ស្ទឹងត្រែង៖យុវជនម្នាក់ក្នុងចំណោមគ្នា៣នាក់ជាបងប្អូន បាននាំគ្នាតខ្សែភ្លើងឆក់ត្រីក្នុងអូរ ដោយម្នាក់ជាអ្នកដោតព្រីនិងគ្នាគេជាអ្នកកាន់ដែក តខ្សែភ្លើងចុះក្នុងទឹកបណ្តាលអោយឆក់ស្លាប់ភ្លាមៗមួយរំពេច កាលពីវេលាម៉ោង១៦និង៣០នាទីល្ងាចថ្ងៃទី០៤ខែឧសភាឆ្នាំ២០១៥នៅចំណុចអូបាដើម ឃុំសាមឃួយ ស្រុកសេសានខេត្តស្ទឹងត្រែង។
លោកអន សំអាតអធិការស្រុកសេសានបានអោយដឹងថា យុវជនរងគ្រោះដោយខ្សែភ្លើងឆក់នោះមានឈ្មោះមី នាភេទប្រុសអាយុ១៩ឆ្នាំ មានទីលំនៅក្នុងភូមិបាដើម ឃុំសាមឃួយ ស្រុកសេសាន ខេត្តស្ទឹងត្រែង។ចំណែចគ្នីគ្នាគេចំនួន២នាក់ជាបងប្អូនទៀតមិនត្រូវបានស្គាល់ឈ្មោះទេ ព្រោះក្រោយកើតហេតុ ពួកគេភ័យខ្លាចពាក់ព័ន្ធ ក្នុងករណីបទល្មើស។
លោកអធិការបានបន្តអោយដឹងទៀតថាបើតាមការអោយដឹងពីប្រជាពលរដ្ឋដែលរស់នៅក្បែរកន្លែងកើតហេតុបាននិយាថា នៅមុនកើតហេតុយុវជនរងគ្រោះ និងបងប្អូនគេមានគ្នាប្រហែល៣នាក់បាននាំគ្នា យកខ្សែភ្លើងមកត នៅមាត់អូរដោយគេយកខ្សែភ្លើង តជាមួយដែកសសៃពីរដើម ដែលមានប្រវែង៦ទៅ៧តឹក កាន់ចុះទៅក្នុងទឹកដោតឆក់យកត្រី តែដោយសារការតខុស បច្ចេកទេស ម្នាក់អ្នកចុះទឹក និងម្នាក់ដោតភ្លើង បង្កអោយឆក់យុវជនម្នាក់ស្លាប់ភ្លាមៗតែម្តង។
លោកអធិការបន្តថាក្នុងករណីនេះ បើតាមការសនិដ្ឋានរបស់សមត្ថកិច្ច នៅកន្លែងកើតហេតុ ការឆក់ស្លាប់នេះ ដោយសារប្រជាពលរដ្ឋដែលនៅតាមជនបទ មិនដែលមានភ្លើងប្រើប្រាស់ និងមិនសូវយល់ពីបច្ចេកទេសក្នុងការតភ្លើង គឺពួកគេបានយកដែកទៅតជាមួយខ្សែភ្លើង ដោយមិននឹកស្មានថាចរន្តភ្លើងខ្លាំងបែបនេះ គ្រាន់តែដោតព្រី ហើយម្នាក់កាន់ចុះទៅក្នុងទឹកចរន្តភ្លើងបានឆក់យកជីវិតមួយរំពេច ដែលពួកគេនឹកមិនដល់។
លោកអធិការបានណែនាំដល់ប្រជាពលរដ្ឋដែលនៅឆ្ងាយពីទីក្រុង មិនដែលមានភ្លើងប្រើប្រាស់ និងមិនសូវយល់ក្នុងការប្រើ ភ្លើងសូមកុំអោយតផ្តេសផ្តាស់ វាអាចបង្កគ្រោះថ្នាក់ដល់ជីវិត ដូចជាករណីខាងលើនេះ បើសិនជាមិនស្លាប់ ករណីនេះក៏ជាបទល្មើដែរ បើសិនជាសមត្ថកិច្ចចាប់បាន និងត្រូវផ្តន់ទាទោសទៀតផង៕