ព្រះសីហនុ ៖ សមត្ថកិច្ចជំនាញនែកងរាជអាវុធហត្ថខេត្តព្រះសីហនុ បានបើកយុទ្ធនាការចាប់ឃាត់ខ្លួនមនុស្សចំនួន ៧ នាក់ ជាបន្តបន្ទាប់ នៅត្រង់ចំណុចពយយាយម៉ៅ ភូមិកោះតូច សង្កាត់កោះរ៉ុង ក្រុង-ខេត្តព្រះសីហនុ កាលពីរសៀលថ្ងៃទី ២០ ខែ មីនា ឆ្នាំ ២០១៥ ដោយមនុស្សទាំង៧នាក់នេះ ជាប់ពាក់ព័ន្ធ២ករណីដាច់ដោយឡែកពីគ្នា គឺ៤នាក់ជាប់ពាក់ព័ន្ធកាប់បំផ្លាញព្រៃឈើ និង ៣នាក់ទៀត ជាប់ពាក់ព័ន្ធបទលួចដោយមានស្ថានទំងន់ទោស ប្រព្រឹត្តិទៅលើជនបរទេសចំនួន ២ នាក់។
លោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ បានមានប្រសាសន៍បញ្ជាក់ប្រាប់អោយដឹងថាការចាប់ឃាត់ខ្លួនមនុស្ស៧នាក់ខាងលើនេះគឺធ្វើឡើងខណៈពេលមានករណីជនបរទេសចំនួន២នាក់ទី១មានឈ្មោះMike(ម៉េក)សញ្ជាតិកាណាដានិងម្នាក់ទៀតឈ្មោះJohn(ចន)សញ្ឌាតិហ្វាំងឡង់ត្រូវជនល្មើសមួយក្រុមព្រួតគ្នាវាយបណ្តាលអោយរបួសធ្ងន់ធ្ងររួចហើយប្លន់យកទ្រព្យសម្បត្តិមួយចំនួនដូចជាកាបូបស្ពាយចំនួន១,លេបថប១គ្រឿងនិងទូរស័ព្ទៃដៃ១គ្រឿងព្រមទាំងប្រាក់ដុល្លាមួយចំនួនផងដែរ។កម្លាំងកងរាជអាវុធហត្ថក្រោយពីទទួលបានពត៏មានករណីនេះភ្លាម ក៏បានចុះធ្វើការស៊ើបអង្កេតស្រាវជ្រាវយ៉ាងយកចិត្តទុកដាក់នៅចំណុចកើតហេតុភ្លាមៗផងដែររហូតឈានទៅដល់ការចាប់ខ្លួនមនុស្សចំនួន ៧ នាក់ ដោយក្នុងនោះ ៣ នាក់ ពាក់ព័ន្ធនឹងការវាយប្លន់ជនបរទេសចំនួន២នាក់ខាងលើ។ដោយឡែកសំរាប់៤នាក់ទៀត ជាប់ពាក់ព័ន្ធកាប់បំផ្លាញព្រៃឈើក្នុងដែនបំរុងទុកអចិន្ត្រៃយ៍របស់រដ្ឋ។
លោកឧត្តមសេនីយ៍ត្រី បានបញ្ជាក់ប្រាប់អោយដឹងទៀតថា ជនជាប់សង្ស័យ៣នាក់ ដែលពាក់ព័ន្ធវាយប្លន់ជនរងគ្រោះជាជនជាតិបរទេស ២ នាក់ខាងលើ ទី១ឈ្មោះ ជួប ទិត្យ ភេទ ប្រុស អាយុ ២៧ ឆ្នាំ មុខរបរ កម្មករអារឈើ, ទី២ឈ្មោះ ជឹម រតនា ភេទ ប្រុស អាយុ ២១ ឆ្នាំមុខរបរកម្មករអារឈើ ទី៣ឈ្មោះឃួនហ៊នភេទប្រុសអាយុ២៤ឆ្នាំមុខរបរកម្មករអារឈើ។ជនទាំង៣មានទំលំនៅភូមិតាមលៈឃុំរាមស្រុកព្រែនប់ខេត្តព្រះសីហនុ។ជនជាប់សង្ស័យទាំងបីនាក់ក្រោយពីធ្វើការសាកសួររួចនៅព្រឹកថ្ងៃទី២៣ខែមិនាឆ្នាំ២០១៥ត្រូវបានបញ្ជូនទៅស្នងការដ្ឋាននគរបាលខេត្តតាមការស្នើសុំ(ម្ចាស់សំណុំរឿង)ដើម្បីកសាងសំណុំរឿងបន្តជូនទៅសាលាដំបូងខេត្តចាត់ការតាមនិតីវិធីនែច្បាប់។ដោយឡែកសំរាប់ជនជាប់សង្ស័យពាក់ព័ន្ធការកាប់បំផ្លាញព្រៃឈើចំនួន ៤ នាក់, ទី១ មានឈ្មោះ ជឹម ឧត្តម ភេទ ប្រុស អាយុ ២១ ឆ្នាំ មុខរបរ កម្មករអារឈើ ។ ២- ឈ្មោះ ជឹម រឹម ភេទ ប្រុស អាយុ ៣០ ឆ្នាំ មុខរបរ កម្មករអារឈើ។ ៣- ឈ្មោះ ហ៊ើង សេងថៃ ភេទ ប្រុស អាយុ ១៨ ឆ្នាំ មុខរបរកម្មករអារឈើ។ ៤- ឈ្មោះឃួនសុធាភេទប្រុសអាយុ២៩ឆ្នាំមុខរបរបើកទូកទេសចរណ៍។អ្នកទាំង៤ត្រូវបានប្រគល់អោយខណ្ឌរដ្ឋបាលព្រៃឈើខេត្តអនុវត្តតាមនីតិវិធីនៃច្បាប់នៅរសៀលថ្ងៃទី ២៣ ខែ មីនា ឆ្នាំ ២០១៥ រួចរាល់ហើយ៕