គ្រោះថ្នាក់ចរាចរណ៍មួយ ដែលបង្កឡើងដោយសារតែរថយន្តប្រូស បើកក្នុងល្បឿនលឿន ជ្រុលទៅបុករថយន្តហាយឡែនឌ័រ កំពុងឆ្លងកាត់ទទឹងផ្លូវ ហើយរថយន្តបង្កបានជ្រុលចង្កូត ទៅបុកដើមឈើទៅមុខលែងរួច រងការខូចខាតទាំងសងខាង នៅចំណុចផ្លូវលេខ២១៤ កែងនឹងផ្លូវលេខ៥១ (ប៉ាស្ទ័រ) ស្ថិតក្នុងសង្កាត់ ជ័យជំនះ ខណ្ឌដូនពេញ កាលពីវេលាម៉ោង១២នឹង២០នាទីរំលងអាធ្រាត ឈានចូលថ្ងៃទី២២ ខែមិនា ឆ្នាំ២០១៥ ។
ប្រភពពត៌មានពីកន្លែងកើតហេតុ បានឱ្យដឹងថា មុនពេលកើតហេតុ គេបានឃើញរថយន្តប្រូស ពណ៍ទឹកតែ មួយគ្រឿង ពាក់ស្លាកលេខ ភ្នំពេញ 2V-1333 បើកបរតាមបណ្តោយផ្លូវលេខ២១៤ ទិសដៅពីលិចទៅកើត ក្នុងល្បឿនយ៉ាងលឿន ពេលមកដល់ចំណុចកែងនឹងផ្លូវលេខ៥១ ក៏ជ្រុលទៅបុក រថយន្តរ៉េវហ្វរ ពណ៍ស ពាក់ស្លាកលេខ ភ្នំពេញ 2AA-3947 ដែលកំពុងឆ្លងកាត់ទទឹងផ្លូវ ខូចខាតផ្នែកខាងមុខ ហើយរថយន្តបង្ក បានកាច់ចង្កូតទៅបុកនឹងដើមឈើមួយដើមទៀតទៅមុខលែងរួច បណ្តាលឱ្យរងការខូចខាត ផ្នែកខាងមុខដូចគ្នា សំណាងល្អមិនមានអ្នករងរបួស ។
ប្រភពដដែលបន្តថា ក្រោយកើតហេតុ ភាគីទាំងសងខាង បានធ្វើការសម្របសម្រួលគ្នា តែចរចាគ្នាមិនត្រូវ សមត្ថកិច្ចបានធ្វើការវាស់វែង យករថយន្តទាំង២គ្រឿង ទៅរក្សាទុកនៅការិយាល័យ ចរាចរណ៍ជើងគោករាជធានីភ្នំពេញ រង់ចាំដោះស្រាយគ្នានាពេលក្រោយ ៕