សៀមរាប៖ នៅក្នុងកិច្ចប្រជុំមេគង្គលើកទី៤ របស់ក្រុមការងារសម្របសម្រួល លើការងារគ្រប់គ្រងចរាចរដែនអាកាសដែលបានបើកកិច្ចប្រជុំរបស់ខ្លួននៅក្រុងសៀមរាប នាព្រឹកថ្ងៃទី២ ខែមិថុនានេះ លោកម៉ៅ ហាវណ្ណាល់ រដ្ឋលេខាធិការនៃលេខាធិការដ្ឋានអាកាសចរណ៍ស៊ីវិល
កម្ពុជា បានថ្លែងថា ៖ កិច្ចប្រជុំនេះ គឺដើម្បីជជែកគ្នា ស្វែងរកភាពងាយស្រួលដល់ការធ្វើចរាចរផ្លូវអាកាស តភ្ជាប់ពីប្រទេសមួយ ទៅប្រទេសមួយទៀតនៅក្នុងតំបន់តាមដងទន្លេមេគង្គ ក្នុងនោះរួមមានប្រទេសកម្ពុជា ឡាវ មីយ៉ាន់ម៉ា ថៃ និងប្រទេសវៀតណាម យើងនឹងបើកឲ្យមានផ្លូវអាកាលហាយវេមួយជាលើកដំបូងនៅក្នុងពេលឆាប់ៗខាងមុខនេះ ដែលផ្លូវអាកាសហាយវេនេះ វាមានរយៈកម្ពស់ពី ៤ គីឡូម៉ែត្រ ទៅ១១គីឡូម៉ែត្រ ដោយផ្អែកតាមរយៈចម្ងាយនៃគោលដៅហោះហើរ នោះ ។
លោកបានបន្តថា ៖ សារៈសំខាន់នៃការបង្កើតឲ្យមានផ្លូវអាកាសហាយវេនេះ គឺស្ថិតក្នុងគោលបំណងទប់ស្កាត់ហានិភ័យផ្លូវអាកាស ខណៈពេលដែលបច្ចុប្បន្ននេះ មានយន្តហោះធ្វើចរាចរណ៍លើផ្លូវអាកាសកាន់ច្រើន ដែលនឹងអាចមានបញ្ហាប្រឈមដោយការប៉ះទង្គិចគា្ន ហើយផ្លូវហាយវេ ដែលគ្រោងនឹងបើកឲ្យដំណើរការក្នុងពេលឆាប់ៗនេះ វានឹងអាចធ្វើឲ្យការហោះហើរត្រូវបានចំណាយពេលវេលាតិច ប្រើប្រាស់សាំងក៏អស់តិច ហើយថែមទាំងបានធានាសុវត្ថិភាពខ្ពស់ ជាពិសេសនោះគឺសំបុត្រធ្វើដំណើរតាមជើងយន្តហោះ វានាងអាចចុះតម្លៃខ្លះ ជាងបច្ចុប្បន្ននេះ ។ លោកសបានបន្តទៀតថា ផ្លូវអាកាលហាយវេនេះ បើសិនជាទទួលបានជោគជ័យ ក្នុងការដាក់ឲ្យប្រើប្រាស់នៅក្នុងបណ្តាប្រទេសទាំង៥ នៃតំបន់តាមដងទន្លេមេគង្គ គេនឹងបន្តគម្រោងរៀបចំឲ្យមានផ្លូវហាយវេនៅក្នុងតំបន់អាស៊ាន និងមានការតភ្ជាប់ ទៅកាន់តំបន់អ៊ឺរ៉ុប ផងដែរ ។
លោកម៉ៅ ហាវណ្ណាល់ រដ្ឋលេខាធិការនៃរដ្ឋលេខាធិការដ្ឋានអាកាសចរណ៍ស៊ីវិលកម្ពុជា បានជំរុញឲ្យមន្ត្រីជំនាញនៃប្រទេសទាំង៥ ពិភាក្សាគ្នាដើម្បីសម្រេចបាននូវគម្រោងប្រើប្រាស់ផ្លូវអាកាសហាយវេនេះ ព្រោះវាជាផ្លូវយុទ្ធសាស្ត្រអាកាសចរមួយដ៍សំខាន់ សម្រាប់បង្កឲ្យមានភាពងាយស្រួល ដល់ការធ្វើចរាចរផ្លូវអាកាស និង មានសុវត្ថិភាពខ្ពស់ ៕
