សៀមរាប ដោយការស្រុះស្រួលមូលមតិរបស់ចៅអធិការវត្ត សិស្សគុណ និង បងប្អូនពុទ្ធបរិស័ទ ក្នុងក្រុងសៀមរាប បានរៀបចំធ្វើបុណ្យចម្រើនព្រះជន្ម និង ស្រង់សុគន្ធវារីប្រគេនចំពោះ ព្រះមហាវិមលធម្ម ពិន សែម សិរីសុវណ្ណោ ព្រះរាជា គណៈថ្នាក់ទោ និង ជាឧត្តមទីប្រឹក្សាគណៈសង្ឃនាយក នៃព្រះរាជាណាចក្រកម្ពុជា គម្រប់ ៧៤ ឈានចូល ៧៥ព្រះវស្សា កាលពីរសៀលថ្ងៃសុក្រ ១២កើត ខែជេស្ឋ ឆ្នាំមមែ សប្តស័ក ព.ស ២៥៥៩ ត្រូវថ្ងៃទី២៩ ឧសភា ឆ្នាំ២០១៥ នៅវត្តរាជបូព៌ ក្រុងខេត្តសៀមរាប ។ ពិធិបុណ្យចម្រើនព្រះជន្ម និង ស្រង់សុគន្ធវារី ក្រោមការយាងនិមន្តជាព្រះរាជអធិបតីរបស់សម្តេចព្រះមហាសុមេធាធិបតីនន្ទង៉ែត សម្តេចព្រះសង្ឃនាយកនៃព្រះរាជាណាចក្រកម្ពុជា និង សម្តេចព្រះ ពោធិវង្ស អំ លឹមហេង ព្រះសង្ឃនាយករងទី២ និង លោក ម៉ៅ វុឌ្ឍី អភិបាលរងនៃគណៈអភិបាលខេត្ត ដោយមាន និមន្ត អញ្ជើញចូលរួមពីមន្ត្រីសង្ឃខេត្ត សមាជិកក្រុមប្រឹក្សាខេត្ត អស់លោក លោកស្រីជាថ្នាក់ដឹកនាំមន្ទីរ ស្ថាប័ន អង្គភាព មន្ត្រីរាជការជុំវិញខេត្ត អាជ្ញាធរក្រុង សង្កាត់ លោកគ្រូ អ្នកគ្រូ សិស្សានុសិស្ស គរុសិស្ស និង សីលវន្ត័ សីលវតី បងប្អូនប្រជាពលរដ្ឋ ក្នុងក្រុងចូលរួមផងដែរ
បន្ទាប់ពីថេរៈដីកាស្វាគមន៍របស់ព្រះតេជគណ ជុំ គឹមឡេង ព្រះបាល័ដ្ឋគណខេត្តសៀមរាប និង ការអានពីជីវប្រវត្តិ និង ព្រះរាជសកម្មភាពរបស់ព្រះមហាវិមលធម្ម ពិន សែម សិរីសុវណ្ណោ ដែលបានបញ្ចេញនូវស្នាព្រះហស្ថ នៅក្នុង វិស័យព្រះពុទ្ធសាសនា និង អាណាចក្រ លើការអភិរក្សវប្បធម៌ ប្រពៃណីជាតិ និង ការបណ្តុះបណ្តាលធនធានមនុស្ស ទាំងអាណាចក្រ និង ពុទ្ធចក្រផងដែរ ។
ក្នុងនាមលោក ឃឹម ប៊ុនសុង អភិបាលខេត្ត លោក ម៉ៅ វុឌ្ឍី បានគូសបញ្ជាក់ថា ការកសាងធនធាន និង ការគិតគូរយកចិត្តទុកដាក់ចំពោះព្រះសង្ឃមានសារៈសំខាន់ក្នុងដំណើរការអភិវឌ្ឍន៍និង លើកកម្ពស់តម្លៃព្រះពុទ្ធសាសនា ដែល ជាសាសនារបស់រដ្ឋ ដែលជាទីគោរពនៃពុទ្ធសាសនិកខ្មែរ ។ ម្យ៉ាងទៀតក៏ជាកាតព្វកិច្ច ករណីកិច្ច របស់ថ្នាក់ដឹកនាំ អាជ្ញាធរដែនដី សិស្សគណត្រូវប្រតិបត្តិ ដើម្បីជាការតបស្នងសងគុណ ចំពោះព្រះគ្រូឧបជ្ឈាយ៍ ដែលជាសាស្ត្រាចារ្យ ដែលបានប្រៀនប្រដៅណែនាំ សក្តិសមជាស្រែបុណ្យដ៏ថ្លៃថ្លា ។ ក្នុងនោះឯកឧត្តមក៏បានលើកនូវស្នាព្រះហស្ថនៃការដឹកនាំមួយព្រះជន្មរបស់ព្រះអង្គ ។
