ភ្នំពេញ យុវជន២នាក់បានរងរបួសធ្ងន់ ត្រូវបានរថយន្តសាមុយ ដឹងយកទៅសង្គ្រោះនៅមន្ទីរពេទ្យភ្លាមៗ និងម្នាក់ រងរបួសស្រាល ដោយសារតែគេបានជិះម៉ូតូ ទិសដៅបញ្ច្រាសទិសបុកគ្នាពេញទំហឹង ចំណែកម៉ូតូរងការខូច ខាតទាំងសងខាង ។ ហេតុការណ៍នេះបានកើតឡើង កាលពីវេលាម៉ោង៩នឹង៤០នាទីយប់ ថ្ងៃទី៧ ខែមិនា ឆ្នាំ២០១៥ តាមបណ្តោយផ្លូវព្រះស៊ីសុវត្ថិ ស្ថិតក្នុងសង្កាត់ស្រះចក ខណ្ឌដូនពេញ ។
សាក្សីដែលបានឃើញហេតុការណ៍ បានប្រាប់ឱ្យដឹងថា នៅមុនពេលកើតហេតុ គេបានឃើញយុវជន២នាក់ ជិះម៉ូតូឌ្រីម សេ១២៥ពណ៍ខ្មៅ ពាក់ស្លាករដ្ឋ 28 1-0130 ឌុបគ្នាក្នុងល្បឿនលឿន តាមបណ្តោយផ្លូវព្រះស៊ីសុវត្ថិ ទិសដៅពីជើងទៅត្បូង លុះមកដល់ចំណុចមុខភោជនីយដ្ឋាន កូលាបដូនពេញ ស្រាប់តែមានម៉ូតូវីវ៉ា ពណ៍ខ្មៅ ពាក់ស្លាកលេខ ភ្នំពេញ 1CI-1578 ជិះក្នុងល្បឿនលឿនដូចគ្នា ទិសដៅបញ្ច្រាសទិសបុកគ្នាពេញទំហឹង បណ្តាលឱ្យអ្នកជិះម៉ូតូវីវ៉ារបួសធ្ងន់ និងដាច់ម្រាមជើង២ និងម្ខាងទៀតរបួសធ្ងន់ និងស្រាល ត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យភ្លាមៗ ចំណែកម៉ូតូ រងការខូចខាតទាំងសងខាង ។
ក្រោយកើតហេតុ សមត្ថកិច្ចមូលដ្ឋាន បានចុះមកអន្តរាគមន៍ ដល់កន្លែងកើតហេតុ និងបានសហការជាមួយជំនាញ យកម៉ូតូទាំង២គ្រឿង ទៅរក្សាទុកនៅអធិការដ្ឋាន នគរបាលខណ្ឌដូនពេញ រង់ចាំដោះស្រាយ នាពេលក្រោយ ៕
