សៀមរាប : យុវសិស្សម្នាក់នេះមានឈ្មោះ ភី សុវណ្ណឌី មានអាយុ ១៧ ឆ្នាំ រស់នៅក្នុងភូមិពួក ចាស់ ឃុំ ពួក ស្រុកពួក ខេត្តសៀមរាប ជាសិស្សរៀននៅសាលាវិទ្យាល័យពួកថ្នាក់ទី១២ ។ ត្រូវបានកម្លាំងការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាប
សហការណ៍ជាមួយ កម្លាំងអនុរក្សពន្ធនាគារ ខេត្ត និង កម្លាំងអធិការដ្ឋាននគរបាលស្រុកពួក ខេត្តសៀមរាបផងនោះ ។ បានធ្វើការតាមដានស្រាវជ្រាវនិងឈានដល់ការចាប់ឃាត់ខ្លួនយុវសិស្សម្នាក់នេះដែលជាជនសង្ស័យបានកាលពី ថ្ងៃទី ២១ ខែ មិនា ឆ្នាំ ២០១៥ កន្លងទៅ នៅក្នុងភូមិ សាស្ត្រស្រុកពួកខេត្តសៀមរាប រួចមកកាន់ការិយាល័យនគរបាលជំនាញដើម្បីធ្វើការសួរនាំបន្តជាប់ពាក់ព័ន្ធក្នុងករណី រក្សាទុកដឹកជញ្ជូនដោយខុសច្បាប់នូវសារធាតុញៀនក្នុងពន្ធនាគារ ខេត្តសៀមរាប ។ លោក វរសេនីយ៍ទោ អ៊ុំ សាអាត នាយការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាបបានអោយដឹងថាដោយអនុវត្តតាមការយកចិត្តទុកដាក់ខ្ពស់ជាប្រចាំពីសំណាក់លោក ឩត្តមសេនីយ៍ទោ សត ណាឌី ស្នងការនគរបាលខេត្តសៀមរាប ក៏ដូចជាដើម្បីធ្វើអោយការអនុវត្តនូវគោលនយោបាយភូមិឃុំមានសុវត្ថិភាព អោយ កាន់តែមានប្រសិទ្ធភាពខ្ពស់។ ទើបជាក់ស្តែងជនសង្ស័យភេទប្រុស ដែលសមត្ថកិច្ចចាប់ឃាត់ខ្លួនបាននេះ មិនអាចរត់គេចពីសមត្ថកិច្ចជំនាញបានឡើយបន្ទាប់ពីរូបគេបានយកសម្ភារះប្រើប្រាស់មួយចំនួនទៅអោយមិត្តភ័ក្ត្ររបស់គេដែលជាប់ពន្ធនាគាររួចបានបង្កប់ថ្នាំញៀនប្រភេទម្សៅមេតំហ្វេតាមីន ១ កញ្ចប់ មានទម្ងន់ ០ , ៧ ក្រាមនៅក្នុងដបសាប៊ូ ។ លោក វរសេនីយ៍ទោ អ៊ុំ សាអាត បានបន្តអោយដឹងទៀតថា បន្ទាប់ពីសមត្ថកិច្ចបានធ្វើការឃាត់ខ្លួននិងបានសួរនាំចំពោះជនសង្ស័យជាប់ពាក់ព័ន្ធក្នុងករណី រក្សាទុកដឹកជញ្ជូនដោយខុសច្បាប់នូវសារធាតុញៀនក្នុងពន្ធនាគារ ហើយនោះនៅមុខសមត្ថកិច្ចជនសង្ស័យបានឆ្លើយសារភាពថារូបគេពិតជាបានប្រព្រឹត្តនៅករណីខាងលើពិតប្រាកដមែន ។ បច្ចុប្បន្នទាំងជនសង្ស័យនិងវត្ថុតាងត្រូវបានសមត្ថកិច្ចកសាងសុំណុំរឿងបញ្ជូនទៅកាន់សាលាដំបូងខេត្តសៀមរាបហើយ ដើម្បីចំណាត់ការទៅតាមផ្លូវច្បាប់បន្ត ៕
លោក ខេង ខេមរា
