ហេតុការណ៍គ្រោះថ្នាក់ចរាចរណ៍មួយ បណ្តាលឲ្យមនុស្សស្លាប់ម្នាក់ និងរបួសធ្ងន់ម្នាក់ ដោយសារតែយុវជនម្នាក់ ជិះម៉ូតូមួយគ្រឿងក្នុងល្បឿនលឿន ជ្រុលបុកអ្នកដើរថ្មើជើង បណ្តាលឲ្យស្លាប់ខ្លួនឯង ។
ហេតុការណ៍នេះ បានកើតឡើងកាលពីវេលាម៉ោង២១និង៣០នាទីយប់ ថ្ងៃទី២១ ខែមិនា ឆ្នាំ២០១៥ នៅចំណុចខាងត្បូងនិងបន្ទាយង៧០ ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ ។ ជនរងគ្រោះដែលបានស្លាប់ ត្រូវបានគេស្គាល់ឈ្មោះ ខេន អឿន ភេទប្រុស អាយុ២៥ឆ្នាំ ស្នាក់នៅ ភូមិឃ្មួត ឃុំបាគូ ស្រុកកណ្តាលស្ទឹង ខេត្តកណ្តាល ចំណែកជនរងគ្រោះ ដែលរងរបួស នៅមិនទាន់ស្គាល់អត្តសញ្ញាណនៅឡើយទេ ។
យោងតាមសាក្សី នៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញបុរសម្នាក់ បានដើរថ្មើរជើងឆ្លងផ្លូវ ពីលិចទៅកើត លុះមកដល់ចញ្ចើមផ្លូវខាងកើតហេតុ ស្រាប់តែមានយុវជនម្នាក់ ជិះម៉ូតូសេ១២៥ សេរីឆ្នាំ២០០៨ ពណ៌ខ្មៅ ពាក់ស្លាកលេខ ភ្នំពេញ 1AQ-5091 ធ្វើដំណើរតាមបណ្តោយផ្លូវជាតិលេខ៣ ក្នុងទិសដៅពីត្បូងទៅជើងល្បឿនលឿន បានជ្រុលបុកនាក់ដើរពេញទំហឹង បណ្តាលឲ្យបោកក្បាលទៅនិងថ្មលស្លាប់ខ្លួនឯង ចំណែកនាក់ដើរថ្មើជើង រងរបួសធ្ងន់ ត្រូវបានរថយន្តសង្គ្រោះ ដឹកទៅសង្គ្រោះនៅមន្ទរពេទ្យភ្លាមៗ ។
ក្រោយពេលកើតហេតុ សមត្ថកិច្ចមូលដ្ឋាន បានចុះមកដល់ចំណុចកើតហេតុ និងធ្វើការវាស់វែង យកម៉ូតូទៅរក្សាទុក នៅធិការដ្ឋាននគរបាល ខណ្ឌពោធិ៍សែនជ័យ ដើម្បីរងចាំដោះស្រាយនាពេលក្រោយ ចំណែកសព ត្រូវបានក្រុមគ្រួសារ មកទទួលយកទៅធ្វើបុណ្យ តាមប្រពៃណីនៅឯស្រុកកំណើត ៕