មានព្រះរាជបន្ទូលនោះដែរសម្តេចព្រះមហាសុមេធាធិបតី នន្ទ ង៉ែត សម្តេចព្រះសង្ឃនាយក បានធ្វើការកោតសរសើរអំពីស្នាព្រះហស្ថរបស់ព្រះមហាវិមលធម្មពិនសែមសិរីសុវណ្ណោ ដែលជាវីរៈកុលបុត្រអ្នកប្រាជ្ញខែ្មរមួយអង្គក្នុងវិស័យសាសនា ដោយឈរលើនយោបាយមាគ៌ាដឹកនាំទាំង៥របស់ព្រះសម្មាសម្ពុទ្ធព្រះបរមគ្រូនៃយើង ទាំងបាវចនៈ និង ពុទ្ធវចនៈ ។ ម្យ៉ាងទៀតព្រះអង្គជាធម្មកថិកមួយអង្គដ៏ល្អឯកប្រកបដោយទេពកោសល្យខ្ពស់ ក្នុងការបកស្រាយនូវផ្លូវព្រះធម៌ទាំងឡាយរបស់ព្រះសម្មាសម្ពុទ្ធ។សម្តេចសង្ឃនាយកក៏មានបន្ទូលទៀតថា គ្រប់ព្រះសកម្មភាពរបស់ព្រះមហាវិមលធម្មមិនត្រឹមតែអភិវឌ្ឍន៍វិស័យពុទ្ធចក្រប៉ុណ្ណោះទេ ព្រះអង្គបានយកព្រះទ័យទុកដាក់អភិវឌ្ឍន៍ និង អភិរក្សវិស័យអាណាចក្រផងដែរ ។ សម្តេចព្រះសង្ឃនាយក ក៏បានបញ្ជាក់ផងដែរថានៅគ្រប់ហេដ្ឋារចនាសម្ព័ន្ធលើគ្រប់វិស័យក្នុងរបបកម្ពុជាប្រជាធិបតេយ្យ ត្រូវបានបំផ្លាញគ្មានសល់ ពិសេសវិស័យព្រះពុទ្ធសាសនា ត្រូវបានគេបំបាត់មិនឲ្យគោរពប្រតិបត្តិ ព្រមទាំងបានផ្សឹក និងធ្វើគត់ព្រះសង្ឃក្នុងនោះក៏មានព្រះមហាវិមលធម្មត្រូវបានពួករបបអាវខ្មៅចាប់បង្ខំឲ្យផ្សឹកនិង ឲ្យធ្វើការជាទម្ងន់ដូចប្រជាជនកម្ពុជាដទៃទៀតដែរ។ក្រោយជ័យជំនះ៧មករា១៩៧៩ ព្រះមហាវិមលធម្មបានសាងព្រះផ្នួសជាលើកទី២ហើយបានបំពេញការងារយ៉ាងសកម្ម ដោយផ្តោតព្រះទ័យទុកដាក់នូវគ្រប់សកម្មភាព សំដៅពង្រឹង លើកកម្ពស់វិស័យព្រះពុទ្ធ សាសនា ក្នុងការអភិរក្ស និង អភិវឌ្ឍន៍នូវវប្បធម៌អរិយធម៌ការអប់រំចរិយាធម៌ធានានូវសាមគ្គីភាព។ទាំងនេះហើយ ដែលជាមូលធនដ៏ចំបាច់របស់សង្គមជាតិ ស្របតាមឆន្ទៈមោះមុតរបស់រាជរដ្ឋាភិបាល ដែលបានខិតខំប្រឹងប្រែង ដើម្បី អភិវឌ្ឍសង្គមជាតិប្រកបដោយ សន្តិភាព សុខដុមរមនា និង ចិរភាព ។ សម្តេចព្រះមហាសុមេធាធិបតី នន្ទ ង៉ែត សម្តេចព្រះសង្ឃនាយក ក៏បានមានព្រះបន្ទូលផ្តាំផ្ញើដល់អាជ្ញាធរគ្រប់ជាន់ថ្នាក់ ទាំងព្រះភិក្ខុសង្ឃ និង ពុទ្ធបរិស័ទ តាមបណ្តាវត្តនានា ត្រូវធ្វើការអភិវឌ្ឍន៍ទីវត្ត និង បណ្តុះបណ្តាលធនធានមនុស្សទាំងផ្លូវពុទ្ធចក្រ និង អាណាចក្រ សំខាន់ការពង្រីកនូវវិស័យពុទ្ធកៈសិក្សា និង អភិវឌ្ឍន៍ និង អភិរក្សនូវវប្បធម៌ ប្រពៃណី ទំនៀមទំលាប់ របស់ជាតិផងដែរ ។
ដើម្បីភ្ជាប់នូវនិស័យ ក្នុងវិស័យព្រះពុទ្ធសាសនា ក្នុងពិធីបុណ្យចម្រើនព្រះជន្ម និង ស្រង់សុគន្ធវារីនេះ លោកម៉ៅ វុឌ្ឍី បានប្រគេនបច្ច័យ ១លានរៀល សម្រាប់យកទៅប្រើប្រាស់ក្នុងពីធីបុណ្យនេះផងដែរ ។
បន្តមកសម្តេចព្រះសង្ឃនាយក នន្ទ ង៉ែត សម្តេចព្រះសង្ឃនាយកសម្តេចព្រះពោធិវង្ស អំ លឹមហេង និង លោក ម៉ៅ វុឌ្ឍី ព្រមទាំងភ្ញៀវកិត្តិយស និងព្រះមេគណខេត្ត ព្រះអនុគណក្រុង ស្រុកបានយាងនិមន្ត និង អញ្ជើញ ស្រង់ព្រះសុគន្ធវារី ប្រគេនជូនដល់ព្រះមហាវិមលធម្ម ពិន សែម សិរីសុវណ្ណោ ផងដែរ ៕
ដោយគឿនវ៉េត
