(ឧត្តរមានជ័យ)យុវជនស្ទាវម្នាក់ជិះកង់ឆក់ការបូប តែពេលម្ចាស់ការបូបស្រែកថា ចោរៗ ហើយក៏ត្រូវប្រជាពលរដ្ឋនៅក្បែរ និងសិស្សសាលា ដេញចាប់បាន រួចហើយក៏ប្រគល់ទៅឱ្យសមត្ថកិច្ចស្រុកអន្លង់វែង ដែលហេតុការណ៍បានកើតឡើងនៅវេលាម៉ោង ៣និង៣០នាទី រសៀលថ្ងៃទី២៣ ខែមីនា ឆ្នាំ២០១៥ ស្ថិតនៅភូមិថ្នល់កែង ឃុំ-ស្រុកអន្លង់វែង ខេត្តឧត្តរមានជ័យ។យុវជនស្ទាវឈ្មោះ រស់ ជៀន អាយុ ២២ឆ្នាំ មានទីលំនៅភូមិទួលកណ្តាល ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ។
តាមការរៀបរាប់ពីនារីរងគ្រោះឈ្មោះ ហ៊ាន ឡៃស៊ីន អាយុ ២២ឆ្នាំដូចគ្នាដែរ មានទីលំនៅភូមិឃុំកើតហេតុខាងលើបានរៀបរាប់ថា នាងបានស្ពាយការបូបលុយចុះពីលើផ្ទះបំណងទៅផ្សារទិញម្ហូប ស្រាប់តែយុវជនជនសង្ស័យជិះកង់ទៅឈប់នៅមុខផ្ទះ រួចចូលទៅឆក់ការបូបលុយដែលកំពុងស្ពាយចំហៀង ពេលកំពុងប្រតាយប្រតប់គ្នា នារីរងគ្រោះក៏ស្រែកថា ចោរៗ ធ្វើឱ្យ
ផ្អើលដល់ប្រជាពលដែលនៅក្បែរ ក៏រត់មកជួយ តែពេលជនសង្ស័យ ក៏រត់ចោលកង់បំណងគេចខ្លួន តែត្រូវប្រជាពលរដ្ឋស្ទាក់ចាប់បាន និងបានស្វាគមន៍ដាក់យ៉ាងចាស់ដៃ រួចហើយក៏ប្រគល់ឱ្យទៅសមត្ថកិច្ចអធិការនគបាលស្រុកដើម្បីកសាងសំណុំរឿងបញ្ជូនទៅសាលាដំបូងខេត្តចាត់ការទៅតាមនិតិវិធីច្បាប់៕