កាលពីវេលាម៉ោង២រសៀល ថ្ងៃទី២១ ខែមិនា ឆ្នាំ២០១៥ មានករណីប្លន់ប្រដាប់អាវុធមួយ នៅផ្ទះលក់គ្រឿងអលង្ការចំនួន២កន្លែងជាប់គ្នា ស្ថិតក្នុងបរិវេណផ្សារភ្នំក្រវ៉ាញ ខេត្តពោធិសាត់ ។
ប្រភពពីម្ចាស់ផ្ទះហេតុការណ៍ខាងលើ បានអោយដឹងថា ក្រុមចោរចូលមកប្លន់ ផ្ទះលក់គ្រឿងអលង្ការ មានគ្នាចំនួន៦នាក់ ប្រដាប់ដោយអាវុធអាកាស្វាយបត់ចំនួន១ដើម ជិះម៉ូតូចំនួន២គ្រឿង ដែលក្រុមជនសង្ស័យទាំងនោះ មានអាយុប្រហែលខ្ទង់ជាង៣០ឆ្នាំ រាងខ្ពស់ ពាក់មួក និងអ្នកបើកបរពាក់មួកសុវត្ថិភាព បានចូលមក ភ្ជង់ម្ចាស់ផ្ទះ រួចយកពូថៅដៃដៃ វាយបំបែកទូគ្រឿងអលង្ការ ប្រមូលរួចឡើងម៉ូតូគេចខ្លួនបាត់ស្រមោល ។
ម្ចាស់ផ្ទះដែលរងគ្រោះ ដោយករណីចោរប្លន់ប្រដាប់អាវុធខាងលើនេះ មានឈ្មោះ ម៉ី រីតា ភេទស្រី អាយុ២០ឆ្នាំ ត្រូវចោរប្លន់យកគ្រឿងអលង្ការ ប្លាទីនចំនួន៦០តំឡឹង មាសចំនួន៤០តំឡឹង និងឈ្មោះ ខេង សម្ភស្ស អាយុ១៩ឆ្នាំ ត្រូវចោរប្លន់ប្លាទីន អស់ចំនួន៣០តំឡឹង ។
ក្រោយកើតហេតុករណីប្លន់យ៉ាងកក្រើកនេះ ដោយមានបញ្ជាពីឯកឧត្តម ម៉ៅ ធនិន្ទ អភិបាល ខេត្តពោធិសាត់ លោក សារុន ចន្ធី ស្នងការនគរបាល ខេត្តពោធិសាត់ បានបញ្ជាកម្លាំងចុះស្រាវជ្រាវ ដើម្បីវែកមុខរកក្រុមចោរប្លន់ទាំងនោះ មកផ្តន្ទាទោសទៅតាមផ្លូវច្បាប់ ប៉ុន្តែរហូតមកដល់ពេលនេះ ពុំអាចកំណត់មុខសញ្ញាបាននៅឡើយទេ ៕