ភ្នំពេញ ៖ បុរសម្នាក់ដែលគេស្គាល់ថា ជាមន្ត្រីនគរបាលម្នាក់ បានខ្យល់គដេកស្លាប់នៅក្នុងផ្ទះប្រមាណជា៣ទៅ៤ថ្ងៃ ឡើងសពមានសភាពហើម និងសាយភាយក្លិនស្អុយយ៉ាងខ្លាំងទំរាំតែក្រុមគ្រួសារដឹង បង្កការភ្ញាក់ផ្អើលដល់ ប្រជាពលរដ្ឋដែលរស់នៅជិតខាងនោះ ។ ហេតុការណ៍ខាងលើនេះបានបង្កការភ្ញាក់ផ្អើលកាលពីវេលាម៉ោង៥នឹង៣០នាទីល្ងាចថ្ងៃទី១៦ ខែឧសភា ឆ្នាំ២០១៥ នៅក្នុងបុរីចំការដូង ស្ថិតក្នុងភូមិសំបួរ សង្កាត់ដង្កោ ខណ្ឌដង្កោ ។
សមត្ថកិច្ចបានឱ្យដឹងថា ជនរងគ្រោះមានឈ្មោះ ទូច វណ្ណារិន ភេទប្រុសអាយុ៣២ ឆ្នាំជាមន្ត្រីនគរបាល បច្ចុប្បន្នស្នាក់កន្លែងកើតហេតុខាងលើ មានទីកន្លែងកំណើតក្នុងសង្កាត់ទួលស្វាយព្រៃ ខណ្ឌចំការមន ។
តាមការឱ្យដឹងពីឪពុកជនរងគ្រោះ បានឱ្យដឹងថា សពថ្ងៃកូនប្រុសរបស់គាត់ ស្នាក់នៅផ្ទះល្វែងតែម្នាក់ឯងទេ ដោយរៀងរាល់ថ្ងៃនៅពេលយប់កូនប្រុសរបស់គាត់ផឹកស៊ីមិនដែលខាននោះទេ ហើយកាលពីថ្ងៃទី១២ រូបគាត់រួមជាមួយក្រុមគ្រួសារ បាននាំគ្នាទៅឯស្រុកកំណើតហើយក៏បានហៅបុរសខាងលើដែរ ប៉ុន្តែគាត់បានប្រកែកថាមិនទៅទេ ។ ប្រភពបន្តថា បន្ទាប់ពីត្រឡប់មកពីស្រុកកំណើតវិញ ក៏មានអ្នកជិតខាងបានប្រាប់គាត់ថា មិនឃើញកូនគាត់ចេញពីផ្ទះជាច្រើនថ្ងៃមកហើយ ទើបគាត់ប្រញាប់ប្រញាលទៅមើល ក៏បានឃើញដេកស្លាប់នៅក្នុងផ្ទះ ឡើង មានសភាពហើម និងស្អុយបាត់ទៅហើយ ។
ប្រភពពត៌មានពីអ្នកដែលបានរស់នៅជិតផ្ទះកើតហេតុ បានឱ្យដឹងថា ជារៀងរាល់ថ្ងៃពួកគាត់តែងតែឃើញបុរសខាងលើជារៀងរាល់ថ្ងៃ ប៉ុន្តែប្រមាណជា៣ទៅ៤ថ្ងៃនេះចំលែក គឺមិនបានឃើញគាត់ចេញពីផ្ទះនោះទេ ហើយម្យ៉ាងវិញទៀតនោះ មានធំក្លិនស្អុយយ៉ាងខ្លាំង ចេញពីក្នុងផ្ទះនោះ ដោយមានការសង្ស័យ ពេលឃើញឪពុកជនរងគ្រោះមកពីស្រុកកំណើតវិញនោះ ក៏បានរត់ទៅប្រាប់និងនាំគ្នាទៅមើល ទើបដឹងថាបុរសខាងលើបាន ដេកស្លាប់បាត់ទៅហើយ និងបានចាក់សោរផ្ទះពីក្នុងថែមទៀតផង ។ ភ្លាមនោះពួកគាត់ក៏បានទំនាក់ទំនងទៅ សមត្ថកិច្ចឱ្យចុះមកកន្លែងកើតហេតុដើម្បីធ្វើការត្រួតពិនិត្យ ។
ក្រោយពីសមត្ថកិច្ចបានពិនិត្យ និងធ្វើកោសល្យវិច័យរួចមកសមត្ថកិច្ចបានសន្និដ្ឋានថា បុរសខាងលើបាន ស្លាប់ដោយសារខ្យល់គ ព្រោះនៅលើដងខ្លួនសាកសពមិនមានស្លាកស្នាមអ្វីនោះទេ ម្យ៉ាងវិញទៀតផ្ទះក៏បានចាក់ សោរពីក្នុងផងដែរ គ្រាន់តែនៅជុំវិញខ្លួនសាកសព សុតតែកំប៉ុងស្រាបៀរ និងគ្រឿងក្លែមតែប៉ុណ្ណោះ ។
បន្ទាប់ពីសមត្ថកិច្ចពិនិត្យរួច សពជនរងគ្រោះត្រូវបានក្រុមគ្រួសារ ដឹកយកទៅកម្កល់ទុកនៅវត្តធុង្តចំការដូង និងធ្វើបុណ្យតាមប្រពៃណី ៕