងរបួសនោះទេ ។
សាក្សីដដែលបន្តថា ភ្លាមនោះសមត្ថកិច្ចដែលនៅជិតកន្លែងកើតហេតុ បានមកអន្តរាគមន៍ភ្លាមៗ ឃាត់អ្នកជិះរត់យន្តទាំង២នាក់ ទៅបុស្តិ៍នគរបាលរដ្ឋបាលជ័យជំនះ ជាបណ្តោះអាសន្ន និងបានសហការជាមួយជំនាញ ធ្វើការវាស់វែង ស្ទូចយករថយន្តបង្ក រ៉ឺម៉កម៉ូតូកង់បី និងម៉ូតូ យកទៅរក្សាទុក នៅការិយាល័យចរាចរណ៍ជើងគោក រាជធានីភ្នំពេញ រង់ចាំដោះស្រាយនាពេលក្រោយ ៕