សៀមរាប៖ លោកឧត្តមសេនីយ៍ត្រី ម៉ន សាម៉ុន មេបញ្ជាការកងរាជអាវុធហត្ថខេត្តសៀមរាប ត្រូវបានប្រកាសផ្ទេរតំណែង ទៅទទួលភារកិច្ចថ្មីជាមេបញ្ជាការរងកងរាជអាវុធហត្ថលើផ្ទៃប្រទេស និង ត្រូវបានប្រកាសតែងតាំងលោកវរៈសេនីយ៍ឯក ប៉ោ វណ្ណនិត ជាមេបញ្ជាការកងរាជអាវុធហត្ថខេត្តសៀមរាម ក្រោមអធិបតីភាព ឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និង ជាមេបញ្ជាការកងរាជ អាវុធហត្ថលើផ្ទៃប្រទេស កាលពីព្រឹកថ្ងៃទី ១២ ខែ ឧសភា ឆ្នាំ២០១៥ នៅទីបញ្ជាការដ្ឋានកងរាជអាវុធហត្ថខេត្ត ។បន្ទាប់ពីសេចក្តីរាយការណ៍របស់ លោកឧត្តមសេនីយ៍ត្រី ម៉ន សាម៉ុន ស្តីអំពីសមទ្ធិផលក្នុងរយៈពេលនៃការ ដឹកនាំ ២១ឆ្នាំមកនេះ ក្រោមកិច្ចសហការល្អជាមួយអាជ្ញាធរខេត្ត សមត្ថកិច្ចគ្រប់លំដាប់ថ្នាក់ ក៏ដូចជាកងកម្លាំងអាវុធហត្ថ ទាំងមូល ក៏ដូចជាមេបញ្ជាការកងរាជអាវុធហត្ថលើផ្ទៃប្រទេស ក្នុងការគាំទ្រ ទើបធ្វើឲ្យអង្គភាពសម្រេចបានលទ្ធផលទាំង នេះដោយជោគជ័យ ។បន្ទាប់ពីការអានសេចក្តីប្រកាសរបស់ក្រសួងការពារជាតិ ស្តីពីការប្រកាសផ្ទេរតំណែង លោកឧត្តមសេនីយ៍ត្រី ម៉នសាម៉ុនទៅទទួលភារកិច្ចថ្មីជាមេបញ្ជាការរងកងរាជអាវុធហត្ថលើផ្ទៃប្រទេស និងប្រកាសតែងតាំងលោកវរៈសេនីយ៍ឯកប៉ោវណ្ណនិតជាមេបញ្ជាការកងរាជអាវុធហត្ថខេត្តសៀមរាមនិង ការប្រគល់សេចក្តីប្រកាសរួចមកក៏មានធ្វើពីធីចុះហត្ថលេខាផ្ទេរនិងប្រគល់ត្រាអង្គភាពនិង ការធ្វើការប្តេជ្ញាចិត្តរបស់លោកមេបញ្ជាការថ្មីផងដែរ ។
មានប្រសាសន៍សំណេះសំណាលនោះដែរក្នុងនាមលោក ឃឹម ប៊ុនសុង ប្រធានគណៈបញ្ជាការឯកភាពខេត្ត និង ជាអភិបាលនៃគណៈអភិបាលខេត្ត លោក ម៉ៅ វុឌ្ឍី អភិបាលរងខេត្ត ក៏បានគូសបញ្ជាក់ថា នេះជាការប្រគល់ភារកិច្ច លើកទឹកចិត្តនិងទេពកោសល្យក្នុងការអនុវត្តការងារដើម្បីធ្វើឲ្យអង្គភាពមានការប្រែមុខមាត់ថ្មី ក្នុងការសំដៅធានារ៉ាប់រងបាននូវភារកិច្ចស្នូលទាំងឡាយដែលអង្គភាពត្រូវបំពេញ ទទួលខុសត្រូវចំពោះ មុខក្រសួងការពារជាតិ និង បញ្ជាការដ្ឋានកងរាជអាវុធហត្ថលើផ្ទៃប្រទេស និងភារកិច្ចនិងការចាំបាច់ដែលក្រសួង ស្ថាប័ន និង រដ្ឋបាលខេត្តប្រគល់ជូន ។មានប្រសាសន៍សំណេះសំណាល និង ផ្តាំផ្ញើនោះដែរឯកឧត្តមនាយឧត្តមសេនីយ៍ សៅ សុខា ក៏បានដើម្បីធានា បាននូវសន្តិសុខសុវត្ថិភាពជូនថ្នាក់ដឹកនាំ និង ប្រជាពលរដ្ឋ កងកម្លាំងសមត្ថកិច្ចទាំងមូល ក៏ដូចកងកម្លាំងរាជអាវុធហត្ថ និយាយដោយឡែក ត្រូវយកចិត្តទុកដាក់ពង្រឹង នូវវិធានការគ្រប់គ្រងសង្គម និង កិច្ចការពារអធិបតេយ្យជាតិ ដោយយក ចិត្តទុកដាក់លើការកសាងផែនការយុទ្ធសាស្ត្រកាពារជាតិ ប្រព័ន្ធការពារ ទំនាក់ទំនង ដែលជាមូលដ្ឋានគ្រឹះដ៏រឹងមាំក្នុង កិច្ចការជាតិ ។ ឯកឧត្តមក៏បានលើកនូវចំណុចល្អៗមួយចំនួន ដើម្បីជាប្រទីបសម្រាប់នាយកងរាជអាវុធហត្ថ ក្នុងការដឹក នាំបញ្ជា ដោយឈរលើទស្សនៈស្នេហាជាតិបរិសុទ្ធ គោរពស្មោះត្រង់ យកផលប្រយោជន៍ជាតិជាធំ និង អនុវត្តឲ្យបាននូវ ភារកិច្ចស្នូលរបស់ខ្លួន ព្រមទាំងចូលរួមពង្រឹងចលនា ក្នុងការអនុវត្តគោលនយោបាយភូមិឃុំមានសុវត្ថិភាព ទាំង៩ចំណុច ឲ្យមានប្រសិទ្ធភាព ក្នុងការធានានូវ សន្តិសុខ សុវត្ថិភាពជូនប្រជាពលរដ្ឋ ក៏ដូចជាភ្ញៀវជាតិ អន្តរជាតិ ចូលមកទស្សនាកម្សាន្តក្នុងខេត្ត ព្រមទាំងពង្រឹងនូវប្រពៃណីដឹកនាំ សាមគ្គីភាពផ្ទៃក្នុង និង មានការទំនាក់ទំនង ប្រតិបត្តិការល្អជាមួយ បណ្តាមន្ទីរ អង្គភាព និង អាជ្ញាធរ ព្រមទាំងខិតខំសិក្សារៀនសូត្រពីរៀមច្បងផងដែរ ។ ឯកឧត្តមនាយឧត្តមសេនីយ៍ សៅ សុខា ក៏បានសង្កត់ធ្ងន់ផងដែរ ចំពោះលោកមេបញ្ជាការថ្មីដែលទើបតែងតាំង ត្រូវគោរពឲ្យបានខ្ជាប់ខ្ជួនពីតួនាទី របស់ខ្លួនជាកងរាជអាវុធហត្ថ និង រាល់ការសម្រេចត្រូវតែគោរពមតិសមូហភាពជាធំ ព្រមទាំងធ្វើការដោះស្រាយឲ្យបាន ទាន់ពេលវេលា នូវរាល់បញ្ហាដែលប្រឈម ដោយឈរលើស្មារតីច្បាប់ជាចំបង ត្រូវបន្តការងារកសាងរាល់សមទ្ធផល ដែលមេបញ្ជាការចាស់ មិនទាន់បានដំណើរការហើយរួចរាល់ លើការកសាងអង្គភាព ទីជម្រកកងទ័ព ការផ្គត់ផ្គង់ ម្ហូបអាហារ សម្លៀកបំពាក់ និង សុខភាពរបស់កងកម្លាំងផងដែរ ។ ម្យ៉ាងទៀតត្រូវបន្តការអភិវឌ្ឍន៍ធនធានមនុស្ស ក្នុងវិស័យការពារជាតិ តាមរយៈការបង្កើនគុណភាពហ្វឹកហ្វឺន និង ពង្រឹងសមត្ថភាព ក្នុងជួរកងកម្លាំងឲ្យកាន់តែមានប្រសិទ្ធិ ភាព និង ទទួលខុសត្រូវ មានសីលធម៌ គុណធម៌ ដើម្បីជាទំនុកចិត្តរបស់ប្រជាពលរដ្ឋ និង ភ្ញៀវទេសចរណ៍ជាតិ អន្តរជាតិ ដែលចូលមកទស្សនាកម្សាន្តនៅខេត្តសៀមរាប ៕