រាជធានីភ្នំពេញ ៖ ស្ត្រីបម្រើនៅក្នុងក្លិបមីតណាយម្នាក់ ត្រូវប៉ូលិសឃាត់ខ្លួន បន្ទាប់ពីស្ត្រីរូបនេះធ្វើសកម្មភាពលួយយកទូរស័ព្ទដៃនិងលុយ របស់បុរសម្នាក់ ខណៈពេលដែលពួកគេនិយាយត្រូវដងត្រូវផ្លែគ្នា ហើយបាននាំគ្នាចូលទៅក្រេបទឹកឃ្មុំនៅក្នុងផ្ទះសំណាក់មួយ កន្លែងយ៉ាងផ្អែមល្ហែម។ លុះពេលដែលខាងប្រុសអស់កម្លាំងដេកភ្លេចខ្លួនស្ត្រីនោះ បានលួចយកទូរស័ព្ទដៃ០២គ្រឿងនិងលុយចំនួន១៣០ដុល្លារ រួចគេចខ្លួនបាត់ស្រមោល ក្រោយមកជនរងគ្រោះបានដើរតាមស្វែងរក អស់រយៈពេល១៦ថ្ងៃទើបប្រទះឃើញចាប់ខ្លួនប្រគល់ឲ្យប៉ូលិស ចាត់ការតាមផ្លូវច្បាប់ ។
ការចាប់ខ្លួននោះបានធ្វើឡើងកាលពីវេលាម៉ោង២ រំលងអធ្រាត្រ ឈានចូលថ្ងៃទី៨ មេសា ឆ្នាំ២០១៤ នៅក្នុងក្លិបកម្សាន្តស្ពាយឌ័រ ដែលមានទីតាំងស្ថិតនៅតាមបណ្ដោយផ្លូវចោមចៅ ហៅផ្លូវវ៉េងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។ ស្ត្រីដែលត្រូវគេឃាត់ខ្លួនប្រគល់ឲ្យប៉ូលិសនោះឈ្មោះ គឹម ស្រីរ័ត្ន អាយុ២០ឆ្នាំ មានស្រុកកំណើត ភូមិប៉ែន ឃុំម៉ោង ស្រុកម៉ោងឫស្សី ខេត្តបាត់ដំបង ។
ដោយឡែកបុរសដែលអះអាងថាជាជនរងគ្រោះនោះឈ្មោះ ថុល រ៉ាវី ភេទប្រុស អាយុ៣១ឆ្នាំ ជាបុគ្គលិកក្រុមហ៊ុនទេសចរណ៍ K5 មានទីលំនៅភូមិ១៩ សង្កាត់ស្រះចក ខណ្ឌទួលគោក ។ បុរសនោះបានប្រាប់ប៉ូលិសថា ខ្លួនបានបាត់ទូរស័ព្ទដៃចំនួន២គ្រឿង ក្នុងនោះមួយគ្រឿង ម៉ាកអាយហ្វូនហ្វ័រអេស និងមួយគ្រឿងទៀតម៉ាកសាមស៊ុងកាឡាក់ស៊ី ព្រមទាំងលុយចំនួន១៣០ដុល្លារផងដែរ។
