ភ្នំពេញ ៖ យុវជន២នាក់ កំពុងជាប់គុក និង ម្នាក់ទៀតបានរត់គេចខ្លួន ត្រូវបានសាលាឧទ្ឋរណ៍ កាលពីថ្ងៃទី០៨ មេសា កាត់ទោសពីបទឃាតកម្ម ពាក់ព័ន្ឋការព្រួតគ្នាវាយចាក់សម្លាប់បុរសម្នាក់ បណ្តាលឲ្យស្លាប់ភ្លាមៗ ។ ប្រធានក្រុមប្រឹក្សាជំនុំជម្រះសាលាឧទ្ឋរណ៍ លោក យ៉ុង ណារ៉ុង បានថ្លែងក្នុងសវនាការ ថា ជនជាប់ចោទ ឈ្មោះ ទុយ ប្រុសពៅ អាយុ១៧ឆ្នាំ ឈ្មោះ ចេង វ៉ាន់ឌុន អាយុ១៦ឆ្នាំ និង ម្នាក់ទៀតរត់គេចខ្លួនឈ្មោះ រ៉ូ វណ្ណា អាយុ១៩ឆ្នាំ ។
លោកចៅក្រមបញ្ជាក់ថា កាលពីថ្ងៃទី១៩ ខែមិថុនា ឆ្នាំ២០១២ វេលាម៉ោង១៩យប់ នៅចំណុចអណ្តូងស្នប់ ក្នុងភូមិទួលសំបូរ សង្កាត់ព្រៃវែង ខណ្ឌដង្កោ មានករណីឃាតកម្មមួយកើតឡើង ប្រព្រឹត្តដោយជនល្មើស៣នាក់ខាងលើ បាន ព្រួតគ្នាវាយ ចាក់សម្លាប់ជនរងគ្រោះឈ្មោះ សូ សារឿន ភេទប្រុស បណ្តាលឲ្យស្លាប់ភ្លាមៗ ។
យោងតាមអង្គហេតុនេះ សាលាដំបូងរាជធានីភ្នំពេញ តាមអំណាចសាលក្រម ចុះថ្ងៃទី២២ ខែវិច្ឆិកា ឆ្នាំ២០១២ បានផ្តន្ទាទោសឈ្មោះ រ៉ូ វណ្ណា ដាក់ពន្ឋនាគារ៧ឆ្នាំ និងចេញដីកាចាប់ខ្លួនជន នេះ ។ ផ្តន្ទាទោស ចេង វ៉ាន់ឌុន និង ទុយ ប្រុសពៅ ក្នុងម្នាក់៥ឆ្នាំ តាមមាត្រា១៩៩ នៃក្រមព្រហ្មទណ្ឌ ព្រមទាំងបង្គាប់ឲ្យអាណាព្យាបាល របស់ជនជាប់ចោទ សងសំណងជម្ងឺចិត្តដល់ ដើមបណ្តឹងឈ្មោះ សេន ស្រីអូន ចំនួន១០លានរៀល ។ ប៉ុន្តែសាលក្រមនេះ ត្រូវបានជនជាប់ចោទ ២ នាក់ប្តឹងឧទ្ឋរណ៍ ។
ក្នុងសវនាការ ចេង វ៉ាន់ឌុន និង ទុយ ប្រុសពៅ បានបដិសេថដូចគ្នាថា ពុំបានសម្លាប់ ជនរងគ្រោះដូចការចោទប្រកាន់នោះទេ ។ ចេង វ៉ាន់ឌុន និយាយថា ថ្ងៃកើតហេតុអត់បានដឹងថា ជនរងគ្រោះស្លាប់ទេ គឺឈ្មោះ រ៉ូ វណ្ណា ដែលជាបងធំក្នុងភូមិជាអ្នកចាក់សម្លាប់ តាមរយៈអ្នកជិតខាង ប្រាប់ ។ ចំណែក ទុយ ប្រុសពៅ និយាយថា ថ្ងៃកើតហេតុ ខ្លួននៅផ្ទះពុំបានដឹងអ្វីទាំងអស់ ។ ពួកគេទាំងពីរនាក់ សំណូមពរ ឲ្យតុលាការលើកលែងការ ចោទប្រកាន់និងដោះលែងឲ្យមានសេរីភាព ឡើងវិញ ។
ប៉ុន្តែតាមចម្លើយសាក្សីឈ្មោះសូ សំរឿន និង សូ កក្កដា អានដោយក្រឡាបញ្ជីសវនាការ បានបញ្ជាក់ថា នៅថ្ងៃកើតហេតុជនជាប់ចោទទាំងពីរនាក់ ពិតជាបានចូលរួមវាយចាក់សម្លាប់ ជនរងគ្រោះប្រាកដមែន ។ តំណាងមហាអយ្យការអមសាលាឧទ្ឋរណ៍ លោក ង៉ែត សារ៉ាត បានសន្និដ្ឋាន ថា ជនជាប់ចោទ ទាំងពីរនាក់ ពិតជាបានចូលរួមប្រព្រឹត្តបទល្មើស ក្នុងនាមជាសហចារី បណ្តាលឲ្យជនរងគ្រោះស្លាប់ ប្រាកដមែន ។ ដូច្នេះ សំណូមពរឲ្យសាលាឧទ្ឋរណ៍តម្កល់សាលក្រមតុលាការថ្នាក់ក្រោមទុកជាបាន ការដដែល ។
មេធាវីការពារជនជាប់ចោទទាំង២នាក់ លោក នូ ចន្ថា បានសន្និដ្ឋាន ថា ប្រពន្ឋរបស់ ជនរងគ្រោះ បានឆ្លើយក្នុងកំណត់ហេតុថា មានតែឈ្មោះ រ៉ូ វណ្ណា ម្នាក់ប៉ុណ្ណោះ ដែលជាអ្នកចាក់ សម្លាប់ប្តីរបស់គាត់ ។ ដូច្នេះកូនក្តីទាំង២នាក់ពុំបានសម្លាប់ជនរងគ្រោះនោះទេ សូមឲ្យ សាលាឧទ្ឋរណ៍ លើកលែងការចោទប្រកាន់ដល់អ្នកទាំង២នាក់ ។ ទោះបីយ៉ាងណា ក្រោយបញ្ចប់ការសួរដេញដោល លោកចៅក្រម បានប្រកាសលើកពេល ប្រកាសសាលដីកាថ្ងៃទី២៣ មេសា ក្រោយចូលឆ្នាំខ្មែរខាងមុខនេះវិញ ៕ 
